Кремль: Талабларимиз бажарилмаса, “ғалла битими”дан чиқамиз
Кремль пайшанба (18 май) куни Қора денгиз орқали кемаларда ғалла ташиш келишуви барбод бўлган тақдирда “муҳтамал мунозаралар”га киришмаслигини билдирди.
Москва, агар Россиянинг ўз қишлоқ хўжалиги маҳсулотларини сотишга доир талаблари бажарилмаса, “ғалла битими”дан чиқишини айтмоқда.
Эслатиб ўтамиз, мазкур битим билан Россия Украинага ўз ғалласини қуруқликда қизғин жанглар давом этаётганига қарамай, Қора денгиз портлари орқали хавфсиз экспорт қилишга рухсат берган эди.
“Бу ерда баҳс-мунозара қилиш ўринли бўлади деб ўйламайман. Қарор эълон қилинганича йўқ, буни биласизлар. Эълон қилингунича сабр қилишингизга тўғри келади”, деди Кремль воизи Дмитрий Песков.
“Ғалла битими” Россия томонидан дунёнинг етакчи ғалла экспортчиларидан бири бўлмиш Украинага қарши уруш очилиши натижасида вужудга келган глобал озиқ-овқат инқирозини бартараф этиш мақсадида БМТ ва Туркия воситачилигида ўтган йилнинг июлида илк бор 120 кун муддатга тузилган эди.
Россияни украин ғалласининг экспорт қилинишига кўндириш учун БМТ Москвага яқин уч йил давомида унинг ўз қишлоқ хўжалиги маҳсулотларини хорижга сотишга кўмаклашишга розилик берган.
Ўтган йили ноябрда Кремль битимни яна 120 кунга узайтиришга рози бўлган эди, кейинги сафар – март ойида эса битим муддатини атиги 60 кунга узайтиришга розилик берди.
Украина армияси такомиллашган дронлардан фойдаланмоқда
Тўрт парракли дронларнинг нархи 300 доллар туради. Бу дронлар портловчи моддаларни олиб юришга мослаштирилди.
Эндиликда Россия танклари учун етарли даражада хавф туғдира олади, дейди украиналик аскарлар.
«Биз душман танкларини, оғир ҳарбий техникаларини, шахсий таркибини йўқ қилдик. Бу жуда самарали қурилма», дейди "Какрурт" лақабли украин ҳарбийси.
У тижорий дронларни такомиллаштирди. Дронлар Украина шарқи ва жанубида Россия кучларига қарши ҳужум фойдаланилмоқда.
Украина Россия билан кучлар борасидаги тафовутни камайтириш учун ҳам разведка, ҳам ҳужум мақсадида дрон дастурини кенгайтираётганини билдирди.
Аскарлар Украина дрон дастурига катта сармоя киритганини таъкидлади.
«Одамлар ўрнига техник ресурслардан самарали фойдаланган маъқул. Шунинг учун Украина қуролли кучлари бу йўналишда жуда тез илдамламоқда», дейди "Какрурт" лақабли украин ҳарбийси.
Украин ҳарбийси, оддий дронларни жанговар мақсадлар учун ўзгартириш осонлигини, шу билан бир қаторда , Россия сунъий йўлдошларига қарши яхши ҳимояланганини айтади.
Дронлар ҳавода қисқа вақт бўлади ва радиолокаторлар аниқлаши қийин, дея қўшимча қилди.
"Рус танкларини кўрсак, дронларга зирҳ тешувчи портловчи моддани жойлаб учирамиз. Пиёда аскарларни кўрганимизда эса граната ўрнатиб учирамиз", дейди украин ҳарбийси Решик.
Россия ракета зарбасидан сўнг Николаевда ёнғин чиқди
Николаев мэри Александр Сенкевич чоршанба (17 май) куни Россия қўшинлари шаҳарга ракета зарбалари берганини маълум қилди.
Мулозимга кўра, зарбадан автосалон биноси, савдо маркази, бир нечта кўпқаватли турар жой ва саноат объекти зарар кўрган.
Украина Фавқулодда вазиятлар хизмати ёйинлаган видеода воқеа жойида ўт ўчирувчилар ишлаётганини кўриш мумкин.
Reuters агентлиги видеодадаги Suzuki автосалони ташқи дизайни ва йўлка қопламасидан у қаерда суратга олинганини аниқлашга муваффақ бўлди.
Бироқ агентлик тасвирга олиш санасини мустақил равишда тасдиқлай олгани йўқ.
Россия минглаб одамлар ўлимига, миллионлаб кишиларнинг қочқин бўлишига ва вайронагарчиликларга олиб келган ушбу кенг кўламли босқин давомида тинч аҳолига қасддан зарба бераётганини инкор этиб келади.
Николаев Украина жанубидаги кемасозлик маркази ва порт шаҳар бўлиб, урушдан олдин у ерда қарийб 470 минг аҳоли яшарди.
Шаҳар бутун уруш мобайнида Россия тарафидан қаттиқ бомбаланмоқда.
Европа етакчилари Исландияда Россиянинг Украинага етказган зарар кўламини муҳокама қилмоқда
Европа етакчилари Исландияда ўтадиган Европа Кенгашининг икки кунлик саммитига йиғилди. Саммитда Россияни Украинага тажовузи учун жавобгарликка тортиш йўллари, жумладан, Украинага етказилган зарар кўлами муҳокама қилинади.
Европа Кенгаши ҳуқуқ органи йиғилишида Германия канцлери Олаф Шолц, Франция президенти Эммануэл Макрон ва Буюк Британия бош вазири Риши Сунак Украинани қўллаб-қувватлашларини яна бир бор билдирди.
«Кенгаш Украинани қўллаб-қувватлаш ва Россия томонидан содир этилган ҳуқуқбузарликларни ҳужжатлаштиришни муҳокама қилади. Россиянинг фуқаролик инфратузилмасини портлатгани, зўрлаш, қотилликлар, умумлаштирилган қийноқларни қўллагани, украиналик болаларни депортация қилганини назарда тутяпман. Ушбу саммитда Кенгаш Украинанинг Россия тажовузи натижасида кўрган зараринининг халқаро реэстрини тузиб чиқмоқда. Мен барча давлатларни унда иштирок этишга ва фаол ҳисса қўшишга чақираман», Франция президенти Эммануэл Макрон.
Саммитда Владимир Зеленский ҳам видеоконференция орқали нутқ сўзлаб, Украинага берилаётган ҳарбий ёрдамлар учун миннатдорлик билдирди.
Еврокомиссия президенти Урсула фон дер Ляеннинг айтишича, Россиянинг Украинага етказган зарар ва йўқотишлари тўғрисидаги ҳужжатлар расмийлаштирилади:
«Биз Украинасиз Украина борасида қарор қабул қилмаймиз. Украинанинг тинчлик формуласини қатъий қўллаб-қувватлаймиз. Украина тинчлик формуласи украин халқининг тинчликка эришиш йўлининг пойдевори. Шунинг учун ҳам мен мазкур тинчлик формуласи йўлида бирлашишга чақираман».
Европа етакчилари Россия босқинчилиги натижасида Украинага етказилган зарар, йўқотишлар ҳамда жароҳатлар тўғрисидаги далилларни ҳужжатлаштириш механизмини тасдиқлаши кутилмоқда.