Украина Мудофаа вазирлиги Ми-8 вертолётида Украинага қочиб ўтган рус учувчисини кўрсатди
Украина Мудофаа вазирлиги Разведка бош бошқармаси (РББ) “Россиянинг уриб туширилган учувчилари” номли ҳужжатли фильмда Россияга қарашли Ми-8 жанговар вертолётида экипаж билан бирга Украинага қочиб ўтган рус учувчисини кўрсатди.
Ушбу воқеа РББнинг олти ойлик махсус операцияси натижасидир. Украина ҳарбий разведкаси ходимлари учувчи билан алоқа боғлаб, уни вертолётда Украинага қочиб ўтишга кўндирганлар.
Ниҳоят, вертолёт бортдаги юки – Су-27 ва Су-30СМ қирувчи учоқлари учун бутловчи қисмлар билан Харьков вилоятига қўнган, кейинчалик у ердан Киевга жўнатилган. Учувчи эса аввалроқ махсус кучлар ходимлари томонидан Россиядан олиб чиқиб кетилган оиласи билан бирга ҳозирда Украина яшамоқда.
Ҳужжатли фильмда ушбу операция “Читтак” номи билан тилга олинади. Украина разведкасига кўра, вертолётни Россия ҚК капитани, Ми-8 вертолёти командири 28 ёшли Максим Кузьминов олиб қочган. У Приморье ўлкасидаги 319-махсус вертолёт полкида хизмат қилган.
Фильмда у Украина разведкаси вакилларига ўзи алоқага чиққанини айтади.
“Бир куни чегарага жуда яқин жойдалигимни билиб қолдим. Дарҳол хабар бердим. “Келинглар, уриниб кўрайлик, мен яқин жойдаман”, дедим. Ва узил-кесил қарор қабул қилиб, жуда паст учган ҳолда ва радиосукут режимида Украина ҳудудига ўтдим. Менга нима бўлганини, қаерда юрганимни ҳеч ким билмади. 3-4 кунгача тушунишмади. Мен эсон-омон учиб келдим, қўндим, кутиб олишди, гаплашдик, ҳаммаси жойида”, деди Украина тарафига ўтган учувчи Максим Кузминов.
Кузьминовга кўра, разведкачилар унга ва оиласига хавфсизлик кафолати, янги ҳужжатлар ва мукофот пули таклиф қилишган.
Фильмда айтилишича, операциянинг сўнгги палласида учувчи яраланган, бироқ унга ўз вақтида тиббий ёрдам кўрсатилган. Экипажнинг нима бўлаётганидан бехабар нариги икки аъзоси вертолёт қўнганидан сўнг қочишга уринганида ўлдирилган.
Украина Ғарб давлатларидан 100 миллиард долларга яқин ҳарбий ёрдам олди
Украина 2022 йил февралининг охиридан то шу кунгача Ғарб давлатларидан 100 миллиард долларга яқин ҳарбий ёрдам олди. Бу ҳақда Украина мудофаа вазири Алексей Резников маълум қилди. Унга кўра, кўрсатилган умумий ҳарбий кўмакнинг 60 миллиард доллари АҚШ ҳиссасига тўғри келади.
Резниковга кўра, айни пайтда Киев ҳаводан мудофаа тизимларига алоҳида эътибор қаратмоқда.
“Булар Patriot, NASAMS, SAMP/T, Iris-T, Gepard, Crotale, каби замонавий тизимлар, Stinger, Starstreak каби зенит ракета тизимлари, гранатомётлардир”.
Резников бугунги кунда Украина армияси ҳарбий самолётларга эҳтиёж сезаётганини таъкидлади. У: “Биз аниқ биламиз, тез орада F-16 ларга эга бўламиз", – деб таъкидлади.
F-16 АҚШда ишлаб чиқарилаётган замонавий ҳарбий қирувчи самолётдир. Вазир бу самолётлар 2024 йилнинг баҳорида Украинага етказилиб берилиши кутилаётганини айтди.
Эрдўғон Путин билан Сочида учрашди
Туркия президенти Тойиб Эрдўғон 4 сентябр, душанба куни Россия жанубидаги Сочи шаҳрида россиялик ҳамкасби Владимир Путин билан учрашди. Икки етакчи Украина донининг Қора денгиз орқали ўтишига рухсат берган келишув ва Россиянинг Украинага ҳарбий аралашуви оқибатларини ҳам муҳокама қилади.
Эрдўғон Туркияда Путинга учрашувдан сўнг ғалла коридорига оид баёнотлар муҳим бўлишини айтди:
“Туркия-Россия муносабатлари нуқтаи назаридан, бу ташриф чоғида ҳамма ғалла коридори муаммосига эътибор қаратмоқда. Улар бу ердан ғалла йўлаги ҳақидаги маълумот чиқишини кутишмоқда. Учрашувимиздан кейинги матбуот анжуманида дунёга бериладиган хабар, айниқса, кам ривожланган Африка давлатлари учун қадамлар жуда ва жуда муҳим бўлади”.
“Биз дон бўйича келишувни муҳокама қилишга очиқмиз”, дея жавоб қатарди Путин Эрдўғон билан учрашувда.
2022 йилда Туркия ва БМТ воситачилигида тузилган Қора денгиз дон келишуви Россия июл ойида чиқиб кетганидан сўнг якунига етди. Ўшандан бери Москва Украинанинг асосий дон экспорт йўлига айланганДунай дарёсидаги портларига тез-тез ҳужумлар уюштирмоқда.
Анқара ва БМТ ҳозир Москвани келишувга қайтишга кўндирмоқчи.
Россия ҳарбийлари яна Одесса вилоятига “Шаҳед”лар билан зарба берди
Тўртинчи сентябрга ўтар кечаси Россия ҳарбийлари яна Одесса вилоятига “Шаҳед”лар билан зарба берди.
Украина расмийлари 17 та дрон уриб туширилганини билдирмоқда.
Айрим дронлар нишонга етиб борди, дея маълум қилди Одесса вилояти ҳарбий маъмурияти раҳбари Олег Кипер. Измаил туманидаги бир неча аҳоли масканида омбор ва ишлаб чиқариш иншоотлари, аграр ва саноат корхоналари жиҳозлари шикастланган.
Шунингдек, уриб туширилган дронлар бўлаклари Одесса вилояти жанубидаги фуқаровий объектларда ёнғинга сабаб бўлгани айтилмоқда. Тунги ҳужумлар натижасида бирон киши ўлгани ёки яралангани ҳақида маълумот йўқ.
Днепропетровск вилоятида ҳам “Шаҳед”лардан бир нечтаси инфратузилма объектларига келиб тушди, дея маълум қилди вилоят раҳбари Сергей Лисак. Мулозимга кўра, ҲҲМ кучлари олтита камикадзе дронни уриб туширган. Дастлабки маълумотларга кўра, ҳеч ким ўлмаган ва яраланмаган.
Воқеа жойида қутқарув хизматлари иш олиб бормоқда