Москвада дронлар ҳужуми туфайли яна аэропортлар вақтинчалик ёпилди
5 сентябрь тонгида ҳаво ҳужумидан мудофаа тизимлари Москва томонга учаётган учта дронни уриб туширди, дея маълум қилди Россия пойтахти мэри Сергей Собянин. Мулозимга кўра, учувчи аппаратлар Москва, Калуга ва Твер вилоятларида йўқ қилинган. Москва аэропортларида ўнлаб рейслар кечиктирилган.
Мэр дрон парчалари тушган жойларда ҳеч ким жабрланмаганини билдирди.
Россия Мудофаа вазирлиги буни “Киев режимининг учоқсимон дронлар ёрдамида Россия Федерацияси ҳудудидаги объектларга террорчилик ҳужумларини амалга оширишга уриниши” деб атади. Дронлар ҳужуми муносабати билан пойтахт аэропортларида бешинчи сентябрь куни эрталаб 42 та рейс кечиктирилди: Внуковода 25 та, Домодедовода 2 та ва Шереметьевода 15 та.
Зеленский жорий ҳафтада мудофаа вазири ўзгаришини маълум қилди
Президентга кўра, Алексей Резников ўрнига Давлат мулк фонди раиси Рустем Умеров тайинланади. Бу тайинлов парламент томонидан тасдиқлангач, Умеров лавозимга киришади.
"Мен Украина мудофаа вазирини алмаштиришга қарор қилдим. Алексей Резников уруш бошланганидан бери 550 кун бу лавозимни эгаллади. Менинг нуқтаи назаримча, вазирликка ҳарбийлар билан ҳам, жамоатчилик билан ҳам ҳамкорлик қилишда янгича шакллар ва ёндашувлар зарур. Энди вазирликка Рустем Умеров раҳбарлик қилиши керак. Украина Олий Радаси бу одамни яхши билади ва жаноб Умеровни ортиқча таништириш керак эмас. Мен парламент бу номзодни қўллаб-қувватлашини кутаман. Куз фасли - куч тўплаш вақти”
Умеров 41 ёшда. У 1982 йилда Самарқанднинг Булунғур туманида 1944 йилда Қримдан депортация қилинган қримтатар оиласида туғилган. Умеровлар оиласи 1980 йилларнинг охирларида Қримга қайтган.
Умеров Украинада қатор инвестиция фондларига раҳбарлик қилган. 2019 йилдан “Голос” фракциясининг Олий Рададаги депутати.
У қрим-татар сиёсатчиси асли ўзбекистонлик Мустафо Жемилевнинг ёрдамчиси ҳам бўлган.
Шунингдек, Умеров кенг кўламли босқиннинг бошида Россия билан музокаралар гуруҳининг таркибида бўлган. 2022 йил март ойида Агентлик Умеров заҳарланганини даъво қилган эди. Сиёсатчининг ўзи буни рад этди. Wall Street Journal ва Bellingcat маълумотларига кўра, бир неча музокарачилар, жумладан Роман Абрамович заҳарланган, кейинчалик буни тадбиркорнинг вакили тасдиқлаган.
У 2022 йилда Давлат мулк фонди раиси лавозимига тайинланган.
Украина мудофаа вазири Алексий Резников истеъфога чиққанини эълон қилди
“Мен Украина Олий Радаси раиси Руслан Стефанчукка истеъфога чиқиш ҳақида ариза бердим. Сўнгги 22 ой давомида, яъни Украина тарихининг энг оғир даврида Украина халқига ва Украина армияси манфаати учун хизмат қилиш мен учун шараф эди”, деб ёзди Резников твитида.
Forbes журналининг украин таҳририяти Резников истеъфога чиққанидан сўнг Украинанинг Британиядаги элчиси лавозимига тайинланиши ҳақида ёзди. Ҳозирча бу маълумот расман тасдиқланган эмас.
Европа комиссияси: Илон Маск Россия пропагандасини ёйишга кўмаклашмоқда
Америкалик миллиардер Илон Маск Twitter (ҳозирги номи – Х) ижтимоий тармоғи раҳбари лавозимини эгаллаганидан сўнг ўз хатти-ҳаракатлари билан Россия пропагандасини ёйишга кўмаклашмоқда. Европа комиссияси ҳисоботида шундай хулосага келинган.
Ҳисоботга кўра, 2022 йилда Европада Кремль қўллаб-қувватлаётган аккаунтлар аудиторияси ва таъсири кенгайган. 2023 йил бошларида Маск контент модерациясини қисқартирувчи қоидаларни жорий этганидан сўнг Россия пропагандасини ташувчи аккаунтлар қамрови ва таъсири янада ортгани айтилмоқда.
25 август куни Европа иттифоқида рақамли хавфсизлик қоидаларига доир қонун кучга кирдики, унга кўра ижтимоий тармоқлар дезинформация пайдо бўлиши эҳтимолларини баҳолашга ва тавсиявий алгоритмлар ёрдамида унинг олдини олиш чораларини кўришга мажбур. Ҳисоботда айтилишича, қонун аввалроқ кучга кирганида Twitter унга мувофиқ бўла олмаган бўларди. Ҳужжатда Instagram ва Facebook каби ижтимоий тармоқлар ҳамда Telegram мессенжери ҳам танқид қилинган.
Маск Еврокомиссия ҳисоботига изоҳ берганича йўқ. У Twitter’ни сотиб олиши олдидан сервисни, ўз фикрича, сўз эркинлигини жиддий чекловчи модерация қоидалари учун танқид қилган эди.
Июнда эса у France 2 телеканалига берган интервьюсида Twitter ижтимоий тармоғи ЕИ талабларига бўйсунишини айтган.