Зеленский: “Дунё Каховка тўғони ҳалокатига шармандаларча бефарқ”
Украина президенти Владимир Зеленский айрим давлатларни Каховка тўғони бузилиши натижасида юзага келган инсоний ва экологик талофатга “шармандаларча бефарқ” дея танқид қилди:
"Таассуфки, дунёнинг баъзи бурчакларида Россиянинг Каховка ГЭСидаги теракти натижасида юзага келган экоцид ва инсоний фалокатга шармандаларча бефарқ эканини кўряпмиз."
Москва ва Украина Каховка ГЭСининг вайрон бўлишида бир-бирини айблади, шунингдек ҳар икки томон бир-бирини қутқарув ишлари кетаётган пайтда тинч аҳолини ўққа тутишда ҳам айблади.
Ғарб давлатлари ҳодиса бўйича далиллар йиғилаётганини айтмоқда. Бироқ Ғарб таҳлилчилари Украинанинг ўз бошига бундай ҳалокатли фалокат келтириши учун ҳеч қандай асос йўқлигини, айниқса қарши ҳужумга ўтаман деб турган пайтда бу мантиқсизлигини таъкидламоқда.
“Ҳозирги вақтда Херсон ва Николаев вилоятларидан 3000 дан ортиқ одам эвакуация қилинган. Аммо яна такрор айтаманки, бу фақат бизнинг назоратимиз остидаги ҳудудлардан эвакуация қилинган аҳоли", деди Зеленский.
Трюдо: Украинанинг НАТОга аъзо бўлиши "жуда ижобий" қадам
Канада бош вазири Жастин Трюдо Киевга ташрифи чоғида Украинанинг НАТОга қўшилиши бўйича музокараларни қўллаб-қувватлашини билдирди:
"Канада ва бошқа кўплаб давлатлар вазият имкон берса Украинанинг НАТОга қўшилишини қўллаб-қувватламоқда. Бу бўйича давом этаётган музокараларга ижобий қарайман".
Трюдо, шунингдек, Канадада рўйхатдан ўтган Россияга тегишли юк самолётини мусодара қилиш ва Украинага бериш ҳаракати Ғарб давлатлари "Путин ва унинг шерикларини товон тўлашга жиддий ёндашаётганини" кўрсатади, дея таъкидлади.
Россияда рўйхатдан ўтган “Волга-Днепр” логистика компаниясига тегишли Антонов 124 самолёти Россия Украинага бостириб кириб, Канада Россия самолётлари учун ҳаво ҳудудини ёпиб қўйганидан бери Торонто Пирсон халқаро аэропортида сақланмоқда.
Трюдо Владимир Путиннинг Украина кучлари шарқий фронтда катта йўқотишларга учрагани ҳақидаги иддаоларини рад этар экан, Путин “ҳар гал гап бошлаганда, ёлғон гапиради”, дея фикр билдирди.
Трюдо Киевга ташрифидан аввалроқ Украинага 500 миллион долларлик янги ҳарбий ёрдам ажратилишини эълон қилган.
Украинада 700 минг киши тоза ичимлик сувидан бебаҳра қолди
Каховка ГЭС тўғони вайрон бўлиши натижасида Украинада қарийб 700 минг киши тоза ичимлик сувисиз қолди.
Бу ҳақда Associated Press агентлигига берган интервьюсидаБМТ бош котибининг гуманитар масалалар бўйича ўринбосари Мартин Гриффитс маълум қилди.
Ичимлик сувидан бебаҳра одамлар Украина назоратидаги ҳудудларда ҳам, Россия ишғол этган туманларда ҳам бор.
Сув ифлослангани сабабли Херсон вилоятида сув ҳавзаларида чўмилиш ва балиқ овлаш, шунингдек ҳайвонларни суғориш ва маҳаллий сув манбаларидан ичиш учун сув олиш тақиқланган.
Гриффитсга кўра, БМТ Украина назорат қилаётган сув босган ҳудудларда 30 минг аҳолига ёрдам берган. Жойларда кўплаб волонтёрлар иш олиб бормоқда.
Россия ҳарбийлари эса ўз назоратидаги ҳудудларга БМТ вакилларини ўтказишмаяпти.
Волонтёрлар Днепрнинг сўл қирғоғида юзлаб одам йўқолганини айтишмоқда
Херсон вилоятининг Россия ишғол қилган қисми – Днепр дарёси сўл қирғоғидаги сув босган ҳудудларда 374 кишининг тақдири мавҳум бўлиб турибди. Бу ҳақда волонтёрларга таянган ҳолда “Агентство” нашри хабар қилмоқда.
Хабарга кўра, йўқолганлардан икки нафари катта эҳтимол билан, ҳалок бўлган. Волонтёрлар яна бир киши ўлганини тасдиқлаганлар.
Волонтёрлар координатори айтишича, 9 июнь куни сув босган ҳудудлардан бир неча ўн кишини олиб чиқиб кетишга муваффақ бўлинган. “Агентство” волонтёрлар харитасида 315 та мурожаатга “эвакуация қилинди” деб белгиланганини қайд этган.
Волонтёрлар базасида ҳозирда эвакуация қилиш сўралган 1700 дан зиёд мурожаат мавжуд, ҳар бир мурожаат бир неча кишидан тушган бўлиши мумкин.