Милош Земан: Владимир Путинга дўстона муносабатим энг катта хато эди
Чехиянинг собиқ президенти Милош Земан Владимир Путинга дўстона муносабатини ўз сиёсий фаолиятидаги энг катта хато деб атади. Сиёсатчи Чехиянинг Nova телеканали билан интервьюда шу ҳақда сўз очди.
“Менинг энг катта хатойим Владимир Путин хусусида буткул адашганимдир, чунки фақат ақлсиз одамгина Украинага бостириб киришдек фожеий хатога йўл қўйиши мумкин”, деди Земан
Собиқ президент, шунингдек, мазкур босқин нафақат Украинага, балки Россиянинг ўзига ҳам зарар етказганини урғулади.
Земан Россияга хайрихоҳлиги билан танилган бўлиб, уни Путиннинг дўсти деб аташарди. 2015 йил майда у, бошқа Ғарб мамлакатлари лидерларидан фарқли ўлароқ Москвага Ғалаба парадига келган ва Путин билан учрашган. 2017 йилнинг октябрида эса у Россия билан Украина ўртасида мулоқот ўрнатишини, эҳтимол, Қрим аннексияси учун Украинага қандайдир молиявий товон тўланиши мумкинлигини айтган.
Бироқ Россия қўшинлари Украинага бостириб кирганидан сўнг Земан Россия агрессиясини қоралаб, Кремлни ўйлаб иш қилишга чақирган. У, шунингдек, Россияни SWIFT тизимидан узишни таклиф этган ва “Россия уруш бошламайди, чунки руслар аҳмоқ эмас”, деб ўйлаб адашганини тан олган.
Россия Европадаги оддий қуролли кучлар тўғрисида шартномадан чиққанини эълон қилди
7 ноябрга ўтар кечаси Россия Европадаги оддий қуролли кучлар тўғрисида шартнома (ЕОҚКтШ)дан чиқиш тартиб-таомилларини якунлади. Шартноманинг амал қилиши 2007 йилдаёқ вақтинча тўхтатилган эди, шу боис Россия ТИВ баёнотида “энди у биз учун узил-кесил тарихга айланди”, дейилади.
Унинг асослантириш қисмида 90-йиллар бошларидан “шартнома кенг кўламли ҳарбий-сиёсий ўзгаришлар, энг аввало НАТОни кенгайтириш ҳаракатлари таъсирида кўп жиҳатдан эскириб, воқелик билан алоқаси йўқотгани” ҳақида сўз боради.
16 май куни депутатлар президент таклифини бир овоздан қўллаб-қувватлашди. 24 майда эса Федерация Кенгаши ҳам шартномани денонсация қилишни маъқуллади.
ЕОҚКтШ 1990 йили Парижда НАТОга аъзо 16 мамлакат ҳамда Варшава шартномаси ташкилотининг 6 мамлакати вакиллари томонидан имзоланган эди. Шартномада унга қўшилган давлатларнинг жанговар танклари, зирҳли машиналари, артиллерия қуроллари, зарбдор учоқ ва вертолётлари сонига чеклов жорий этиш назарда тутилган.
2007 йилда президент Владимир Путин токи НАТО мамлакатлари томонидан ратификация қилингунча шартноманинг ва унга алоқадор халқаро ҳужжатларнинг амал қилишини тўхтатиб туриш ҳақида фармон имзолаган.
Украина президенти Владимир Зеленский “ҳозир сайлов ўтказадиган вақт эмас”лигини билдирди
Украина президенти Владимир Зеленский 6 ноябрь оқшомидаги кундалик мурожаатида “ҳозир сайлов ўтказадиган вақт эмас”лигини билдирди.
“Менимча, ҳозирда сайловларни ўтказиш ўринсиз. Ҳаммамиз ҳозир кўплаб хавфлар бўлган уруш вақти эканини ва сайлов мавзусини жамиятга ташлаш мутлақо масъулиятсизлик эканини тушунамиз. Давлатда Украинага қарши четдан ўйин қилиш ва зиддият чиқариш учун майдон қолмаслиги учун нуқта қўйишга ва жамиятнинг барча зарур жавобларни беришга қодир тузилмалар мавжуд”, деди Владимир Зеленский.
Украина Қуролли кучларининг муваффақиятсиз қарши ҳужуми ҳамда қатор собиқ сафдошлари ва ҳарбийларнинг Зеленскийдан норозилиги кучайиб бораётгани манзарасида 2024 йилда президент ва парламент сайловлари бўлиб ўтиши мумкинлиги мавзуси сўнгги пайтларда Украина ва Ғарб матбуотида фаол муҳокама қилинмоқда.
Ўзининг сайловолди кампанияси бошлангани ҳақида, жумладан, Украина президенти офисининг собиқ маслаҳатчиси Алексей Арестович маълум қилган.
“Президент сайловини кўчиришга ҳар қандай уриниш Украина жамиятида ёки унинг қай бир қисмида ҳокимиятни узурпация қилиниши ўлароқ ҳисобланади”, дея билдирган аввалроқ Зеленскийни “диктатор” деб атаган Арестович.
Украина президентининг ваколатлари 2024 йилнинг май ойида тугайди. Зеленскийнинг ўзи ўтган ҳафтада, уруш ҳаракатлари давом этаётганига қарамай, сайлов ўтказиш воқеалар ривожининг эҳтимолий варианти эканини айтган эди.
Руслар кемасига украин ракетаси зарбаси видеоси
Интернетда аннексия қилинган Қримдаги Керчдаги “Залив” кемасозлик заводига 4-ноябр куни Украинанинг ракета ҳужуми натижасида Россиянинг "Асколд" корвети кўрган зарар даражасини баҳолаш имконини берувчи фотосурат пайдо бўлди.
Суратга кўра, SCALP қанотли ракеталари (Британия Storm Shadow ракеталарининг французча версияси) Калибр ва Оникс қанотли ракеталарини учиришга қодир саккизта вертикал учириш мосламаси жойлашган Асколднинг марказий қисмига келиб тушган ва Корветнинг асосий қурол тизимини йўқ қилган.
Шунингдек, ракеталар Асколд кемасига урилган лаҳзани акс эттирувчи видео ҳам пайдо бўлди.
Аввалроқ “Озодлик” радиоси Украина хизматининг “Схемалар” лойиҳаси ракета зарбасидан сўнг Керчдаги заводнинг сунъий йўлдошдан олинган суратларини эълон қилган эди.
"Асколд" - "Қоракурт" типидаги кичик ракета кемаси бўлиб, у 8 тагача "Калибр" ракеталарини олиб юриши мумкин.
“Залив” заводи Шарқий Европадаги Россия денгиз флотининг ҳарбий фрегатларини қурувчи энг йирик кемасозлик корхоналаридан бири ҳисобланади.