Ўзбекистон Россияга гуманитар ёрдам етказди
Ўзбекистон Россиянинг Белгород вилояти Шебекинский тумани аҳолисига инсонпарварлик ёрдами етказиб берди. Бу ҳақда Россия ТИВнинг расмий вакили Мария Захарова маълум қилди. Оғирлиги 12 тоннача бўлган юк 26 август куни етказиб берилгани айтилмоқда.
“Юкда болалар ва катталар кийим-кечаклари ва поябзаллари, дори-дармонлар, шунингдек, биринчи синф ўқувчилари учун мактаб тўпламлари мавжуд. Инсонпарварлик ёрдами Ўзбекистон Республикасининг давлат, жамоат ва нодавлат ташкилотлари орқали амалга оширилди,” дейилади Россия Ташқи Ишлар вазирлиги хабарида.
Хабарда Украинага ҳужум қилишни давом этаётган Россияга гуманитар ёрдамни қандай жамоат ва нодавлат ташкилотлари кўмагида етказилгани айтилмаган.
Белгород вилоятининг Шебекинский тумани мамлакатнинг Украина билан чегарасида жойлашган ва шу йилнинг май ойида минтақа ҳудудига Украина Қуролли кучлари таркибида курашаётган «Россия озодлиги» легиони ва Россия кўнгиллилар корпуси аъзолари ҳужум қилган. Вилоят ҳукумати болалар ва аёлларни эвакуация қилган, РИА Новости маълумотларига кўра, жами 60 мингга яқин одам ўз уйини тарк этган.
Ундан ташқари Белгород охирги пайтларда тинимсиз дрон ва ракеталар ҳужумига учраб келмоқда.
Аввалроқ Ўзбекистондаги жамоат ташкилотлари ва ўзбек ишбилармонлари томонидан йиғилган 10,5 тонна гуманитар юк Украинага етказилганди. Улардан кийим-кечак ҳамда тиббий буюмлар ўрин олган. Шунингдек, Украинадан дам олиш ва реабилитация учун 45 нафар боладан иборат гуруҳ Тошкентга келиб кетган.
Ўзбекистон украина урушида нейтрал позицияни эгаллаб келади. Аммо Тошкентдаги Ғарб дипломатлари расмий Тошкентнинг мавқеи Украинага нисбатан нейтрал, аммо Москвага жуда яқин эканини айтишган. Уруш бошланганида буён Ўзбекистон президенти Шавкат Мирзиёев бирон марта ҳам президент Владимир Зеленский билан мулоқот қилмаган.
Ўтган ҳафта бошида Қозоғистон ва Туркманистон президентлари Украина президентини Украинанинг мустақиллик куни билан табриклашган, Мирзиёев Зеленскийга табрик йўллагани хабар қилинмаган.
Эрдўғон Путин билан Сочида учрашади
Туркия президенти Ражаб Тойиб Эрдўғон 4 сентябр куни Россиянинг Сочи курортида президент Владимир Путин билан учрашиб, биринчи навбатда Қора денгиздаги ғалла экспортини муҳокама қилади, деб хабар берди Рейтерс агентлиги 31 август, пайшанба куни Туркиядаги икки манбасига таяниб.
Икки давлат раҳбарлари Россиянинг Украинага ҳарбий аралашуви оқибатларини, шунингдек, Украина ғалласини Қора денгиз орқали экспорт қилиш имконини берувчи келишувни муҳокама қиладилар, деди манбалардан бири.
2022 йилда Туркия ва БМТ воситачилигида тузилган Қора денгиз дон келишуви Россия июл ойида чиқиб кетганидан сўнг якунига етди. Ўшандан бери Анқара Москвани келишувга қайтишга кўндиришга уринмоқда.
Қирғизистон Россия томонида урушган жангчига нисбатан чиқарилган ҳукмни бекор қилди
Бишкекдаги Қирғизистоннинг Олий суди Украинадаги жанговар ҳаракатларда Россия томонида қатнашгани учун аввалги маҳкамалар томонидан айбдор деб топилган Балиқчи шаҳрида яшовчи 31 ёшли Асқар Кубаничбек уулуга нисбатан чиқарилган ҳукмни бекор қилди.
Ёлланма аскар сифатида Украинада жанг қилгани учун май ойида у шу йилнинг январ ойида ҳибсга олинганди ва кейинроқ 10 йиллик қамоқ жазосига ҳукм қилинган эди. Суд маҳкамасида Асқар ҳарбий контрактни Россия паспортини олиш учун имзолаганини билдириб, ўз айбга иқрор бўлмаган. У жангларда иштирок этмаганини ҳам айтган. Олдинроқ Россия ҳукумати вакили Кирилл Кабанов унга рус паспорти берилишини талаб қилиб, Қирғизистон ҳукуматига уни озод этишни талаб қилган.
Бу мамлакатда фуқароларга хорижий ҳарбий можароларда қатнашишни тақиқловчи биринчи бундай ҳолат эди. Маълумки, Миллий хавфсизлик давлат қўмитаси яна камида иккита шундай жиноий иш очган.
Озодлик ҚИРҒИЗ ХИЗМАТИГА кўра, Украинадаги Россия қўшинлари таркибида камида 10 нафар Қирғизистон фуқароси ҳалок бўлган.
Митишчида Дмитрий Уткин "Вагнер" дафн этилди
Бугун Москва вилоятидаги Митишчи қабристонида авиаҳалокатда Пригожин билан бирга ўлган Вагнер қўмондонларидан бири Дмитрий Уткин дафн этилаётгани тахмин қилинмоқда.
Дмитрий Уткиннинг дафн маросими Митишчи мемориал қабристонида бўлиб ўтмоқда, деб хабар бермоқда МСК1.ру портали, хайрлашиш учун келган одамларга таяниб.
Уткиннинг дафн маросими эрталаб полиция томонидан ўралган қабристонда ўтказилиши ҳақида "Эхо Москвы" собиқ бош муҳаррири Алексей Венедиктов ҳам хабар берди.
Неонацист Дмитрий Уткиннинг ҳарбий лақаби - “Вагнер”, шу ташкилотга ном бергани айтилади.
“Вагнер” ХҲШ жангчилари Сурия, Африкадаги амалиётлар ва Украинадаги урушда иштирок этишяпти. Бу ёлланмалар кўплаб ҳарбий жиноятларни содир этганликда гумонланмоқда. 23 июнь оқшомида Пригожин ва “Вагнер” ХҲШ Россияда исён бошлашган ва бу исён қарийб бир сутка давом этган. Жорий йилнинг январь ойида АҚШ Молия вазирлиги “Вагнер” ХҲШни трансмиллий жиноятчилик ташкилоти ўлароқ тан олиб, ширкат ва асосчисига қарши (жами олти киши ва 12 та компания) санкциялар жорий қилган. Апрель ойида Европа Иттифоқи “Россиянинг Украинага қарши ҳарбий тажовузида фаол иштирок этгани” учун “Вагнер” ХҲШни санкция рўйхатига киритган эди. Литва ва Франция парламентлари ХҲШни террор ташкилот дея тан олишган.