Путин Рамзан Қодировнинг яна бир қизини орден билан сийлади
Путин Рамзан Қодировнинг 24 ёшли қизини “кўп йиллик самарали ижодий фаолияти учун” медали билан тақдирлади. У бу лавозимда ишлаганига икки йилдан ошмаган.
Чеченистон раҳбарининг тўнғич қизи Ойшат Қодирова 2 даражали “Ватан олдидаги хизматлари учун” ордени билан тақдирланди. Владимир Путин томонидан имзоланган тегишли фармонда ёш мутахассис "миллий маданият ва санъатни ривожлантиришдаги хизматлари, кўп йиллик самарали ижодий фаолияти учун" мукофотига сазовор бўлгани айтилади. Айтганча, ойшат 2021 йил октябр ойидан бери Чеченистон маданият вазири.
Рамзан Қодировнинг яқинлари доимий равишда давлат мукофотлари билан тақдирланадилар.
Ўтган ойда Қодировнинг яна бир қизи 20 ёшли Хутмат Қодирова “тиббиёт ривожига қўшган улкан ҳиссаси” учун бобоси Ахмат Қодиров шарафига таъсис этилган Чеченистоннинг олий ордени билан тақдирланганди. У лавозимда ишлаганига энди уч ой бўлган.
Рамзан Қодировнинг халқаро санкцияларга тушган онаси Аймани эса ўтган август ойида шахсан Путин томонидан “фаол жамоатчилик фаолияти учун “Шараф” ордени билан тақдирлаган эди. Рамзан Қодиров эса АҚШдан онасидан “уйда ўтиргани ва ҳеч нарсага аралашмагани сабабли” санкцияларни бекор қилишни талаб қилиб келади.
Путин ва Эрдўғон "ғалла битими" бўйича келишолмади
Владимир Путин ҳамда Туркия президенти Ражаб Тоййиб Эрдўғон Сочидаги учрашув чоғида Россия иштирокида “ғалла битими”ни давом эттириш масаласида тил топиша олмади, деб ёзмоқда Би-би-си рус хизмати.
Путин қарийб уч соатга чўзилган музокаралардан сўнг ўтказилган қўшма матбуот анжуманида Россия ўз агроэкспортига доир барча келишувлар бажарилгани заҳоти “ғалла битими”ни қайта тиклаш имкониятларини кўриб чиқишга тайёр бўлишини айтди.
- Мен принципиал позициямизни яна бир бор таъкидлаб ўтмоқчиман: биз ғалла битимини қайта тиклаш имкониятини кўриб чиқишга тайёрмиз, мен бугун Туркия президентига ҳам бу ҳақда яна бир бор айтдим. Россия қишлоқ хўжалиги маҳсулотларини экспорт қилишга қўйилган чекловлар бекор қилиниши билан, тез орада буни амалга оширамиз," деди Россия президенти.
Путин Россия июль ойида келишувдан чиқишида яна Ғарбни сабабчи қилиб кўрсатди.
Айни чоғда у Украинани “гуманитар йўлаклардан террорчилик ҳужумларини амалга оширишда фойдаланиш”да айблаб, Россия “ғалла йўлаги хавфсизлигини таъминлаган”ини иддао қилди.
Путинга кўра, Ғарб мамлакатлари “ғалла битими гуманитар мақсадларни кўзлаган, дея уни алдашган”, чунки “юкларнинг 70 фоизи ўзига тўқ мамлакатларга, хусусан Европа иттифоқига ташилган” эмиш. У шунингдек, Қатар молиявий ёрдами билан Туркия орқали Африкага бир миллион тонна ғалла етказиб бериш таклифи дон келишувига муқобил вариант сифатида режалаштирилмаганини қўшимча қилди.
Ўз навбатида Эрдўғон Туркия “ғалла битими” бўйича БМТ билан янги туркум маслаҳатлашувларга тайёрланаётганини ва битим аввалги форматда ва Россия иштирокида тикланиши учун имкон борича ҳаракат қилишини урғулади.
Россия “ғалла битими”дан чиққанини 17 июль куни эълон қилган эди. Шундан сўнг Россия Мудофаа вазирлиги Украина портларига йўл олган савдо кемаларига ҳарбий нишонлар деб қаралиши ҳақида огоҳлантирган
Россия асирлигидан 22 украин зобити қайтарилди
Украина президенти офиси раҳбари Андрей Ермак 22 нафар украиналик ҳарбийлар Россия асирлигидан қайтганини маълум қилди.
Ермак ўз Телеграм каналида бир гуруҳ ҳарбий хизматчилар акс этган этган видеони жойлади.
"Булар Украина Қуролли Кучлари аскарлари: икки офицер ва турли даражадаги ҳарбий хизматчилар. Улар фронтнинг турли қисмларидаги жангларда қатнашган, озод этилганлар орасида ярадорлар ҳам бор. Аскарларимиз орасида энг кексаси 54 ёшда, энг кичиги эса 23 ёшда. Барча озод қилинганлар тиббий мутахассислар кўмагида жисмоний ва руҳий реабилитация, реинтеграция курсидан ўтказилади ва зарурий тиббий ёрдам олади. Мен ҳарбий асирлар билан шуғулланадиган мувофиқлаштирувчи штабга ва бутун жамоамизга миннатдорлик билдираман. Бизда Президентнинг барча асирларимизни қайтариш вазифаси бор", - дея қўшимча қилди Ермак.
Доғистонда 20 нафар ҳарбий Украинага қарши урушга боришдан бош тортди
Доғистоннинг Буйнакск шаҳрида жойлашган 63354-сонли ҳарбий қисмнинг қарийб 20 нафар ҳарбий хизматчиси Украинага қарши урушга боришдан бош тортди, уларга нисбатан сафарбарлик даврида буйруқни бажаришдан бўйин товлаш (Россия ЖКнинг 332-моддаси 2.1-қисми)га доир жиноят иши қўзғатилиши мумкин. Бу ҳақда Кавказ.Реалии хабар бермоқда.
Хабарда айтилишича, урушга боришдан бош тортган ҳарбийлар тушунтириш хати ёзишга мажбурланган, қисм командири эса ҳолатни текшириш ва улар устидан жиноят иши очишни сўраб ҳарбий тергов бўлимига мурожаат қилган.
Нашр суҳбатдошларига кўра, ҳарбийлар соғлиғи ёмонлиги важидан Украинага жўнаш буйруғини бажаришдан бўйин товлаганлар, аммо уларга ташхисни тасдиқлатиш учун ҳарбий-тиббиёт комиссиясидан ўтишга рухсат берилмаяпти. “Ҳеч кимга “Д” тоифа (ҳарбий хизматга яроқсизлик) берилмасин, деган ички ҳужжат бор, деб йигитларга рўй-рост айтишибди”, дейди Кавказ.Реалии манбаси.
Сибирь.Реалии ҳамда “Система” суриштирув лойиҳаси Россия Украинага қарши тўлақонли уруш бошлаганидан бери Россия судларига урушга жўнашдан бош тортган ҳарбийларга доир 200 та иш келиб тушганини аниқлаган. “Буйруқни бажаришдан бўйин товлаш” моддаси бўйича энг кўп Приморьедаги ҳарбий қисмлар хизматчилари суд қилинган (27 та иш).