Украина дрони Россиянинг Курск шаҳридаги темир йўл вокзалига зарба берди
Беш киши ойна синиқларидан енгил жароҳатланган. Вилоят маъмурияти портлашга Украина дрони сабаб бўлганини иддао қилди.
Курск вилояти губернатори Роман Старовойт дрон козал биносига урилиб, томда ёнғин пайдо бўлганини тасдиқлади. Воқеа жойида қутқарув хизматлари ишламоқда, жабрланганларга ёрдам кўрсатиляпти.
Россия Мудофаа вазирлиги муҳтамалан Москва шаҳрига йўл олган учоқ типидаги яна бир дрон Москва вилоятида уриб туширилганини маълум қилди. Жабрланганлар ва вайронагарчилик йўқ.
Курск вилояти, Россиянинг Украинага чегарадош бошқа ҳудудлари сингари сўнгги пайтларда тез-тез артиллерия ва дронлар ҳужумига йўлиқмоқда. Киев бу ҳужумларга изоҳ бермайди.
Швеция Украинага ҳарбий ва молиявий ёрдамни давом эттиради
Швеция бош вазири Ульф Кристерссон шанба (19 август) куни, Россия томонидан Чернигов шаҳрига ракета зарбаси берилиши манзарасида Киевни ҳарбий дастаклаш масалаларини муҳокама қилиш мақсадида Украина президенти Владимир Зеленский билан учрашди.
Кристерссон Харпсунде қароргоҳида ўтказилган қўшма матбуот анжуманида Зеленскийга ҳамдардлик билдирди.
“Бугунги мунозараларимиз, шак-шубҳасиз, Швеция, Европа ва сизни қўллаб-қувватлаётган бошқа мамлакатлар нима қилса сизга янада яхшироқ ёрдам бера олиши мумкинлиги ҳақида бўлди. Маълумингизким, Швеция ўтган йилнинг февралидан бери Украинага 2,2 млрд евролик кўмак берди. Ва биз, Украинанинг эҳтиёжларини қанча керак бўлса шунча қондириш учун сизлар билан ва умумий ҳамкорларимиз билан яқин мулоқот асосида сиёсий, ҳарбий, гуманитар ва молиявий ёрдамни давом эттирамиз”, дея таъкидлади Швеция бош вазири.
Швеция Украинага танклар, зенит тизимлари ва Тype 90 русумли зирҳланган пиёдалар жанговар машиналари етказиб бериш билан унинг мудофаасига кўмаклашмоқда.
Зеленский Швеция билан Грипен қирувчи самолётлари борасида музокаралар олиб бормоқда
Украина Швеция билан Грипен қирувчи самолётларини олиш имкониятини муҳокама қилишни бошлади, дея маълум қилди Владимир Зеленский Стокголмда берган интервюсида.
Зеленский Швеция бош вазири Улф Кристерссон билан учрашганидан кейин бу ҳақида гапирди:
“Биз яна бир кучли швед машинаси – Грипен қирувчи самолётлари ҳақида гаплашдик. Бу Швециянинг фахри. Ишончим комил, Грипен билан эркинлигимизни яхшироқ ҳимоя қиламиз”.
Украиналик учувчилар аллақачон Грипен билан тайёргарлик машқларини олиб бормоқда.
Швеция Украинага танклар, зенит тизимлари ва зирҳли пиёда жанговар машиналарини етказиб бериш орқали ёрдам кўрсатиб келмоқда.
Швеция мудофаа вазири Пал Жонсон Украинага 313,5 миллион долларлик асосан ўқ-дорилар ва аввал етказиб берилган техникаларнинг эҳтиёт қисмларидан иборат янги ҳарбий ёрдам пакети ажратилишини маълум қилди.
Мазкур ёрдам Швециянинг уруш бошланганидан бери Украинага кўрсатган 13-ёрдам пакети бўлади ҳамда Стокголмнинг Киевга берган ёрдам ҳажми 1,8 миллиард долларга етади.
Украин учувчилари, инженерлари ва техниклари F-16 қирувчиларида тайёргарликни бошлади
Бу ҳақда Украина мудофаа вазири Алексей Резников маълум қилди, деб ёзади РБК-Украина.
Вазир учоқ коалициясига 11 ҳамкор мамлакат кирганини урғулаган. Украин учувчилари, техник ва инженерларини ўқитиш лойиҳасида етакчиликни Нидерландия ва Дания ўз зиммасига олган. Дастур доирасида украин ҳарбийларига инглиз тили ҳам ўргатилади.