Нежин шаҳрида Украина Ҳимоячилари – Қаҳрамонлар мемориалини яратиш давом этмоқда
Бу ҳақда “Интерфакс-Украина” агентлигига ички ишлар вазирининг собиқ маслаҳатчиси Антон Герашченко маълум қилди.
Мемориал ўртасига Украина қаҳрамони, Нежинда туғилган Александр Мациевскийнинг бронза ҳайкали ўрнатилади. У ўлимга тик боққанча “Украинага шон-шарафлар!” дея хитоб қилиб, рус аскарлари ўқларидан ҳалок бўлган эди.
“Украинлар асрлар давомида шу сўзлар билан Ватан ҳимоясига отланганлар, бутун маданий дунё бу сўзларни Россия террорига қарши мардона кураш рамзи деб билади. Александр Мациевский қиёфаси озод ва мустақил Украина мудофааси учун оёққа қалққан барча эркак ва аёллар жасоратининг рамзи бўлади”, дея урғулади Герашченко.
Украина Қора денгизда ғалла ташувчи кемаларини қўриқлаш учун ҳарбий кемалар олади
Бу ҳақда президент Владимир Зеленский Швейцария, Латвия президентлари ҳамда Литва бош вазири билан Киевда ўтказилган қўшма матбуот анжуманида маълум қилди.
Зеленскийга кўра, Украина Россия иштирокисиз очилган “ғалла йўлаги”ни ўзининг жорий йилдаги энг катта ютуқларидан бири деб ҳисоблайди.
“Биз денгиздаги кемаларимиз хавфсизлигини таъминлаш учун уларга кузатувчи кемалар бириктиришга қарор қилдик. Аниқ келишувлар бор. Масала яқин истиқболда ҳал бўлади”, дея Зеленскийдан иқтибос келтиради РБК-Украина.
Шу йилнинг июлида Россия “ғалла битими”дан чиққанини эълон қилган эди. Айни чоғда Россия қўшинлари Украина портлари ва ғалла инфратузилмасини ўққа тутишга киришди.
Шундан сўнг Украина Россия билан бирон келишувсиз ғалла экспортини тиклашга қарор қилди.
Россия “ғалла йўлаги” ишлашига халал беришга уринмоқда. Хусусан, йўлак яқинидаги ҳудудларга вақти-вақти билан авиабомбалар ташлаяпти.
Ғалла экспортини ҳимоя қилиш учун Украинага кўпроқ ҲҲМ воситалари керак – Зеленский
Ғалла экспорти йўналишларини, шунингдек Россия чегарасига туташ ҳудудларини муҳофаза қилиш учун Украинага кўпроқ ҲҲМ воситалари зарур, деди президент Владимир Зеленский шанба (25 ноябр) куни Киевда бўлиб ўтган озиқ-овқат хавфсизлиги бўйича халқаро саммитда сўзлаган нутқида.
“Киевда ҲҲМ воситалари етишмаслиги сир эмас. Аммо айрим шаҳарларимизда ҲҲМ билан боғлиқ жиддий муаммолар бор.
Қаерда қандай ишлар қилаётганимизни батафсил айта олмайману лекин яхши натижалар бор. Биз ҳамкорларимизга ва ўзимизга умид боғлаганмиз. Гап ҲҲМ тизимини кучайтириш ҳақида бормоқда”, деган у.
Зеленскийнинг ушбу сўзларидан бир кеча олдин Россия Украинага 75 та дрон билан ҳужум қилган ва бу бутун уруш мобайнидаги энг йирик дронлар ҳужуми бўлган эди.
Уч мамлакат лидерларининг қўшма матбуот анжумани чоғида ҳам ҳаво тревогаси сиренаси чалиниб турди.
Зеленскийга кўра, хорижий ҳамкорлар Украина портларидан йўлга чиқадиган юк кемалари карвонини қўриқлаш учун Киевга ҳарбий кемалар беришади.
Июл ойида Россия “ғалла битими”дан чиққанидан сўнг Украина ўз дон маҳсулотларини Қора денгиздаги бир томонлама йўлак орқали экспорт қилиб келмоқда.
Зеленский Украинада Голодомор қатағонининг 90 йиллиги муносабати билан нутқ сўзлади
Украина раҳбарлари мамлакатдаги энг даҳшатли фожиа - 1932-33 йилларда рўй берган очарчилик қурбонлари хотирасини ёд этди. Очарчиликда бир неча миллион одам ҳалок бўлган.
Владимир Зеленский Россиянинг Украинага нисбатан ўша пайтдаги ва ҳозирги муносабати ўхшаш эканини таъкидлади:
"Ҳамма ўзини СССРнинг вориси деб атайдиган замонавий Россия нималарга қодирлигини реал вақтда кўрди. Бу мамлакат ўша даврнинг энг даҳшатли жиноятлари ва қотилликларининг меросхўри бўлишдан завқланади. Ёвузлик тўхтатилмади. Энди биз уни тўхтатяпмиз. Ҳозир қотилларга эргашишни танлаган, аввалгидек ҳаракат қилганлар учун тарихий масъулият даври”.
Украина Голодомор очарчилигини ҳар йили ноябрь ойининг тўртинчи шанбасида ёд этади ва уни геноцид деб атайди. Украинанинг бу позициясини 30 та давлат қўллаб-қувватлаган. Совет Иттифоқи 1932-33 йилларда Украинанинг мустақиллик ҳаракатларини бостириш мақсадида миллионлаб одамларни очарчилик домига солган.
Москва бу қасддан ўтказилгани ва геноцид сиёсати сабаб бўлганини рад этади ҳамда очарчиликдан руслар ва бошқа этник гуруҳлар ҳам жабр кўрганини иддао қилиб келади.