Москвада мигрантлар ўзбек, тожик ва қирғиз тилларида рус армиясига қўшилишга тарғиб қилинди. Уруш хроникаси

Воронежда ҳарбийга чақирилганларнинг яқинлари губернатордан фарзанд ва эрларини қутқаришни илтимос қилди

Одамлар шаҳар прокуратураси биноси олдига тўпланишди. Айтилишича, Воронеждан сафарбар қилинганларни қўмондонлик Луганск вилоятига йўллаган. “Вёрстка” нашри ёйинлаган видеомурожаатда воронежликлар сафарбар қилинганлар бўлинмасини командирлар фронт чизиғида ташлаб кетганини ва улар тез орада Украина армиясининг ўқ ёмғири остида қолганини билдиришган.

“Биз губернатордан ва юқори идоралардан ҳарбий қисм билан бирга Валуйка томонга жўнатилган ўз мобилизантларимизга ёрдам беришни илтимос қиламиз. Украинага етиб боришлари билан уларни фронтнинг олдинги чизиғига ташлаганлар. Командирлар “ҳадемай қайтамиз, нарса-буюмларингизни ҳам келтирамиз” деган баҳона билан жанг майдонидан қочишган. Аммо улар қайтмаганлар, 40 дақиқадан сўнг бўлинмани гранатомёт, миномёт ва бошқа қуроллардан ўққа тута бошлашган. Сафарбар қилинганлар айтишича, жанг уч кун давом этган. Аскарларимиз имкон қадар тирик қолишга ҳаракат қилганлар... Улар уйқусиз, овқатсиз қолган бўлишса-да, уч кун мудофаани ушлаганлар ва ўз командирларидан фарқли ўлароқ жангдан қочиб кетмаганлар”, дейилади мурожаатда.

Сафарбар қилинган аскарлардан бири “Вёрстка” нашри билан суҳбатда ўз ҳисобича ўша жангда 500 нафаргача одам ўлганини айтган.

“Бизни тутдай тўкишди. Бу тўполонлар бошланар маҳалда офицерлар қочиб кетишди. Душман артиллерияси бир оз тинган пайтларда биз окоп қазиб, яшириниб олишга уриндик, лекин улар дронлар орқали жойимизни аниқлаб, қайта-қайта ўққа тутишди”, деган у.

The Washington Post: Жо Байден маъмурияти музокаралар бўйича Украина ҳукумати билан хусусий мунозара олиб бормоқда

Газета ушбу хабарни эълон қиларкан, АҚШ маъмуриятидаги ўз манбаларига ҳавола берган.

The Washington Post ёзишича, украин сиёсатчиларига Россия билан сулҳ музокараларини кун тартибидан олмасликни илтимос қилишмоқда. Аммо, айтилишича, бундан мақсад Киевни музокаралар столига ўтқизиш эмас, балки “фуқаролари уруш узоқ йилларга чўзилишидан хавотир олаётган мамлакатларда Украинанинг дастакланишини таъминлаш”дир.

Мақолада нафақат Европа, балки уруш туфайли энергетика ва озиқ-овқат инқирозидан энг кўп жабр чекаётган Африка ва Лотин Америкаси мамлакатлари ҳам тилга олинган. Шу билан бирга, газета АҚШ мулозимлари Украина расмийларининг Путин музокараларга жиддий қарамаслиги хусусидаги фикрига қўшилишини қайд этган.

Зеленскийнинг матбуот котиби Сергей Никифоров таҳририятнинг ушбу маълумотларни тасдиқлаш ёки инкор этиш илтимосига жавоб бермаган. Украина президенти офиси раҳбари Андрей Ермак эса яқинда The Washington Post учун берган изоҳида “босқинчи тинчликпарвар бўла олмаслиги” ҳақида ёзган ва Ғарб лидерларини алданмасликка чақирган эди.

Кёльн шаҳрида юзлаб одам диктатурага қарши норозилик намойишига чиқди

5 ноябрь куни Германиядаги бир неча юз украиналик ва эронлик мамлакат ғарбидаги Кёльн шаҳрида «озодлик марши»да иштирок этишди.

Намойиш Германия-Украина кўк-сариқ хоч уюшмаси ва бир гуруҳ эронликлар томонидан уюштирилган. Ташкилотчилар 10 мингга яқин одамни жалб қилишига умид қилган.
Келиб чиқиши эронлик ва украиналик бўлган намойишчи Лили Аминий акция қатнашчилари «бутун дунёда эркинлик ва инсон ҳуқуқлари» учун намойиш ўтказаётганини айтди.

Кёльн полицияси намойишчилар сони тўғрисида маълумот беришдан бош тортиб, бунинг ўрнига намойиш ташкилотчилари билан боғланишни таклиф қилди. Аммо улар билан дарҳол боғланишнинг иложи бўлмади.

Намойиш Эрон Москвага дрон етказиб бергани ҳақида хабар тарқалган бир пайтга тўғри келди.

Россия Украинадаги уруш давомида дронлар ёрдамида электр станциялари ва инфратузилмани нишонга олмоқда.

Бахмут мэри: Шаҳарда шиддатли жанглар кетмоқда

Украинанинг қамалда қолган Бахмут шаҳрида шиддатли жанглар кетмоқда. Бу ҳақда 5 ноябрь куни шаҳар вице-мэри маълум қилди.

Россия кучлари Донецк вилоятидаги Бахмут ва унинг яқинидаги Авдеевкага қарши бир неча бор ҳужум уюштирган, бироқ Киевнинг айтишича, катта йўқотишлар билан ортга чекинган.

Шанба куни бўм-бўш қолган ҳукумат биноси йўлагидан туриб сўзлаган Бахмут ҳокимлиги раҳбари ўринбосари Александр Марченко Украина қўшинлари «фронт чизиғини қатъий ушлаб турганини» айтди.

Бош штаб маълумотларига кўра, Бахмут фронтида айни дамда «энг жадал жанглар кетмоқда». Марченко Россия шаҳарга бир неча томондан бостириб киришга уринаётганини айтди.

«Афсуски, ҳар куни тинч аҳоли орасида ўлган ва яраланганлар бор. Кеча етти киши яраланди. Афсуски, бир киши вафот этди. Жамоамизда фаол жанглар бошланганидан бери 120 дан ортиқ ўлим қайд этилди. Бу бизга маълум бўлгани. Айрим туманларда ўлганларнинг аниқ сонини билмаймиз, чунки у ерда шиддатли жанглар давом этмоқда ёки у ерлар вақтинча ишғол қилинган».

Унинг сўзларига кўра, ҳар куни содир бўлаётган отишмаларга қарамай, 12-15 мингга яқин одам шаҳарда қолмоқда. Урушдан олдин шаҳарнинг доимий аҳолиси 80 минг кишини ташкил қилган. Маҳаллий ҳукумат уларни озиқ-овқат ва сув билан таъминлаш учун қўлидан келганини қилмоқда. Шаҳарда деярли икки ойдан бери электр токи, газ ва сув таъминоти йўқ. Руслар эса ҳозирча у ерда бўш келишни режалаштирмаяпти.

Марченко «Вагнер» рус хусусий ҳарбий ширкатининг Бахмутга ҳужумдаги ролини изоҳлашдан бош тортиб, бундай сўровлар Украина ҳарбийларига йўналтирилиши кераклигини айтди.

Буюк Британия мудофаа вазирлигига кўра, «Вагнер» гуруҳи Бахмут жангларида фаол иштирок этаётгани эҳтимолдан холи эмас.

«Бу шаҳарда омон қолиш кундан кунга қийинлашиб бормоқда. Ҳали изғирин бошлангани йўқ, қиш ҳали келмаган... Биз уни ушлаб турибмиз ва Украина Қуролли кучлари душманни шаҳардан узоққа чекинтира олишига умид қиламиз», — дея қўшимча қилди Марченко.