Сеул Украинага қурол бериши мумкин
Жанубий Корея президенти Юн Сук Ёл Украина агарда кенг миқёсли фуқаролик ҳужумига учраса, гуманитар ва иқтисодий ёрдамдан ташқари бошқа ёрдамни кенгайтириши мумкинлигини айтди.
Бу эса Жанубий Кореянинг Украинани қуроллантиришга қарши позицияси ўзгарганини кўрсатади. Жанубий Корея президенти АҚШга расмий давлат ташрифи олдидан Рейтер агентлигига интервьюсида бу ҳақида гапирди.
Юн Сук Ёл унинг ҳукумати Жанубий Корея худди 1950-53 йиллардаги Корея уруши пайтида халқаро ёрдам олгани каби Украинани мудофаа қилиш ва тиклашда ёрдам бериш масаласини ўрганаётганини маълум қилди:
«Агар тинч аҳолига қарши кенг кўламли ҳужум, қирғин ёки уруш қонунларининг бузилиши сингари халқаро ҳамжамият қабул қила олмайдиган бирор вазият бўлса, биз фақат гуманитар ва молиявий ёрдам билан чекланмаймиз».
Сеул бир йилдан кўпроқ вақт ўтиб, Украинага қурол-яроғ етказиб беришни таклиф қилди.
АҚШнинг асосий иттифоқчиси ва йирик артиллерия ўқ-дорилари ишлаб чиқарувчиси ҳисобланмиш Жанубий Корея, ғарб давлатларининг қурол-яроғ етказиб бериш бўйича босими кучайганига қарамай, Россияда фаолият юритаётган компаниялари ва Москванинг Шимолий Кореяга таъсири туфайли Россия билан зиддиятдан қочишга ҳаракат қилди.
Россия кучлари Бахмут шаҳрига ҳужумларни кучайтирмоқда
Украина чегара хизмати Бахмутда рус қўшинларига қарши жанг қилаётган украин ҳарбийлари акс этган кадрларни намойиш қилди.
Рейтерс кадрлардаги бинолар сунъий йўлдош тасвирлари билан мослигини тасдиқлашга муваффақ бўлди. Бироқ, видео тасвирга олинган санани мустақил равишда тасдиқлай олмади.
Агар рус қўшинлари Бахмутни қўлга киритса, Донецк вилоятидаги икки йирик шаҳар - Краматорск ва Словянск томон олдинга силжиш учун имкон бўлади.
Уруш сарсон қилган Саша
12 ёшли Саша урушдан олдин ойиси ва синглиси билан Мариуполда яшарди. Болакай уларни кўрмаганига бир йил бўляпти. Қаерда эканликларини ҳам билмайди.
Россия фильтрация лагерида она-болаларни бир-бирларидан айиришган. Сашанинг ўша тинч ҳаётдан қолган ягона нарсаси – бувисининг “Инстаграм” саҳифасидаги оилавий фотосуратлар.
“Кўзимга ўқ парчаси кириб, Ильич заводи госпиталида ётганимда асирга олиб, аллақаерга олиб боришди. Қанақадир ангарга келдик, совуқ эди. Ҳаммамизни тинтишди. Кейин ойимни икки соат сўроққа тутишди. Шундан сўнг Болалар ишлари деган хизмат ходимлари келиб, мени ойимдан тортиб олишди. Хайрлашгани ҳам қўймадилар”, дейди Саша.
Болакай Россия оккупация қилган Донецк шаҳридаги касалхонага жўнатилади. У ерда Саша палатадошидан телефон сўраб олиб, Черниговда яшовчи бувиси Люда холага қўнғироқ қилади. Аёл қизи ва набираларини дараклаб юрган эди.
Люда хола қўлида набираларининг ҳужжатлари бўлмагани учун каловланиб қолади. Икки ой югуриб-елиб зарур қоғозларни йиғади, васийлик ҳужжатларини тайёрлайди. Сўнгра, одамлар “душман қўлидаги ҳудудга борма” дея огоҳлантиришганига қулоқ солмай, набирасини олиш учун Донецкка равона бўлади.
“Бир неча юз чақирим Донецкка бориш учун бешта мамлакатдан ўтдим, беш минг километр йўл босдим. Касалхонани бир амаллаб топдим. Роса тихирлик қилишди, албатта. “Сизларда уруш бўляпти-ку, отишяпти-ку”, дейди биттаси. Нима бўпти? Менинг болам сенларга нима керак, дедим. Ахийри беришди. Бормасам, интернатга топшириб юборишарди. Аммо вақтида операция қилинмагани учун болагинамнинг бир кўзи ожиз бўлиб қолгани чакки бўлди”, дейди Люда
Люда холанинг қизи, Сашанинг ойиси Снежана Козлова асирлар рўйхатида қайд қилинган, лекин қаерда сақланаётгани номаълум. Ўтган бир йилдан у ва жажжи Викадан дом-дарак бўлмади.
Юртига қайтган релокантлар
Россия армияси Украина тупроқларига бостириб кирган 2022 йил 24 февраль санасидан бери юз минглаб россияликлар ўз юртини тарк этишди. Кимдир сафарбарликдан қочди, кимдир ишидан айрилмаслик учун кетди, яна кимлардир шунчаки ён қўшниси билан уруш қилаётган мамлакатда яшашни хоҳламади.
Кетганларнинг аниқ сони маълум эмас: уларнинг аксари Россиянинг чет элдаги консулликларида қайддан ўтишмайди ва бир мамлакатда узоқ қолишмайди, бинобарин, у ерда яшаш рухсатномасини олишмайди.
Константин Пермь шаҳрида яшайди. Касби – дизайнер. У урушни қоралайди, бироқ Россияни кузда – Путин сафарбарлик эълон қилиб, фронтга жўнатилиш хавфи пайдо бўлганидагина тарк этган. Константин қўшни Қозоғистонга жўнади: ижарага уй олди, банкда карта очтирди. Лекин бир неча ой ўтгач Пермга қайтишга қарор қилди.
“Ота-онам кексайиб қолишган, уларга қаров керак. Кетсам бўлади, албатта. Аммо ҳамиша улардан алағда бўлиб, яхши юришганмикан, ҳолларидан биров хабар олдимикан, дея қийналиб юришни истамайман. Сафарбарлик эълон қилинганида бу босқинчиликда қатнашишни, бетайин ғояларни деб ўзга юртга урушга жўнашни хоҳламаганларнинг бари Россияни тарк этди. Жумладан мен ҳам, – дея ҳикоя қилади Константин. – Ўз давлатимиздан, ҳукуматимиздан нимани кутишни билмаймиз: шунақа мураккаб пайтларда оғир қарор қабул қилишга мажбур бўламиз. Лекин мен биринчи галда сафарбар қилинадиганлар сирасига кирмасам керак, чунки десант қўшинларида хизмат қилмаганман, жанговар тажрибам ҳам йўқ”, дейди Константин.