Кремль Пригожин учоғининг қулашига алоқадорлигини рад этмоқда
Кремль Москва яқинидаги учоқ ҳалокатига алоқадорлигини рад этди. 23 август кунги авиаҳалокат оқибатида президент Владимир Путинни танқид қилиб келган ва қуролли қўзғолон кўтарган “Вагнер” ёлланма гуруҳи раҳбари Евгений Пригожиннинг ҳалок бўлгани хабар қилинди.
Президент Путиннинг матбуот котиби Дмитрий Песков 25 август куни бўлиб ўтган брифингда 23 августдаги автоҳалокатда ҳалок бўлган 10 кишининг шахсини аниқлаш бўйича экспертиза ўтказилаётгани ва ҳалокат бўйича тергов давом этаётганини урғулади.
Айни пайтда, Песков учоқ ҳалокати Пригожинни ўлдириш учун уюштирилгани ҳақидаги фаразларни ёлғон, деб атади.
"Ҳозир бу самолёт ҳалокати теграсида роса спекуляция кучайди, айниқса унинг ичида ўлган 10 киши, хусусан Евгений Пригожин ҳақида. Албатта, Ғарбда бу спекуляция бизга маълум ёндошув билан авж олмоқда. Буларнинг ҳаммаси ғирт ёлғон ва бу воқеани ёритишда мутлақ фактларга таяниш зарур”.
Россиялик терговчилар содир бўлган воқеа юзасидан суриштирув олиб бормоқда, бироқ улар гумон қилаётган учоқнинг тўсатдан Москва осмонидан қулаб тушишига нима сабаб бўлганини ҳозирча айтишмаган, вайроналардан топилган 10 та жасаднинг шахси расман тасдиқланганича йўқ.
Пригожиннинг исми ва фамилияси самолёт бортидаги йўловчилар рўйхатида келтирилган, бироқ унинг Москва шимолида сирли равишда ҳалокатга учраган учоқда бўлгани ҳануз расман тасдиқлангани йўқ.
“Тақдири мураккаб бўлган иқтидорли киши” – Путин Пригожиннинг ўлимини билвосита тасдиқлади
Россия президенти Владимир Путин Тверь вилоятидаги авиаҳалокатда “Вагнер” хусусий ҳарбий ширкати асосчиси Евгений Пригожин ўлганини билвосита тасдиқлади.
“Пригожинни жуда узоқдан бери, 90-йиллар бошларидан бери билардим. У мураккаб тақдирли киши эди, унинг хатолари ҳам жиддий бўлган, лозим бўлган натижаларга ҳам эриша билган. У бундай натижаларга ўзи учун ҳам, мен ундан илтимос қилганда ҳам, сўнгги ойларда бўлгани каби умумий ишимиз учун эришар эди. У иқтидорли инсон, қобилиятли тадбиркор эди”, дея билдирган Россия президенти.
Путин учоқ қулаши чоғида ҳалок бўлган барчанинг оила аъзоларига ўз таъзиясини билдириб, Россия Тергов қўмитаси ҳодиса бўйича дастлабки терговни бошлаганини маълум қилган.
Россия президентига кўра, дастлабки маълумотлар Тверь вилоятида қулаган учоқда “Вагнер” гуруғи ходимлари бўлганидан далолат бермоқда.
“Авиаҳалокат тергови тўла ҳажмда олиб борилади ва охирига етказилади”, деган ўз сўзи якунида Владимир Путин.
Зеленский Пригожин учоғининг қулашига Киевнинг алоқаси йўқлигини билдирди
Йўловчилари рўйхатида “Вагнер” ХҲШ раҳбари Евгений Пригожин бўлган хусусий учоқнинг қулашига Киевнинг алоқаси йўқ. Бу ҳақда Украина президенти Владимир Зеленский билдирди.
“Бизнинг бунга алоқамиз йўқ. Бунга кимнинг алоқаси борлиги ҳамма тушуниб турибди”, дея иқтибос келтирган Зеленский сўзларидан “Интерфакс-Украина” агентлиги.
Украина президенти офиси раҳбарининг маслаҳатчиси Михаил Подоляк ҳам Настояшчее Время ёйинида Киев Пригожиннинг муҳтамал ўлимига алоқадор эмаслигини билдирган.
“Келинг, воқеага холисона қараб кўрамиз. Уни баҳолаш учун путинча бўлмаган мантиққа эга бўлиш лозим. Биз учун Пригожин сўнгги ойларда Россиянинг классик пропагандистик афсоналарини (жумладан бевосита Путин билан боғлиқ тўқималарни ҳам) йиқувчидай кўринаётганди. Пригожиннинг тўнтариши якунига етмаган бўлса ҳам, унинг вазиятдан қониқмаслиги ҳеч қаерга йўқ бўлиб қолмагани аниқ. У Путин вертикали учун деструктив ролни мутлақо аниқ ўйнаётганди ва ўйнашда давом этаётганди. Шубҳасиз, бу ҳолат бизни қониқтираётганди”, дея қайд этган Подоляк.
Украиналик мулозимга кўра, Пригожиннинг намойишкорона йўқ қилиниши, биринчидан, элита устидан назоратни қисман қайтариб олиш, Путиннинг қаттиққўл одам ўлароқ эътиборини тиклаш учун керак бўлган.
“Ва, шундан келиб чиққан ҳолда, бу Путин “замонавий Россиянинг бетакрор ягона йўлбошчиси” деган афсонани қайта тиклаш учун лозим эди. Менимча, бу мақсадларнинг ҳаммасига эришиб бўлмайди. Аксинча, бу воқеалар элита ичидаги ички бўлинишни янада кучайтиради ва улар орасидаги ихтилофларни янада таранглаштиради”, деб ҳисоблайди Михаил Подоляк.
Беларусда “Вагнер” ХҲШ лагери бузиляпти
Беларуснинг Осиповичи шаҳри яқинидаги “Вагнер” хусусий ҳарбий ширкати жойлашган лагерь бузилмоқда. Бу ҳақда Озодликнинг беларус хизмати сунъий йўлдош тасвирларига таянган ҳолда хабар қилди.
Қайд этилишича, 23 августга келиб лагерда вагнерчилар яшаган 273 та чодирдан 101 таси олиб ташланган. Чодирларни бузиш 1 августдаёқ бошланган эди.
Чап томондаги тасвирда лагердаги 1 августгача бўлган ҳолат, ўнг тарафдагисида эса 23 августдаги ҳолат акс этган.
“Агар ҳар бир чодирда 20 га яқин жангчи жойлаштирилиши мумкинлиги эътиборга олинса, Цель қишлоғидаги ҳарбий қисм ҳудудида яшаган 5 минг вагнерчидан 2020 га яқини лагерни тарк этганини айтиш мумкин”, дейилган Озодликнинг беларус хизмати хабарида.
Бузилган чодирлар қаерга олиб кетилгани ҳамда “Вагнер” ёлланмалари Беларусь ҳудудини тарк этган-этмагани маълум эмас.
“Вагнер” ХҲШга алоқадор телеграм-каналлар жангчиларнинг бир қисми Россиядаги уйларига узоқ муддатли таътилга йўлланаётгани ҳақида ёзишмоқда, бироқ, афтидан, ҳамманинг ҳам таътилга кетишига рухсат берилаётгани йўқ. Шунингдек, пабликларда ХҲШ жангчилари Африкага олиб кетилаётгани ҳақида ҳам хабарлар чиққан.
Вагнерчилар Беларусга шу йилнинг 23 июнь куни Евгений Пригожин етакчилигида бошлатилган ва 24 июндаёқ ниҳояланган исён ортидан кўчирилган эди.