Запорожье АЭСнинг сўнгги реактори тўғон ўпирилиши туфайли тўхтатилди
Запорожье АЭСнинг ишлаб турган охирги реактори Каховка ГЭС тўғони ўпирилиши ортидан вужудга келган вайронкор тошқин манзарасида хавфсизликни таъминлаш учун пайшанбадан бошлаб “совуқ тўхтов” режимига ўтказилди, дея маълум қилмоқда Украинанинг “Энергоатом” давлат ширкати.
Каховка сув омбори Запорожье АЭСнинг совитиш тизимини сув билан таъминлайди. Сешанба куни ГЭС тўғони ўпирилиши тўғонда сув сатҳи пасайиб кетишига ва атрофдаги ҳудудларни қалин сув босишига олиб келган эди.
Украина ва Россия тўғондаги ҳалокат учун бир-бирини айблади.
Украина жанубидаги Запорожье АЭС Европанинг энг йирик атом электр станцияларидан бири бўлиб, айни пайтда уни Россия назорат қилмоқда. Тўғон ўпирилганидан сўнг станциянинг олти реакторидан бештаси бирин-кетин тўхтатилган эди.
Мазкур ҳолатда барча бошқарув стерженлари ядровий бўлиниш реакциясини тўхтатиш учун реакторнинг фаол зонасига киритилади, реактор ичидаги босим ва ҳарорат эса тобора пасайиб, совитишда камроқ сув сарфлай бошлайди.
Шанба куни “Энергоатом” Запорожье АЭСда вазият барқарор ва назоратда эканини маълум қилган.
Россия бир неча ҳужумларни қайтарганини, Украина эса Бахмутда олға силжиганини даъво қилди
Россия Мудофаа вазирлиги Украинанинг Ғарб давлатларидан келган “Леопард” танклари ва М2 Бредли пиёда жанговар машиналари йўқ қилингани акс этган тасвирларни эълон қилди. Украина эса Бахмут йўналишида олдинга силжишини билдирди.
Россия Мудофаа вазирлигига кўра, рус аскарлари Донецк жануби ва Запорожье йўналишида Украина кучларининг бир нечта ҳужумларини қайтарган.
Бахмутда украин кучларининг бешта ҳужуми қайтарилди. Шунингдек, Купянск, Лиман ва Херсон йўналишларида душман шахсий таркиби ва ҳарбий техникаларига ҳужум уюштирилди, дея хабар қилди Россия мудофаа вазирлиги.
Украина Қуролли Кучлари Бош штаби Россия кучлари Лиман, Бахмут ва Маринка йўналишида қилган ҳужумлари муваффақиятсиз тугаганини маълум қилди. Ўтган сутка мобайнида фронтда 28 та жанг бўлган. Украина томонига кўра, Украина ҳаво кучлари, ракета ва артиллерия қўшинлари Россия ҳарбий объектларига ҳужум қилган.
Украина кучлари Бахмут йўналишида 1400 метрга олдинга силжиганини ҳам маълум қилди.
Россиянинг Одессага зарбалари натижасида уч киши ҳалок бўлди
Россия кеча эрта тонгда Украина бўйлаб ракета ва дронлар билан ҳужум қилди. Ҳужум оқибатида Одесса шаҳрида 3 нафар тинч аҳоли ҳалок бўлди, Полтава вилоятидаги ҳарбий ҳаво майдонига ракета келиб тушди дея маълум қилди Киев расмийлари.
Бу ҳужумлар, Киев қарши ҳужумга ўтишга шайланаётган бир пайтда содир бўлди.
15 ёшли ўсмирнинг айтишича, у қулоқчинда бўлгани боис, ҳаво ҳужуми сиреналарини эшитмаган. Аммо кейин портлаш овозини эшитган.
Украина ҳарбий ҳаво кучлари руслар саккиз ракета ва 35 та дрон билан ҳужум қилганини таъкидлади.
Ҳаво ҳужумидан мудофаа бўлинмалари 20 та дрон ва иккита қанотли ракетани уриб туширишга муваффақ бўлган.
Чехияда украин ўқувчи қизни хўрлашди
Чехияда украиналик ўқувчи қиз Полина Бутковскаянинг синфдошлари томонидан масхаралангани ва юзига тупурилгани акс этган видео катта резонансга сабаб бўлди.
Қизчанинг айтишича, зопаркка саёҳат пайтида синфдошлари билан Украина ва Россия ўртасидаги тортишув чиққан ва бир неча ўғил бола синфдоши уни украиналик бўлгани учун масхара қилган, улардан бири “Россия Украинадан яхшироқ, кучлироқ”, деб қичқириб, қизчанинг юзига туфлаган.
Шу саҳна қизча ўз онаси учун олган видеога тушиб қолган, аммо бу видео маълум сабабларга кўра намойиш қилинмаётир.
Бу видеони қизча онасига йўллаган ва онаси ҳодисадан шокка тушиб, уни Фэйсбукда чоп этгач, украиналиклар ва чехияликларнинг катта норозлигига сабаб бўлган.
Вазиятга Чехия ички ишлар вазири, Украина элчихонаси ҳамда ҳуқуқ фаоллари аралашди. Чехия президенти Петер Павел эса қизалоқ ва унинг онаси билан шахсан учрашиб, ҳодисани қаттиқ қоралади.
Дилозор болалар, уларнинг ота-оналари, мактаб ўқитувчилари ва директори украиналик жасур қизча ва оиласидан кечирим сўради.