С.Лавров: Россия газининг Хитойга экспорти Қозоғистон ва Туркманистонга муаммо туғдирмайди
Россия ташқи ишлар вазири Сергей Лавров 1 сентябр куни Россия газининг Хитойга экспорти Қозоғистон ва Туркманистон учун муаммо туғдирмаслигини айтди. Унингча Хитойда газга талаб жуда юқори.
“Албатта, бизнинг Хитойга газ экспорт қилиш тизимимиз бор. Биз ҳеч кимга муаммо яратмаяпмиз, чунки Хитойнинг эҳтиёжлари ҳаммага фойда келтирадиган даражада, ҳам Қозоғистон, ҳам Туркманистонга ёки бошқа давлатларга. Россия ва Марказий Осиё ўртасида энергетика соҳасидаги ҳамкорлик тўғрисида тўлиқ якдиллик мавжуд бўлиб, жуда истиқболли ва узоқ муддатли бир қатор аниқ лойиҳалар бор. Улар иқтисодиётларимиз барқарорлигини таъминлайди”, деди вазир Лавров.
Аввалроқ, шу йилнинг 12 август куни Туркманистон Россиянинг Қозоғистон ва Ўзбекистон билан “газ иттифоқи” тузиш ва уни Хитойга етказиб бериш режалари Ашхобод манфаатларига тегиб кетаётганини маълум қилган эди. Қозоғистон ҳам Россиядан “уч томонлама газ иттифоқи”ни яратиш бўйича расмий таклиф олмаганини маълум қилганди.
Ўтган йили Ғарб Россиянинг Украинага бостириб кириши ва Болтиқ денгизи остидаги “Шимолий оқим” газ қувуридаги сабабсиз портлашларга қарши иқтисодий санкциялар билан жавоб берганидан сўнг “Газпром”нинг асосан Европага табиий газ экспорти деярли икки баробарга қисқарди.
Иқтисодиёти асосан хом ашё сотишга боғланиб қолган Россия нефт экспортини Европадан Осиё ва бошқа минтақаларга йўналтирди. Хитойга газни Сибир қуввати қувури орқали етказиб беради. Бу йўналиш бўйича экспорт ўтган йили 15 миллиард куб метрга етган бўлса, 2023 йилда бу кўрсаткич 22 миллиард куб метрга етиши режалаштирилган.
Пригожин билан ҳалокатга учраган стюардесса Қозоғистонда дафн этилди
“Вагнер” ХҲШ асосчиси Евгений Пригожин учоғи қулаши натижасида ҳалок бўлган стюардесса Қозоғистонда дафн қилинди
Стюардесса кристина Распопова пайшанба куни Қозоғистоннинг Рудний шаҳрида дафн қилинди. Бу ҳақда марҳуманинг холаси Елена Абраменкога ҳавола берган ҳолда “Агентство” нашри хабар қилмоқда. Абраменкога кўра, Қозоғистонда стюардессанинг онаси бор.
“Тобутни онасининг уйига келтиришди, бугун кўмдик. Тобутни божхонадан уч соат деганда зўрға ўтказишган эмиш”, дейди Абраменкова.
Унинг айтишича, жасаднинг шахсини аниқлаш учун Распопованинг акаси ДНК-тест топширган.
Украина илк бор картон дронларни қўллади
Украина ҳарбийлари 27 августга ўтар кечаси Курск яқинидаги Халино ҳарбий аэродромига ва Курск туманидаги радиоэлектрон кураш ҳарбий қисмига ҳужумларда илк бор Австралиянинг SYPAQ камикадзе дронларини қўллаганлар, деб хабар беради Mash телеграм-канали.
Mash ёзишича, жами тахминан 16 та дрон учирилган, аммо улардан фақат айримларида портловчи модда бўлган, аксар дронлар ҲҲМ тизимларини чалғитиш учун қўлланган. Россияга оид Fightbomber телеграм-канали эса ушбу дронлар мум сурилган қоғоз ва резинадан ясалган бўлиб, радарларга деярли кўринмаслигини урғуламоқда.
30 августга ўтар тунда эса Украина дронлари Псковга ҳужум қилди. Россия Мудофаа вазирлиги Россиянинг олти вилоятида дронлар зарбалари қайд қилинганини билдирди.
Украиналик авиатсия мутахассиси Валерий Романенко Псковга қандай учувчисиз самолётлар тушгани ва картондан ясалган дронлар нима эканлигини айтиб берди.
30 августга ўтар кечаси Псков аэропортига қилинган ҳужум Россия ҳудудидан амалга оширилган
Бу ҳақда Украина разведкаси раҳбари Кирилл Буданов "Уруш зонаси" лойиҳасида маълум қилди.
Буданов тафсилотларга аниқлик киритишдан бош тортди. Унинг сўзларига кўра, зарбалар натижасида иккита самолёт йўқ қилинган, иккитасига жиддий зарар етган.