Одессага дрон ҳужумлари
Украина ҳаво ҳужумидан мудофаа тизимлари 3 сентабр куни Одесса вилояти жанубида Россия учирган Эроннинг 25 та “Шаҳед” дронидан 22 тасини уриб туширган.
Бу ҳақда Украина Ҳарбий-ҳаво кучлари хабар берди.
Дунай бўйидаги дон ташиш инфротузилмасига қаратилган ҳужумда тинч аҳоли орасидан камида икки киши жароҳатлан.
Зарбалар тахминан 3 ярим соат давом этган.
Бирлашган Миллатлар Ташкилоти воситачилигида Қора денгиздан хавфсиз юк ташиш имконини берувчи келишув бузилганидан бери Дунай Украинанинг дон экспорт қилишнинг асосий йўлига айланди.
Ўшандан бери Россия Украинанинг жанубий Одесса ва Николаев вилоятларига, портлар ва дон етказиб бериш учун муҳим бўлган инфратузилмага ҳужумларини кучайтирди.
3 сентабрдаги дрон ҳужумларида қайси порт иншооти урилгани ҳақида ҳеч қандай маълумот йўқ.
Украина ҳарбийлари иншоотда ҳужум оқибатида юзага келган ёнғин тезда ўчирилганини билдирди.
2 сентабр куни кечки пайт Украина шимоли-шарқидаги Суми вилоятида Россия ракета ҳужуми оқибатида камида бир киши ҳалок бўлди, олти нафари яраланди, дея хабар бермоқда вилоят ҳарбий маъмурияти.
Маҳаллий расмийларга кўра, артиллерия ҳужуми кўплаб портлашларга сабаб бўлган, улар шахсий уйлар ва транспорт воситаларига, шунингдек, собиқ коммунал хизмат кўрсатиш компаниясининг биноларига зарар етказган.
Россия қўшинлари 3 сентябр куни Донецк вилоятидаги саккиз аҳоли пунктини ҳужумга тутди, қурбонлар бор
Угледарда икки киши ҳалок бўлди, яна икки киши яраланди.
Украин генерали: “Биринчи ва иккинчи мудофаа чизиғи ўртасида турибмиз”
Украина кучлари Запорожье вилоятида Россия мудофаасининг биринчи чизиғини ёриб ўтди, деди “Таврия” қўшинлари гуруҳи қўмондони Александр Тарнавский "The Observer" нашрига берган интервюсида.
Унинг сўзларига кўра, миналардан тозалашнинг машаққатли жараёни туфайли биринчи мудофаа линиясини ёриб ўтиш бир неча ҳафтага чўзилган, аммо энди буёғи украина қўшинлари учун осонроқ бўлиши кутилмоқда.
Бригада генералининг сўзларига кўра, Россия томонидан ушбу минтақада қатламли мудофаа учун сарфланган маблағнинг 60 фоизи биринчи қаторни жиҳозлашга, атиги 20 фоизи иккинчи ва учинчи қаторга кетган, чунки Россия қўмондонлиги Украина қўшинлари уни ёриб ўтолмайди деб ўйлаган. "The Observer" Тарнавскийнинг “биз ҳозир биринчи ва иккинчи мудофаа чизиғи ўртасида турибмиз”, деган сўзларини келтиради.
Генералга кўра, Украина қўшинлари яқинда босиб олган ҳудудда бўшлиқни кенгайтириб, мустаҳкам ўрнашиб бормоқда.
Тарнавский, шунингдек, Россия захираларини нафақат Украинанинг бошқа ҳудудларидан, балки Россиядан ҳам кўчираётганини, лекин эртами-кечми уларда “энг яхши бўлинмалар тугаши” ва Украина кучлари кўпроқ ва тезроқ ҳужумга ўтиши мумкинлигини айтди.
Украинанинг уч ой олдин бошланган ҳужуми сустлиги учун танқид қилинган, бироқ Тарнавскийнинг сўзларига кўра, миналардан тозалаш ва ярадорларни жанг майдонидан эвакуация қилиш билан боғлиқ муаммолар учун режалаштирилганидан кўпроқ вақт сарфланган.
Украина Олий Радаси келаси ҳафта мудофаа вазири Олексий Резниковни ишдан бўшатиши мумкин
Бу ҳақда РБК-Украина вазиятдан хабардор манбаларга таяниб хабар берди. Уларга кўра, Резников ўрнига Давлат мулк жамғармаси раҳбари Рустем Умеров келиши мумкин. Мудофаа вазирлигининг харидлари билан боғлиқ жанжаллардан кейин Резниковнинг истеъфога чиқиши ҳақида гап-сўзлар урчиганди.
Украина Қрим кўпригига қилинган ҳужум ҳақидаги Россия баёнотига изоҳ берди
Жанубий мудофаа кучларининг Бирлашган мувофиқлаштирувчи матбуот маркази раҳбари Наталья Гуменюкнинг айтишича, Россия бундай баёнотлар билан “вазиятни чигаллаштиришга ҳаракат қилмоқда”.
"Уларнинг ҳар сафар ушбу кўприк қурилмаси атрофидаги вазиятни кескинлаштиришга уринишлари шунчаки уларнинг тактикаси. Улар нега бу транспорт инфратузилмаси объектидан фойдаланиш мумкин эмаслигини қандайдир тарзда оқлашлари керак", - дея тушунтирди у.
"Улар ҳар сафар ўзларининг тушунарсиз хатти-ҳаракатларини бошқаларга тушунтириш учун маълум бир афсонага эга", дея қўшимча қилди Гуменюк.