Польша Россия билан чегарасига элтекрон тўсиқлар ўрнатмоқда
200-километрлик электрон тўсиқлар Россиянинг Калининград области билан чегарада ўрнатила бошлади.
Бу тўсиқ кузатув камералари ва ҳаракатни сезувчи датчиклар билан жиҳозланган. Умумий тўсиқ 12 бўлимдан иборат бўлади, унда жами 3 мингта камера ўрнатилади.
Бундай тўсиқни ўрнатишдан мақсад - Польша расмийларига кўра, Россиянинг агрессив сиёсатидан туғилган таҳдид олдини олишдир.
Польша ички ишлар вазири Мариуш Каминьский, “Бу Европа иттифоқидаги энг ҳимояланган чегара бўлади” деди.
Германиядан бошпана излаган россияликлар кўпайди
Германиядан бошпана излаётган россияликлар сони кескин ошиб кетди. Шу йилнинг январь-март ойларида 2400 россиялик бошпана сўраган.
Бу эса 2022 йил давомида берилган аризалар сонидан кўпдир. Ариза топшираётганлар асосан 19 - 30 ёшлар оралиғидаги эркаклардир.
Table.Media ахборот хизматининг Германия қочқинлар ва мигрантлар билан ишлаш федерал бошқармасига таяниб хабар қилишича, бошқарма экспертлари буни Россияда урушга янги мобилизация тўлқини билан боғламоқда.
Бошқара вакилларининг бирининг Table.Mediaга айтишича, Путин Украинада бошлаган урушда қатнашишни истамаганлар Германияга бошпана сўраб, мурожаат қилиши мумкин ва бу ҳолда улар халқаро ҳимоя билан таъминланадилар.
Россияда урушга қарши баннерлар пайдо бўлди
Россиянинг 3 шаҳридаги реклама баннерларида Украинадаги урушга оид асл манзарани акс эттирган ёзувлар пайдо бўлди.
Екатеринбург, Ростов-Дон ва Ульяновскдаги баннерларда қисқа муддат кўринган ёзувларда Украинага урушга мобилизация орқали юборилган аскарлар ва уларнинг ҳикоялари акс этган.
Бу ҳикояларда урушга йўлланганлар ҳаато бошланғич тайёргарликдан ўтмагани, шунга қарамай “замбарак ўқи” қилиб олд чизиққа ўлимга ташлангани айтилган.
Екатеринбург ҳокимияти буни хакерлик ҳужуми, деб изоҳлади ва полиция айбдоларни қидираётганини айтди.
Лавров: Венесуэла билан ўртамизда кун тартиби жуда тиғиз
Венесуэла президенти Николас Мадуро Каракасдаги Мирамар ҳукумат саройида Россия ташқи ишлар вазири Сергей Лавровни қабул қилди.
Учрашувда Лавров Мадурога Россия президенти Владимир Путин юборган ҳужжатлар солинган папкани топширди.
венесуэлалик ҳамкасби Иван Гил билан учрашувдан сўнг, икки давлат бошқа соҳалар қатори энергетика, инвестиция, савдо ва молия соҳаларида ҳамкорликни кенгайтиришга тайёрлигини билдирди:
"Венесуэла билан ўртамизда кун тартиби жуда тиғиз. Кўплаб амалий лойиҳалар амалга оширилмоқда. Биз буни бугун ҳам батафсил муҳокама қилдик. Бу ҳамкорлик мустақил миллий иқтисодиёт асосларини мустаҳкамлашга ёрдам беради. Ғарблик ҳамкасбларимиз билан бўлгани каби инжиқлик ва шантажга асосланмаган”.
Венесуэла Путин ўзига яқин оладиган иттифоқчи давлатлардан ҳисобланади. Венесуэла президенти Мадуро Россия ва Украина ўртасидаги можарода Россия раҳбарини қўллаб-қувватлаган.
Москва АҚШнинг Венесуэла ҳукумати ва давлат муассаларига санкцияларидан сўнг юзага келган инқирозда Мадурони қўллаб-қувватлаб келади.