Эрон раҳбарлари ўнлаб миллион долларни мамлакатдан чиқармоқда - АҚШ Молия вазири

Трамп: Эрон билан савдо қилганларга 25 фоиз тариф жорий этилади

Эронда норозиликлар кучайиб, қурбонлар сони ошиб бораётган бир пайтда АҚШ президенти Доналд Трамп кескин баёнот қилди. У Теҳрон билан иқтисодий алоқада бўлган давлатларга 25 фоизлик тариф жорий этилишини билдирди.

Доналд Трампнинг Truth тармоғида 12 январда эълон қилган баёнотига кўра, Эрон Ислом Республикаси билан савдо ёки бошқа иқтисодий алоқаларга эга бўлган мамлакатлар АҚШ билан амалга оширилаётган барча бизнес операциялари учун 25 фоизлик тариф тўлайди. Қарор “дарҳол кучга кириши” ва “якунловчи” экани таъкидланган.

Республикачи Сенатор Линдси Грэм президент ташаббусини қўллаб-қувватлаб, Эрон раҳбарияти “қизил чизиқлардан ўтганини” маълум қилди ва ҳарбий чоралар кўриш зарурлигини билдирди. Унинг таъкидлашича, таклиф этилаётган ҳаракатлар ерда қўшин жойлаштирмасдан амалга оширилиши керак.

Трамп эронликларни норозилик намойишларини давом эттиришга чақириб, уларни зўравонликка қўл ураётганларнинг исмларини унутмасликка ундади.

“Эронлик ватанпарварлар, НОРОЗИЛИКЛАРНИ ДАВОМ ЭТТИРИНГ — ҲУКУМАТ БИНОЛАРИНИ ҚЎЛГА ОЛИНГ!!! … ЁРДАМ ЙЎЛДА”, — деди Трамп сешанба куни Truth Social тармоғида эълон қилган хабарида. У мазкур ёрдам нимадан иборат эканини аниқ айтмади.

Трампнинг айтишича, у намойишчиларнинг “бемаъни қатлиом”и тўхтамагунча, эронлик расмийлар билан бўлиши керак бўлган барча учрашувларни бекор қилган.

Кейинроқ “ёрдам йўлда” деган гапи билан нимани назарда тутгани сўралганда, Трамп журналистларга бунга ўзлари хулоса чиқаришлари кераклигини айтди.

CBS телеканалига берган интервьюсида Трамп Эронни огоҳлантириб, агар режим намойишчиларни осишни бошласа, АҚШ “жуда кескин чоралар” кўришини айтди.

“Агар улар осишга ўтса, сиз айрим воқеаларни кўрасиз… бундай қилсалар, биз жуда қатъий ҳаракат қиламиз”, — деди у.

Ўзбекистон ТИВ Эрондаги юртдошларни намойишлардан йироқ бўлишга чақирди

Расмий Тошкент Эронда бўлиб турган ўзбекистонликларни норозилик намойишларида иштирок этмасликка, одамлар кўп тўпланадиган жойлардан йироқ бўлишга ва хавфсизлик қоидаларига қатъий амал қилишга чақирди. Бу ҳақда Ташқи ишлар вазирлиги матбуот котиби Аҳрор Бурхонов 14 январь куни маълумот берди.

Ўзбекистон томони бу баёнотни Эрондаги норозиликлар бошланганидан 18 кун ўтгач эълон қилди. Унда қайд этилишича, ҳозиргача Эрондаги намойишлар давомида Ўзбекистон фуқаролари орасида жабрланганлар йўқ. Айни дамда Эронда қанча ўзбекистонлик борлиги ёки уларнинг умумий аҳволи ҳақида қўшимча маълумот берилмаган.

АҚШ президенти Доналд Трамп ўз манбаларига таяниб айтишича Эрон режими норозилик намойишларида иштирок этганларга нисбатан режалаштирилган қатлларни қолдирган. Бироқ у бу маълумот бўйича ҳеч қандай тафсилот келтирмади.

Инсон ҳуқуқларини ҳимоя қилувчи ташкилотлар маълумотларига кўра, кескин куч ишлатиш ва интернетнинг узоқ вақтга ўчириб қўйилиши фонида 2 минг 400 нафардан ортиқ намойишчи ҳалок бўлган, 18 минг нафарга яқин киши ҳибсга олинган.

Шу билан бирга, Вашингтон Теҳронга нисбатан ҳарбий ёки бошқа турдаги чоралар кўриш эҳтимолини кўриб чиқаётгани боис, АҚШ–Эрон муносабатларидаги кескинлик юқори даражада сақланиб қолмоқда.

АҚШ президенти Доналд Трампнинг айтишича, “қарши томондаги жуда муҳим манбалар”га таяниб, Эронда намойишчиларни қатл этиш вақтинча тўхтатилган. Бироқ Яқин Шарқ минтақасида кескинлик сақланиб қолмоқда, чунки АҚШнинг Теҳронга қарши ҳарбий чоралар кўриши эҳтимоли ҳануз кун тартибида қоляпти.

“Улар одам ўлдириш тўхтатилганини ва қатллар амалга оширилмаслигини айтди — бугун жуда кўп қатллар бўлиши керак эди, аммо улар бўлмайди. Биз буни яна аниқлаймиз”, — деди Трамп 14 январь куни Оқ уйда журналистлар билан суҳбатда.

13 январь куни Испаниянинг Барселона шаҳрида Эрондаги норозиликларни қўллаб-қувватлаш акцияси давомида иштирокчилар байроқлар билан намойиш ўтказди.

Эрон расмийлари мамлакат бўйлаб ҳукуматга қарши оммавий норозиликлар бошланганидан сўнг сўнгги йиллардаги энг шафқатсиз тазйиқларни амалга оширмоқда. Бу намойишлар 1979 йилги Ислом инқилобидан бери диний раҳбарият ҳокимиятига қарши энг жиддий синовлардан бири сифатида баҳоланмоқда.

ДХХ: Bayraktar билан қуролланган навбатчилар чегарага қўйилди

Хавфсизлик кенгашининг кенгайтирилган йиғилишида Давлат хавфсизлик хизмати раиси Баҳодир Қурбонов Ўзбекистон давлат чегарасида Bayraktar русумидаги учувчисиз бошқариладиган аппаратлар билан жиҳозланган янги махсус бўлинма навбатчилиги йўлга қўйилганини маълум қилди.

Қурбоновнинг айтишича, чегара ҳимояси кучайтирилган - давлат чегарасининг 42 фоизи видеокузатув тизими билан жиҳозланган, 1117 километр оптик толали алоқа линияси тортилганини айтиб ўтган.

«Чегара бўлинмалари замонавий учувчисиз учиш аппаратлари билан таъминланди. Bayraktar учувчисиз учиш аппаратлари билан бутланган янги махсус бўлинманинг жанговар навбатчилиги йўлга қўйилди. Жанговар тайёргарлик тадбирлари интенсивлиги ва сифат кўрсаткичлари оширилди», деди жумладан Давлат хавфсизлик хизмати раиси Баҳодир Қурбонов.

Ўзбекистон президенти Мирзиёев 13 январ куни Мудофаа кучлари тайёргарлигини шахсан кўздан кечирган эди.

Аммо, президент Мирзиёев ёки бошқа бирор ҳукумат расмийси Эронда қарийб 20 кундирки давом этаётган қонли намойишлар ҳақида ҳали бирор баёнот бергани йўқ.

Фақат, Ўзбекистон ташқи ишлар вазирлиги 14 январ куни бу давлатда бўлиб турган ўзбекистонликларни эҳтиёткорлик ва намойишларда қатнашмасликка чақирди ва шу кунгача бу намойишларда ўзбекистонликлар жабрланганига оид бирор маълумот йўқлигини айтиш билан чекланди.