Одессада бўрондан 5 киши ҳалок бўлди
Украина президенти Одесса вилоятида кучли қор бўронида қурбонлар борлигини маълум қилди.
"17 та вилоятда деярли 1500 та аҳоли пункти электр энергиясидан узилди. Энергетиклар ҳамма жойда электр таъминотини тиклаш устида ишламоқда. Тез орада ҳар бир шаҳар ва қишлоқда электр таъминоти тикланади. Давлат Фавқулодда вазиятлар хизмати кечаю кундуз ишламоқда. Миллий полиция ва Миллий гвардия ҳам ёрдам бермоқда. Ҳар бир ҳудудда об-ҳаво шароити туфайли қурбонлар бўлмаслиги учун барча имкониятларни ишга солиш зарур. Афсуски, айни дамда қурбонлар бор. Энг кўп Одесса вилоятида - беш киши ҳалок бўлди. Оила ва яқинларига ҳамдардлик билдираман. Камида 19 киши жароҳат олди", деди Зеленский.
Украина Фавқулодда вазиятлар хизмати одамларни тоғли ҳудудларга саёҳат қилишдан тийилишга чақирди.
Кучли қор бўрони Украинага қимматга тушди
Минглаб енгил ва юк машиналари қор кўчкиси остида, юзлаб аҳоли пунктлари электр энергиясиз қолди, ўндан ортиқ йўллар тўсиб қўйилди. Бир неча кишининг жасади топилгани айтилмоқда.
Фавқулодда хизматлар маълумотларига кўра, сув тошқинини бартараф этишга 1200 дан ортиқ қутқарувчи жалб қилинган. Украина ички ишлар вазирига кўра, мамлакатнинг жанубий ва марказий қисмлари энг кўп зарар кўрган.
Айни пайтда ўн минглаб қўшинлар Россия билан урушнинг олдинги сафларида қолмоқда.
Украина ҳарбийларининг тахминларича, Москва жорий қишда Украинанинг энергетика тизимига ҳужумни кучайтиради ва мамлакатни совуқ билан енгишга ҳаракат қилади.
Расмийларнинг айтишича, Россия назорати остидаги Қримда ярим миллионга яқин одам электрсиз қолган.
Россия томонидан тайинланган ҳукумат душанба куни фавқулодда ҳолат эълон қилди ва бир киши ҳалок бўлгани, ўн киши яралангани ва юзлаб одамлар эвакуация қилинганини маълум қилди.
Ўтган кун: ҳарбий ҳисобот
Украина Қуролли кучлари Бош штабининг 28 ноябр куни эрталабки ҳисоботига кўра, сўнгги 24 соат ичида фронтда 84 та ҳарбий тўқнашув содир бўлган. Россия қўшинлари Донецк вилоятидаги Авдеевкага ҳужум қилишда давом этмоқда ва сўнгги кунларда улар у ердаги саноат зонасининг бир қисмини эгаллашга муваффақ бўлишгани ҳақида хабарлар пайдо бўлди.
Украина Қуролли кучларининг Таврида гуруҳи вакили Александр Штупуннинг сўзларига кўра, рус қўшинлари Авдеевка яқинида 10-20 кишидан иборат кичик гуруҳларда ҳужумларни олти йўналишда олға сурмоқда. Энг шиддатли жанглар кокскимё заводида кечмоқда, деди Штупун.
Украина томони Россиянинг Лимандаги 12 та, Бахмут йўналишидаги 28та ҳужумини қайтарганини хабар қилмоқда. краина жанубида – Запорожье вилоятидаги Работин ва Новопрокоповка ҳудудларида жанглар давом этмоқда.
Россия Мудофаа вазирлиги, ўз навбатида, Украина Қуролли Кучларининг Купянский, Лиманский ва Запорожье йўналишларидаги олтита, шунингдек, Донбассдаги Клешчеевка ва Белогоровка ҳудудларидаги ҳужумини қайтарганини маълум қилди.
Ҳарбий ҳаракатлар шароитида урушаётган томонларнинг маълумотларини мустақил манбалардан тасдиқлаш имкони йўқлигини эслатиб қўймоқчиман.
Британия Мудофаа вазирлиги: Сўнгги олти ҳафта ичида урушда рус ҳарбийлари орасида энг кўп қурбон бўлгани қайд этилди
Сўнгги олти ҳафта ичида Россия, эҳтимол, кенг кўламли урушда рус ҳарбийлари орасида энг кўп қурбон бўлганини қайд этди. Бу ҳақда Британия Мудофаа вазирлигининг кундалик разведка ҳисоботида айтилади.
Ҳисобот Украина Қуролли кучлари Бош штаби маълумотларига асосланган. Муаллифларнинг таъкидлашича, улар Украина армиясининг методологиясини тасдиқлай олмайдилар, аммо "агар биз ҳалок бўлганлар ва ярадорларнинг умумий сонини олсак, бу қийматлар тўғри келади".
Украина Қуролли кучлари маълумотларига кўра, сўнгги бир ярим ой ичида Россия томони кунига ўртача 931 кишини йўқотган. Бу, эҳтимол, бутун уруш давомидаги энг юқори кўрсаткичдир. Бунгача Россия учун “энг ҳалокатли ой” 2023 йил марти бўлган. Кейинчалик рус қўшинлари Бахмутга яқинлашди ва кунига ўртача 776 кишини йўқота бошлади. Буюк Британия Мудофаа вазирлигига кўра, ҳозирги оғир йўқотишлар Россиянинг Авдеевкага ҳужуми билан боғлиқ.