Аҳмадбойнинг 100 миллиард сўми прокурорлар томонидан йўқ қилингани айтилди. Ўзбекистон пойтахтида ўқиш рус тилида олиб бориладиган мактабларнинг кўпайиб кетаётгани танқид қилинди. Жорий ҳафта матбуот шу каби воқеалар ҳақида хабар берди.
________________________________________________
Аҳмадбойнинг жияни прокурорлар 100 миллиард сўмни ўғирлаганини иддао қилди
“Аҳмадбой иши” бўйича жиноят ишлари бўйича Қуйи Чирчиқ туман судида ўтган тўртинчи очиқ суд мажлисида шов-шувли баёнот берилди (www.sof.uz, 13 февраль) Судланувчилардан бири, Аҳмадбойнинг жияни Муроджон Турсунбоев ўз чиқишида прокуратура ходимларини катта миқдордаги маблағни ўзлаштиришда айблаган.
“Ҳурматли прокурор, камида 100 миллиард сўм пулни ҳамкасбларингиз йўқ қилиб юборган. Буни халққа ким тўлайди? Яна бу амаким (Аҳмадбой Турсунбоев назарда тутилмоқда – таҳр.) бўйнига илиниб кетяпти. ...ўша пулларни ўғирлаганлар ҳам тўлаб юборсин”, деган Муроджон Турсунбоев музокара сўзида.
Қайд этилишича, Муроджон сўз бошлаганда суд қамоғида бўлган Аҳмадбой ва бошқалар уни имо-ишоралар билан тўхтатишга ҳаракат қилган. Охири Аҳмадбой суд залида ўтирганларга эшитарли қилиб, “жим” дея қатъий таъкидлаган. Шундан сўнг Муроджон сўзлашни бас қилган.
Аҳмадбой (Аҳмаджон Турсунбоев) 2016 йил июнида қўлга олинган эди. Қўлга олинган куни унинг ва яқин қариндошларининг уй-жойлари ва уларга тегишли корхоналардан 13,1 миллиард сўм ва 7,9 миллион доллар маблағ далилий ашё сифатида олингани маълум қилинган.
Фирибгарликда айбдор деб топилган А. Турсунбоев маҳкама ҳукми билан 1 йил муддатга тадбиркорлик билан шуғулланиш ҳуқуқидан ҳамда 14 йил 4 ой муддатга озодликдан маҳрум қилинган.
Профессор Қозоқбой Йўлдошев сохта ўзбекпарастликни танқид қилди
Педагогика фанлари доктори, профессор Қозоқбой Йўлдошев ўзбек тили билан боғлиқ хато-камчиликларни мардона тан олиб, уларни тузатишга ҳаракат қилишга чақирди (www.kun.uz, 9 февраль).
“Биз ҳозир ҳаммамиз хизмат вазифамизни бажариш билан, ўзимизнинг унчалик ёмон ишламаётганимизни таъкидлаш билан, ўзимизнинг анча саводли ва “ўзбекпараст” эканимизни кўрсатиш билан овора бўляпмиз”, деган Қ. Йўлдошев.
Олимга кўра, ўзбек тили ҳалокат ёқасига келиб қолган. Шу боис ўзбек тилига давлат тили мақоми берилганини байрам қилишдан олдин мақомини жойига қўйиш, уни ҳимоя қилиш ҳақида ўйлаш керак.
“Нега бизда реклама баннерлари бошқа тилда ёзилади, чунки бу ўша одамлар учун ёзилади, демакки, бизни – ўзбекни ҳурмат қилмайди. У инглиз, итальян ёки русни ҳурмат қилиши мумкин, лекин ўзбекни эмас. Бу ерда ўтирганларга: сизда ҳам, менда ҳам, сенаторлар, депутатларда ҳам нега ўзи шунақа бўляпти, деган изтироб пайдо бўлиши керак, лекин шу изтиробнинг ўзи йўқ! Нега Тошкентдай шаҳарда 53 фоиз мактаб рус мактабига айланиб боряпти, буни ўйлаб кўришимиз керак. Бу катта фожиа аслида”, деган профессор Қ. Йўлдошев.
Ўзбекистон томони Саудия элчихонасидан Умра визасини ҳар кимга бермасликни илтимос қилган
Ўзбекистон мусулмонлари идораси Саудия Арабистонининг Тошкентдаги элчихонасига мамлакат фуқароларига Умра визасини бериш борасида чекловни кўзда тутувчи илтимос билан мурожаат қилган (www.gazeta.uz, 11 февраль). Бу ҳақда Ўзбекистон мусулмонлари идораси халқаро алоқалар бўлими мудири Муҳаммад Акмалхон Шокиров Тошкентда ўтказилган матбуот анжуманида маълум қилган.
“Тасаввур қилинг, ота-онангиз Умрага бориш учун навбатда уч йилдан бери турибди. Бошқа тарафдан бир одам келиб, Умрага бориш истагида элчихонага мурожаат қилмоқда. Адолат мезони бузилмоқда. Ҳалиги одамни тўхтатиб, нега навбатсиз кетяпсан, деган бўлардингиз. Ана шу адолат мезони бузилмаслиги мақсадида Саудия Арабистонининг Ўзбекистондаги элчихонасидан илтимос қилинганки, Ўзбекистон мусулмонлари идораси тақдим этган рўйхатдан ташқари бошқа фуқароларга, иложи бўлса, Умра визаси берилмасин”, деган Муҳаммад Акмалхон Шокиров.
Айни пайтда Ўзбекистонда Умра ишини ташкил этиш билан фақат давлат ташкилотлари шуғулланади. Мамлакат фуқаролари мустақил ҳолда Саудия элчихонасига ҳужжат топшириб, Ҳаж ёки Умра визасини ололмайди. Бу борада Ўзбекистон томонидан Саудияга сўров киритилгани тан олинмай келар эди. Қайд этиш жоизки, Ўзбекистон мусулмонлари идораси халқаро алоқалар бўлими мудири мазкур ҳолатни илк бор расман тан олмоқда.
