Планет Лабс Псков халқаро аэропортига дрон ҳужуми оқибатларини кўрсатувчи суратларни намойиш қилди
Суратда аэропортнинг тўхташ майдонида қорайиб кетга иккита Ил-76 самолётини кўриш мумкин.
Яна ўн битта Ил-76 учоқлари хавфсизлик учун аэропортнинг бошқа турли жойларига кўчирилди.
Маҳаллий ОАВ хабарларига ишонилса, Украинанинг Псков аэродромига дрон ҳужумида тўртта Ил-76 самолёти зарар кўрган. Кеча Владимир Зеленский Псковга ҳужумга ишора қилиб Украина 700 километр узоқликдаги нишонга зарба беришга қодир қурол ишлаб чиққанини айтди.
Тўрт двигателли Ил-76 самолёти Россия армиясининг асосий юк ташувчи воситаси ҳисобланиб, оғир шароитларда учиши ва қўна олиши билан маълум. Россия армияси флотида 100 дан ортиқ Ил-76 самолётлари борлиги айтилади.
Украина сут маҳсулотлари Ўзбекистон бозорига киради
Украина Сут корхоналари уюшмаси Ўзбекистон Республикаси элчихонаси ва бошқа хўжалик бирлашмалари билан биргаликда Украина сут маҳсулотлари ва бошқа озиқ-овқат маҳсулотларини Ўзбекистонга олиб чиқишга тўсқинлик қилган божхона тўсиқларини бартараф этишга келишиб олди.
"Ўзбекистон сўнгги 5 йил ичида фаол ривожланмоқда. Бу сут маҳсулотлари ишлаб чиқарувчиларимиз учун қизиқарли савдо бозори. Потенциал истеъмолчилар сони бўйича у Украина билан деярли тенг. Агар логистика харажатларини пасайтиришга эришсак, бизнинг корхоналар ўзбек бозоридан Россия ва Беларус ишлаб чиқарувчиларини сиқиб чиқариши мумкин", деди Вадим Чагаровский, Сут корхоналари уюшмаси раҳбари.
Шунингдек, у Россиянинг кенг кўламли босқинчилиги бошланишидан олдин Ўзбекистон Украина сут корхоналари учун савдо бозори бўлганига аниқлик киритди. Бугунги кунда ушбу бозорда асосий рақобатчилар арзонроқ логистика афзалликларига эга бўлган Россия ва Беларусия ишлаб чиқарувчилари ҳисобланади. Чагаровскийнинг сўзларига кўра, ишлаб чиқаришнинг сезиларли қисқаришига йўл қўймаслик учун украин ишлаб чиқарувчилар сут маҳсулотлари учун бозорларни қидирмоқдалар.
2023 йилнинг июн ойи ҳолатига кўра, бозорнинг харид қобилиятига таъсир қилган уруш натижасида 8 миллиондан ортиқ украиналиклар Украинани тарк этган.
Киев мактаблари миналаштирилгани хабари текширилмоқда
1 сентябр, Билимлар кунида Киев Метрополитен полициясига барча шаҳар мактаблари миналаштирилгани ҳақида маълумот келиб тушган. Бу ҳақда гапирган шаҳар ҳарбий бошқармасига кўра, болалар ва ўқитувчиларни бинолардан эвакуация қилиш тўғрисида қарорлар таълим муассасалари маъмурияти ва полиция томонидан қабул қилинади.
Киев мери Виталий Кличко маълумотларига кўра, бугун пойтахтдаги барча 420 та мактаб иш бошлаган. 240 минг мактаб ўқувчиси офлайн режимда ўқийди. 417 мактаб қарийб 190 минг ўринли бошпана билан таъминланган.
Украина Шарқидаги Харковда эса болалар учун ер остидаги метро бекатларида синфхоналар ташкил этилди.
Россия ФСБси Брянск вилоятида украиналик ҳарбийлар билан тўқнашув ҳақида хабар берди
Махсус хизмат икки украиналик аскарнинг ўлдирилиши ҳақида пресс-релиз тарқатди. Яна беш киши Брянск вилоятида ҳибсга олинган (улардан уч нафари яраланган). Ҳибсга олиш 30 август куни содир бўлган.
ФСБ маълумотларига кўра, украиналиклар Россия ҳудудида “ҳарбий ва энергетика инфратузилмаси объектларига бир қатор шов-шувли терактлар” уюштиришни режалаштирган.
30 август куни эрталаб Брянск вилояти губернатори Александр Богомаз ҳаво ҳужумидан мудофаа кучлари учта дронни уриб туширгани, улардан иккитаси телеминорага ҳужум қилмоқчи бўлганини маълум қилди. 30 август куни кечқурун Брянск вилоятида ҳам портлаш овозлари эшитилди. Кейинроқ амалдор ҳаво ҳужумидан мудофаа икки самолёт типидаги дронни уриб туширганини ёзган.
Озодлик уруш шароитида Россия ФСБ тақдим этган маълумотларни тасдиқлай олмади.