Песков: Россия Буюк Британиянинг Украинага қурол-яроғ етказиб беришига муносиб жавоб қайтаради
Кремль матбуот котиби Дмитрий Песков CНН телеканалига берган интервьюсида Британиянинг Украинага узоқ масофали «Storm Shadow» қанотли ракеталарини етказиб беришига муносабат билдирди:
"Бу бизнинг ҳарбийларимиздан тегишли қарорларни ҳарбий нуқтаи назардан кўриб чиқадиган адекват жавобни талаб қилади."
Буюк Британия мудофаа вазири Бен Уоллес пайшанба куни бу хабарни тасдиқлаб, узоқ масофага учувчи ракеталар Украина кучларига рус қўшинларининг нишонларини фронт чизиғига бормасдан уриш имконини беради, деди.
Украина бир неча ойдан бери Ғарбдан узоқ масофали ракеталарни сўраб келади. Бироқ Британия ва АҚШ шу пайтгача қисқа масофали ракеталар бериш билан чекланган.
Британия ва бошқа Ғарб давлатлари Украинага ҳарбий ёрдам кўламини кенгайтирди. Уоллес ва Британия ташқи ишлар вазири Жеймс Клеверли Украинани қўллаб-қувватлаш бўйича музокаралар учун АҚШда бўлиб қайтди.
Рейтер агентлигига кўра, Украинадаги можаро бурилиш нуқтасида. Киев янги қарши ҳужумни бошлаши кутилмоқда. Россия эса қишда катта ҳужумни уюштирди бироқ айтарли муҳим ҳудудларни қўлга кирита олмади.
CNN: Марказий разведка бошқармаси Телеграм каналида русларни маълумот бўлишишга чақирди
АҚШ Марказий разведка бошқармаси Телеграм - канал яратди ва унда россияликларни агентлик билан маълумот бўлишишга даъват қилинган видеони чоп этди.
“Ушбу видеода аноним Тоr маълумот тизими орқали жуда қийин, аммо муҳим қарорга келиб Марказий разведка бошқармасига алоқага чиққан тўқима #россияликлар кўрсатилган”, — дейилади видеонинг изоҳида.
Марказий разведка бошқармасидаги CNN манбасининг таъкидлашича, Россиянинг Украинага кенг кўламли босқини “руслар бизга келиб, АҚШга зарур бўлган маълумотларни тақдим этиши учун” тарихий имконият яратди.
Шу билан бирга, CNN суҳбатдошининг даъво қилишича, Телеграм каналида эълон қилинган видео тартибсизликларни қўзғатиш ёки қўзғатиш учун мўлжалланмаган.
Россия ТИВ расмий вакили Мария Захарова РБКда Марказий разведка бошқармаси телеграм канали яратилишига изоҳ берар экан, “Мурожаат қилганларни кузатиш учун жуда қулай ресурс”, деди.
АҚШ Россиядаги АҚШ миссиясининг собиқ ходими ҳибсга олинганини кескин қоралайди
АҚШ Давлат департаменти 16-май, сешанба куни АҚШнинг Россиядаги миссиясининг собиқ аъзоси Роберт Шоновнинг ҳибсга олинганини кескин қоралашини ва унинг хорижликлар билан ноқонуний ҳамкорлик қилгани ҳақидаги айбловларни мутлақо асоссиз деб атаётганини билдирди.
“Биз АҚШнинг Россиядаги миссиясининг собиқ аъзоси Роберт Шоновнинг ҳибсга олинганини қоралаймиз. Жаноб Шоновга қўйилган бу айбловлар мутлақо асоссиз, уни ҳибсга олиш чоғида берган баёнотимизда кўрганингиздек, унинг роли асосан матбуот ва жамоатчилик билан алоқаларни қўллаб-қувватлашга қаратилган эди”, деди Давлат департаменти вакили Ведант Пател.
Россия давлат ахборот агентлиги ТАСС хабар беришича, Шонов Узоқ Шарқдаги Владивосток шаҳрида ҳибсга олинган, бироқ Москванинг оғир жиноятчилар, жумладан жосуслар сақланадиган Лефортово қамоқхонасида қолмоқда.
Давлат департаменти матбуот котиби Метю Миллернинг айтишича, Россия фуқароси бўлган Шонов АҚШнинг Владивостокдаги Бош консуллигида 2021 йилда маҳаллий ходимлар ишдан бўшатилганга қадар 25 йилдан ортиқ ишлаган.
Миллернинг сўзларига кўра, Шонов ҳибсга олинган пайтида Москвадаги АҚШ элчихонасига ёлланма ишчи сифатида ишлаган. Унинг вазифаси Россия ОАВда ёритилган хабарлар қисқача мазмунини тўплаш бўлган ва бу келишув Россия қонунлари ва қоидаларига мувофиқ бўлган.
Россиянинг Вашингтондаги элчихонаси Рейтерс сўровига жавоб жавоб бермади.
ТАСС душанба куни ҳуқуқ-тартибот органларидаги манбага таяниб, “сўроқдан сўнг Шоновга Россия Федерацияси Жиноят кодексининг 275.1-моддаси (“Чет давлат, халқаро ёки хорижий ташкилот билан махфий асосда ҳамкорлик қилиш”) бўйича жиноят айблови қўйилганини маълум қилди. Бу моддага кўра Шонов саккиз йилгача озодликдан маҳрум қилиниши мумкин.
АҚШнинг Владивостокдаги консуллиги Вашингтон ва Москва ўртасидаги муносабатлар таранглашганидан сўнг 2020 йилнинг декабрида ёпилган эди. Бу муносабатлар Россиянинг Украинага босқинидан кейин янада 2022-йил февралида Украинага бостириб кирганидан кейин янада ёмонлашди.
Март ойи охирида ФСБ Wall Street Journal газетасининг америкалик журналисти Эван Гершковични жосусликда айблаб ҳибсга олган эди.
Британия ва Нидерландия Украина учун қирувчи учоқлар харид қилади
Буюк Британия ва Нидерландия Украинага F-16 қирувчи учоқлари сотиб олиб бериш мақсадида коалиция тузмоқда, дея хабар қилди Би-би-си.
Британия ҳукумати хабарномасига кўра, бош вазир Риши Сунак Европа Кенгашининг Исландияда ўтган саммити доирасида Нидерландия ҳукумати раҳбари Марк Рютте билан учрашиб, Украинага қирувчи учоқлар харид қилиш учун халқаро коалиция тузиш устида иш бошлаш тўғрисида келишувга эришган.
“Икки бош вазир Украинани жанговар ҳаво кучлари билан таъминлаш мақсадида, учувчиларни тайёрлашдан тортиб F-16 учоқларини харид қилишгача бўлган барча ишларни ўз ичига оладиган халқаро коалиция тузишга келишиб олишди”, дейилади хабарномада.
Украина президенти Владимир Зеленский бу хусусда шундай деди: “Биз Patriot, IRIS-T, Crotale, Hawk, NASAMS каби тизимларимизни кўпайтириш устида узлуксиз иш олиб боряпмиз. Бир пайтлар Patriot биз учун ушалмас орзу эди, аммо унга аллақачон эришдик. Украина учун ҳали яна кўп ажойиб қуролларни келтирамиз!”.