Ҳаагада Россия устидан Халқаро Суд маҳкамаси бошланди
18—27 сентябр кунлари Ҳаагадаги Халқаро судда Украинанинг Россияга геноцид жиноятини олдини олиш ва жазолаш тўғрисидаги халқаро Конвенцияни бузганликда айбланган даъвоси бўйича дастлабки маҳкама бўлиб ўтади.
Украина 2022 йилнинг 27 февралида Россия ҳарбий босқинининг бошланишидан уч кун ўтиб судга мурожаат қилган. Суд аввалроқ 32 давлат Украина даъвосига қўшилиш ҳуқуқига эга деб қарор қилган эди.
Дастлабки эшитувлар давомида Россия томони Халқаро суднинг иш бўйича юрисдикцияга эга эмаслигини исботлаши кутилмоқда.
Геннадий Кузмин, Россия Федерацияси Ташқи ишлар вазирлигининг махсус топшириқлар бўйича элчиси бундай деди:
"Украинанинг даъволари мувофиқлик тўғрисида тескари декларацияни талаб қилади ва шунинг учун қабул қилиб бўлмайдиган ва биз тақдимотни бу залдаги барчага Украинанинг ўзи даъволари ва унинг ушбу жараёнлардаги тактикаси адолатли суд жараёнига аниқ эътиборсизлик эканлиги аён бўлади ва жараённи суиистеъмол қилишдир, дея якунлаймиз."
Украина томони Россиянинг Украинага қарши ҳаракатларида геноцид белгилари бор, деб ҳисоблайди. Далиллардан бири болаларни Украинадан мажбуран олиб чиқишдир - бунга алоқадорликда гумон қилиниб, Владимир Путинни ҳибсга олишга ордер аввалроқ Гаагадаги Халқаро жиноят суди томонидан чиқарилган эди.
Ҳаагадаги Халқаро суд Украинанинг Россияга қарши яна бир даъвосини кўриб чиқмоқда. Даъво Украина томонидан 2017 йилда Россиянинг Қримни аннексия қилиши ва Донбассдаги қуролли ҳаракатлари муносабати билан қўзғатилган.
Маша ва унинг боғчаси
Бу қизалоқнинг исми Маша. У ўзининг рус босқинчилари ташрифидан кейин ўзининг вайрон бўлган боғчасини кўриб йиғламоқда.
У ота-онасидан машинани тўхтатиб, боғчасини кўриб кетишни сўрайди.
Тожик муҳожирлари террорчиликда айбланмоқда
Екатеринбург ҳарбий апелляция суди Тожикистондан меҳнат муҳожирларига нисбатан терроризм ва портловчи моддалар ишлаб чиқариш бўйича ишни кўриб чиқмоқда. Бу ҳақда муҳожирларга ёрдам бераётган ҳуқуқ ҳимоячиси Валентина Чупикнинг Озодликка билдиришича, айбланувчиларнинг ҳаммасини қийноқларга солинган, бошларига қоп кийдирилган, калтакланган ва қўрқитилган.
Гумонланувчи муҳожир йигитлар иш сохталаштирилганини айтмоқда. Улардан бирининг амакиси Азизмурод Азизовичнинг сўзларига кўра, терговчилар гумонланувчиларга уларнинг кўрсатмаларини бузиб кўрсатувчи таржимонини алмаштиришга рухсат бермаган, суд эса гувоҳларни чақиришни рад этади.
Иш материалларидан маълум бўлишича, Сангимурод Мусофиров, Абубакр Санжаров, Шахромжон Мусофиров, Нурали Дўстов ва Ашваршоҳ Авезовлар олдиндан тил бириктириб бир гуруҳ шахслар томонидан портловчи моддаларни ноқонуний ишлаб чиқариш ва сақлаш, террорчилик жамиятида иштирок этиш ва террорчилик ҳужумини тайёрлашда айбланган. Жиноий иш турли ҳудудларда мигрантларга нисбатан тез-тез содир бўлаётган рейдлар фонида кўриб чиқилмоқда.
Россия расмийлари ҳозирда Украина жабҳасида кадрлар танқислигини тўлдириш учун мигрантлардан фойдаланишга ҳаракат қилмоқда. Хизматлари учун уларга имтиёзлар ва фуқароликни соддалаштирилган тарзда олиш ваъда қилинган, армиядан қочиш учун эса Россия фуқаролигидан маҳрум қилиш билан таҳдид қилинган.
Шимолий Корея етакчиси Ким Чен Иннинг Россияга ташрифи 18 сентябрь куни якунланди
Ким Владивостокда Россия мудофаа вазири Сергей Шойгудан совға сифатида мўйнали қалпоқ олди.
КРТ давлат телерадиокомпанияси мамлакат раҳбари Россиянинг ядровий бомбардимончи самолётларини, гипертовушли ракеталар билан жиҳозланган қирувчи самолётларни ҳамда ҳарбий кемани кўздан кечираётганини намойиш қилди. Приморск вилояти губернатори Олег Кожемяко Кимга ҳужум операциялари учун мўлжалланган замонавий, енгил зирҳли нимча совға қилди.
Кимга, шунингдек, бешта бир томонлама ҳужумкор дрон ва Украинадаги урушда кенг қўлланилаётган «Геран-25» разведкачи дронлар ҳам совға қилинди, дея хабар берди «ТАСС» агентлиги.
Бу БМТнинг Шимолий Корея ракета ва ядро фаолиятига қарши қабул қилинган камида иккита қоидасига зиддир. Россия ҳам БМТ Хавфсизлик Кенгашининг Шимолий Кореяга қарши резолюцияларини маъқуллаб овоз берган.