Владимир Зеленский: Украина Владимир Путинга “танаффус” бера олмайди
Украина президенти Владимир Зеленский Украина Владимир Путинга “танаффус” бера олмаслигини айтди ва дунёни учинчи жаҳон урушининг олдини олиш учун Россия президентига қарши туришга чақирди.
АҚШнинг CBS телерадиокомпаниясига берган интервюсида, ўз мамлакатига босқинчи рус қўшинларини қувиб чиқариш учун давом этаётган қарши ҳужумда ёрдам бериш учун қўшимча қурол сўраш учун АҚШга кетаётгани, Ғарбнинг ҳарбий ёрдами Украинанинг ҳудудий яхлитлигини тиклаш учун муҳим эканлигини айтди.
“Биз имкон қадар ҳудудимизни озод қилишимиз ва олдинга интилишимиз керак. Бир километр ёки юз метрдан кам бўлса ҳам, биз буни қилишимиз керак. Зирҳли машиналар юра олмайдиган жойда биз учамиз. Агар уча олмасак, дронларни жўнатайлик. Биз Путинга дам бермаслигимиз керак”, деди Зеленский.
Зеленский 19 сентябр куни Ню-Йоркдаги БМТ Бош Ассамблеясида нутқ сўзлаши кутилмоқда.
Москва вилояти, Тула, Орлов ва Қримга дронлар ҳужум қилди
17 сентябрга ўтар кечаси Россия ҲҲМ тизимлари Москвага учаётган бир нечта дронни уриб туширди. Бу ҳақда Россия Мудофаа вазирлиги ҳамда Москва мэри Сергей Собянин маълум қилмоқда. Собянинга кўра, дронлар бири Истра туманида, яна бири Раменскоеда қулаган.
“Дрон парчалари тушган жойларда жабрланганлар ва вайронагарчиликлар йўқ”, дея қайд этган Москва мэри.
Пойтахтнинг Шереметьево, Домодедово ҳамда Внуково аэропортларида “Ковёр” режасиэълон қилиниб, 6 рейс бекор қилинган, 30 дан ортиқ рейс кечиктирилган.
Яна бир дрон Орёл шаҳри ҳудудига тушиб, ёқилғи резервуарида ёнғин чиқаргани айтилмоқда.
Вилоят губернатори Андрей Кличков дрон шаҳарнинг Железнодорожний туманидаги “нотурар-жой объекти қулаган”ини билдирди.
Shot телеграм-канали эса учувчи аппарат маҳаллий нефт базаси ҳудудига тушиб, битта ёқилғи резервуарини шикастлагани ҳақида ёзди.
Кейинроқ Кличков ушбу маълумотни тасдиқлаб, ҳужум натижасида ҳеч ким жабрланмаганини, резервуардаги очиқ ёнғин эрталабгача ўчирилганини қўшимча қилди.
Яна бир дрон Тула яқинида уриб туширилгани ҳақида Тула вилояти ҳудудий хавфсизлик вазирлиги маълум қилди.
Baza телеграм-каналига кўра, дрон Узловск туманидаги 1-сонли логистика маркази ҳудудидаги резервуарларга ҳужум қилмоқчи бўлган, бироқ аппарат радиоэлектрон кураш воситалари ёрдамида ишдан чиқарилиб, ерга қулаган. Маҳаллий маъмурият ҳеч ким жабрланмаганини урғуламоқда.
“Инфратузилмага жиддий зарар етмади”, дея қўшимча қилган Тула вилояти ҳудудий хавфсизлик вазирлиги.
Шунингдек, Россия Мудофаа вазирлиги хабарномасига кўра, аннексия қилинган Қримнинг ғарбий, шимоли-ғарбий ва шарқий соҳилларида олти дрон уриб туширилган.
Икки юк кемаси Украинанинг Қора денгиздаги Черноморск портига етиб келди
Бу кемалар Африка ва Осиё бозорларига дон олиб кетиш учун вақтинчалик йўлак орқали Украина портларига йўл олган эди, дея маълум қилди Украина ҳукуматининг юқори мартабали амалдори Рейтерс агентлигига.
Россия дон битимидан чиққанидан сўнг, Украина уруш бошидан бери ўз портларида қолиб кетган кемаларни чиқариб юбориш ва дон экспортини йўлга қўйиш учун Қора денгизда «гуманитар коридор» очганини эълон қилди.
Украина Бош вазир ўринбосари Александр Кубраковнинг айтишича, «Resilent Africa» ва «Ароят» юк ташувчи кемалари Африка ва Осиёга 20 минг тонна буғдой етказиш учун Украина портларига етиб келган.
Украина қўшинлари Бахмут жанубидаги яна бир қишлоқни қайтариб олди
Украина ҳарбийлари Бахмут жанубидаги Андреевка қишлоғи бўйлаб кетаётгани акс этган видеони эълон қилди.
Рейтерс агентлиги видео жойлашуви ва санасини мустақил равишда тасдиқлай олмади.
Украина Андреевка қишлоғини қайтариб олгани, бир неча ойлик шиддатли жанглардан сўнг вайрон бўлган Бахмут шаҳрининг жанубий қанотида янада илгарилаш учун замин яратганини айтди.
Уч ойдирки давом этаётган қарши ҳужумда Украина Россиянинг мустаҳкамланган позициялари сари секин илдамламоқда.
Украин қўшинлари бир қатор қишлоқларни эгаллаб, Бахмут қанотлари бўйлаб олдинга силжигани ҳақида хабар берди, аммо ҳали асосий аҳоли пунктларини эгаллай олгани йўқ.
Озодлик жанг майдонидан келаётган хабарларни дарҳол тасдиқлай олмайди.