Украина Россиянинг 50 кишилик сара бўлинмасини йўқ қилди
АҚШда жойлашган ISW таҳлил маркази Украина кучлари Донецкда фронт чизиғини мустаҳкамлаш учун жойлаштирилган Россиянинг сара аскарларини йўқ қилишга муваффақ бўлди, дея хабар берди.
Урушни ўрганиш институтининг (ISW) россиялик ҳарбий блогерга таяниб ёзишича, Старомайорское қишлоғи яқинида бир куннинг ўзида 7-дивизиясининг 49 нафар аскари ҳалок бўлган, рус қўмондонлари жасадларни ташлаб кетган.
Москва ҳарбий бўлинмаларини Украина энг мустаҳкам рус мудофаасидан ўтиб бораётган Запорожье вилоятига кўчиришга ҳаракат қилмоқда.
"Украинанинг Донецк-Запорожье чегарасидаги қарши ҳужум операциялари рус армиясининг 7- ҳаво-десант бўлинмасини Запороже вилояти ғарбидаги фронтнинг муҳим ҳудудларига жойлашишини олдини олди", деб ёзади Урушни ўрганиш институти.
Бўлинманинг баъзи полклари Роботин ҳудудига етиб боргани ҳам қўшимча қилинган. Рус расмийлари Роботинони “қисман тарк этганини” гапирмоқда.
АҚШ давлат котиби Киевга келди
АҚШ давлат котиби Энтони Блинкен 6 сентябр, чоршанба куни Украинанинг Россия кучларига қарши қарши ҳужуми тўртинчи ой давом этаётган бир пайтда қўллаб-қувватлаш белгиси сифатида бомбардимон қилинаётган Киевга келди.
Украина президенти идораси АҚШ мулозимининг мамлакатга ташрифи дастури ҳақида ҳозирча маълумот трақатгани йўқ. Блинкен икки кунлик ташрифи давомида АҚШнинг 1 миллиард доллардан ортиқ янги ёрдам пакетини эълон қилиши мумкин, деди Давлат департаментининг юқори мартабали расмийси матбуот брифингида. Бугун Блинкен келиши муносабати билан Киев маркази ёпилди.
Блинкенга Киевда украинларнинг машҳур ҳарбий итини ҳам таништиришди.
Блинкен президент Владимир Зеленский ва ташқи ишлар вазири Дмитри Кулеба, шунингдек, фуқаролик жамияти вакиллари билан учрашиши кутилмоқда, деди расмий.
Бу Блинкеннинг Украинага учинчи ташрифидир. АҚШ Давлат котиби Киевга охирги марта 2022-йил сентабрида ташриф буюрган эди.
Лукашенко ўзбекларга президентни асрашни тавсия қилди
5 сентябр куни Минскда Ўзбекистон Олий Мажлиси Сенати раиси Танзила Норбоева Александр Лукашенко билан учрашди. Маълум бўлишича, Лукашенко жорий йил охири ёки 2024 йил бошида Ўзбекистонга ташриф буюриши кутилмоқда.
Беларус президенти матбуот хизмати хабар беришича, учрашувда Лукашенко ўзининг Тошкентга ташрифи Беларус ва Ўзбекистон ўртасида дипломатик муносабатлар ўрнатилганининг 30 йиллигида амалга оширилганини урғулаган. Лукашенко Беларуснинг ШҲТга аъзо бўлиши масаласида кўрсатилаётган ёрдам учун Ўзбекистонга миннатдорчилик билдирган.
"Мен иқтисодиёт асосида минтақавий ҳамкорликка ўтишимизни истардим (Россия Федерацияси билан бўлгани каби, бизда аллақачон тажриба бор). Биз учун бу муҳим, Ўзбекистон учун эса технология нуқтаи назаридан янада муҳимроқ. Оддий савдодан эмас, балки корхоналар кооперациядан бошлаб, технологияларимизни Ўзбекистонга етказиш - бу сиз учун жуда қизиқ бўларди", деди Александр Лукашенко.
Учрашув давомида Беларус раҳбари “бизга Ўзбекистоннинг сайлов бўйича тажрибаси қизиқ”, деди. Лукашенко шунингдек, ўзбекистонликларни президент Мирзиёевга узоқроқ ҳокимиятда қолишига имкон беришни маслаҳат берган:
“Жуда яхши президентингиз бор. Мен унга доимо кўзларига тик қараб айтиб келаман: сенга шунчалик ишонаётган ва умид қилаётган ўз халқингни ишончини оқла. У Ўзбекистон ва ўзбеклар ҳаётини янада яхшилашни жуда истайди. Ўзбекистоннинг келажаги буюк. Менинг сизга маслаҳатим: президентингизни имкон қадар узоқроқ асранг. Унга салоҳиятини намойиш этиш учун кўпроқ вақт керак.“
Лукашенко шу йил июлида конституциядаги икки муддат ўрнига учинчи муддат президентликка сайланган Шавкат Мирзиёевни биринчилардан бўлиб табриклаганди. Ғарб давлатлари 1994 йилдан буён ҳокимиятни эгаллаб келаётган Лукашенкони қонуний президент сифатида тан олмайди. 2020 йилдаги сохталаштирилгани айтилган сайловлар ортидан Лукашенко юзлаб мухолифларни қамоққа ташлаган, юзлаб фаоллар мамлакатни тарк этишга мажбур бўлган.
Россиянинг Украинага тажовузи арафасида Беларуснинг авторитар раҳбари яқин келажакда айрим собиқ совет давлатлари, жумладан, Ўзбекистон Россия ва Беларус ўртасида тузилган Иттифоқ давлатига аъзо бўлиши мумкинлигини башорат қилган эди.
2022 йил январида у, ўзининг таъбирича, Қозоғистондаги тартибсизликларни келтириб чиқарган кучларнинг "нигоҳи ҳозирда Ўзбекистонга қаратилгани"ни иддао қилган ва расмий Тошкентни воқеалардан сабоқ чиқариш ҳақида огоҳлантирган.
Президент Мирзиёев Лукашенконинг Ўзбекистон ҳақидаги баёнотини “асоссиз” дея танқид қилган эди. Россиянинг Украинага қарши уруши ва санкциялар фонида кўплаб беларуслик ИТ мутахассислари Тошкентга кўчиб ўтгани айтилади.
Ғарб давлатлари 1994 йилдан бери ҳокимиятни эгаллаб ўтирган Лукашенкони қонуний президент деб тан олмайди. Лукашенко ўзбекларга ҳам Шавкат Мирзиеёвга “кўпроқ вақт беришни” тавсия қилди.
Озодликнинг Украинадан лавҳаларини кузатиб боринг
Украинадаги сўнгги вазият, у ердаги Ўзбекистон ва марказий осиёликларнинг тақдири ҳақидаги туркум видеолавҳаларимиз учун Озодликни кузатиб боринг.