“Катта еттилик гуруҳи” Россиянинг Беларусдаги ҳаракатини қоралади
“Катта еттилик гуруҳи” вазирлари Хитойнинг Тайванга босимини ва Россиянинг Беларусда ядро қуролини жойлаштираётганини танқид қилди.
«Афсуски, Россиянинг босқини давом этмоқда. Бунга имкон қадар тезроқ барҳам бериш учун, БМТ Бош Ассамблеясида 140 дан ортиқ давлат овоз берган резолюцияда кўрсатилганидек, Россия ўз қўшинларини зудлик билан Украинадан олиб чиқиб кетиши керак. Шунингдек, ўзини ноқонуний босқиндан ҳимоя қилаётган Украинани қўллаб-қувватлаш ва Россияга қарши санкцияларни давом эттириш муҳим деб ҳисоблаймиз», деди Япония ташқи ишлар вазири Ёшимаса Хаяши.
Россиянинг Украинага босқини ва Хитойнинг Тайванга қарши шунга ўхшаш ҳаракатларидан хавотирлар 3 кунлик учрашувнинг диққат марказида бўлади.
АҚШ Давлат котиби Энтони Блинкен Россия Украина донига муҳтож давлатларга берган ваъдаларини бузмоқда, деб баёнот берди.
Блинкен Япониянинг Каруизава шаҳрида бўлиб ўтган ”Катта еттилик” гуруҳи ташқи ишлар вазирлари йиғилишидан сўнг интервью берди:
“Сўнгги бир неча кун ичида Украинадан бирорта ҳам кема чиқмади, Дон ортиш учун келган 50 дан ортиқ кемалар эса Украинага киритилмаяпти. Дунё бўйлаб бир қанча мамлакатлар бу донга муҳтож. Россия яна Украина ғалласининг дунё давлатларига етиб боришига тўсқинлик қилиб, озиқ-овқат нархини ошишига сабаб бўлмоқда. Сўнгги бир неча кун ичида Украинадан бирорта ҳам кема чиқмади, юк ортиш учун келган 50 дан ортиқ кемаларнинг киришига тўсиқ қўйилди. Дунё бўйлаб бир қанча мамлакатлар бу донга муҳтож. Россия уларга берган ваъдаларини бузмоқда".
Москвада ҳарбий хизматга чақирув учун видеокузатув мосламаларини қўлланмоқда
Москвада ҳарбий хизматга чақириладиганлар яшаш манзилини аниқлашда видеокузатув тизими қўлланмоқда.
“Чақириқ ёшидаги шахсларнинг яшаш манзиллари Москва шаҳри видеокузатув тизими орқали аниқланмоқда, шаҳар мэри фармойишига мувофиқ, ҳарбий хизматга чақириладиганлар ишлайдиган корхона-ташкилотлар ҳарбий комиссариатга улар ҳақида маълумот беряпти”, дейдм шаҳар ҳарбий комиссари Максим Локтев ТАСС агентлигига.
Комиссарга кўра, россияликлар ҳарбий комиссариатга бормаётганининг асосий сабаби – кўпчилик ўзи рўйхатдан ўтган манзилда яшамаслиги билан боғлиқ бўлиб, натижада уларга чақирув қоғозини топшириш имкони бўлмаётир. Яъни, баёнотларга кўра, расмийлар фуқароларнинг бу урушга бормаслик истагини инобатга олмаётир.
Ҳарбий комиссарга кўра, баҳорги кампания доирасида 5 мингдан зиёд киши ҳарбий хизматга чақирилади.
Иркутск яқинида Украинада ўлган аскарларнинг янги мозори топилди
Гап Иркутск шаҳри яқинидаги “Вагнер” ХҲШ ва Россия ҳарбийларининг қабрлари ҳақида бормоқда, лекин улардан бир туркуми аввал жамоатчиликка маълум эмасди, деб ёзади “Люди Байкала” нашри.
Барча қабрлар шаҳардан 11 чақирим нарида жойлашган Александр қабристонида жойлашган.
Улардан 13 таси ҳарбийлар ва кўнгиллилар дафн қилинадиган “Қаҳрамонлар хиёбони”да бўлса, “Вагнер” ХҲШнинг 53 нафар ёлланма аскари кўмилган 53 та янги гўр – қабристоннинг нариги чеккасида, дея хабар қилишмоқда журналистлар.
Мақолада айтилишича, ўтган йили кузда қабристон теварагидаги ўрмоннинг бир қисми кесилиб, янги қабрларга жой ҳозирланган экан, аммо журналистлар бундан яқинда хабар топишган.
Ўлганларнинг 43 нафари маҳкумлар бўлгани айтилмоқда: улардан 17 нафари одам ўлдиргани учун, қолганлари эса ўғирлик ва наркотикка доир ишлар бўйича қамалган. Журналистлар 10 кишининг судланганини тасдиқлай олмаганлар.
Президент Путин Херсон ва Луганск вилоятларига борди
Луганск ўққа тутиларкан, Кремль Владимир Путиннинг қисман Россия назоратида бўлган Луганск ва Херсонга борганини хабар қилди.
Ҳозирча Кремль эълон қилган кадрларни мустақил равишда тасдиқлашнинг имкони бўлмади.
Путин Херсон вилоятидаги штабда ҳаво-десант кучлари ва «Днепр» армия гуруҳи қўмондонлари ҳамда бошқа юқори мартабали офицерлардан Херсон ва Запорожедаги вазият борасидаги ҳисоботларини тинглаган.
Хабарларга кўра, Россия қўшинлари Украинанинг қарши ҳужуми олдидан Днепр дарёси қирғоғидаги позицияларини мустаҳкамламоқда.
Украина ҚК Бош штабининг кундалик ҳисоботида айтилишича, Украина ҳарбийлари ўтган 24 соат ичида Бахмут ва Маринкада душманнинг 70 дан ортиқ ҳужумини қайтарган.
Қўшни Луганск вилоятининг ўққа тутилиши оқибатида бир неча тинч аҳоли вакили ҳалок бўлди ва инфратузилмага жиддий зарар етди, дея хабар берди минтақа расмийлари.
Озодлик уруш шароитида томонлар бераётган маълумотларни мутстақил манбалардаг тезкор текшириш имконига эга эмас.