Черниговга ҳужумда яраланганлар Россия ҳужумининг даҳшатлари ҳақида гапирди
Россиянинг ракета зарбаси оқибатида 7 киши, жумладан, 6 ёшли бола ҳалок бўлган шаҳар маркази жасадлардан тозаланган бироқ Чернигов театри олдидаги ерда қон излари қолган.
Украина ички ишлар вазирлигининг маълум қилишича, ракета келиб тушган вақтда одамлар православ байрамини нишонлаш учун черковга кетаётган бўлган. Кейинроқ эълон қилинган баёнотда ярадорларнинг 15 нафари болалар, 15 нафари эса полиция ходимлари экани маълум бўлди.
“Мен ишда эдим. Бир лаҳзада портлаш бўлди ва устимизга плита тушди. Дўстим билан ўтирган эдим. У келганига эндигина 5 дақиқа бўлган эди. Агар у бўлмаганида, омон қолмасдим - у мени ташқарига тортиб олди. Шундан сўнг ёнғин чиқди. Дўстим мен учун нажот фариштаси бўлди” , дейди яраланган аёллардан бири.
Ҳужум натижасида театрнинг том қисми ўпирилиб тушган. Қўшни турар-жой бинолари ва дўконларнинг эшик деразалари синиб кетган.
“Бу даҳшатнинг ўзи. Бу ерда ярадорлар, тез ёрдам машиналари ва шиша синиқлари ётар эди. Худди даҳшатли тушга ўхшайди", дейди Валентина.
Украина оммавий ахборот воситаларининг хабар беришича, ҳужум пайтида театрда дрон ишлаб чиқарувчилар иштирокида оммавий тадбир ўтказилаётган бўлган. 18 ойлик уруш мобайнида иккала томон ҳам дронлардан жанг майдонида фаол фойдаланиб келади.
Украин волонтёрлари экскаваторни далаларни минадан тозалаш машинасига айлантиришди
Украина ерларига Россия босқинчилари жуда кўп мина қадаб ташлаган. Босқинчилардан озод қилинган ерларда деҳқончиликни давом эттириш мушкул бўлиб боряпти. Украиналик кўнгиллилар майдонларни миналардан тозалаш учун ўзлари машина ишлаб чиқдилар:
«Машинанинг иш принципи мана бу занжирларнинг ерга урилишига асосланади. Айланиш тезлиги уларнинг ерга 1000 кг юк билан урилишини таъминлаб беради. Яъни, зарба чоғида ҳар қанақа мина – пиёдаларга қарши миналар ҳам, танкка қарши миналар ҳам портлайди. Занжир ўрнига ерни ағдарадиган тишларни ҳам ўрнатиш мумкин», дейди машина инженери Виталий.
Миналарни зарарсизлантириш бўйича ҳарбий эксперт Владимир Озорян бирорта ҳам мина қолиб кетмаслик учун ҳаракат қилишаётганини айтади:
«Биз қурилмани зарар бериш радиуси анча катта бўлган ОЗМ-72 пиёдаларга қарши миналарида синаб кўрдик. Парчаланувчан-тўсувчи тоифали ушбу минани сапёрлар “жодугар” деб аташади. Мина парчаларининг изларини ҳимоя экранида кўришингиз мумкин. Ушбу машина занжирларига боғланган тошлар зарбаси шу қадар бўлиши керакки, биронта ҳам мина қолиб кетмасин. Танкка қарши миналар ҳамда ПМН пиёдаларга қарши миналарининг детонаторлари диаметрини ҳисобга олиб, уларни 100 фоиз йўқ қилишимизга керак, деган қарорга келдик. Биз миналарни яна тракторлар занжирлари остида ҳам портлатамиз, токи биронта ҳам мина ерда қолиб кетмасин. Машина қисмларининг бардошлилигини қайта-қайта текширамиз, энг асосийси – оператор кабинаси жуда яхши ҳимояланган».
Машина масофадан бошқарилади, оператор хавфсиз жойда ўтиради
«Ҳар бир портлашдан сўнг оператор машинани орқага қайтариб, занжирлар ёки тишларнинг ҳолатини текширади, занжирлар ёки тишлар шикастланган бўлса, алмаштириш керак», дейди Виталий.
Экспериментал машина ҳозирча полигонда синовдан ўтказилмоқда. У Украинани миналардан тозалашга ўз ҳиссасини қўшиши керак.
Украина расмийларига кўра, мамлакат ҳудудининг қарийб 30 фоиз қисми миналанган. Муаммони бартараф этишга ўнлаб йиллар керак бўлиши айтилмоқда
Россия миналаридан шу пайтгача 200 нафардан ортиқ тинч аҳоли ҳалок бўлди.
Черниговга ҳужум, 7 киши ҳалок бўлди, шаҳарда мотам
Черниговда Россиянинг ракета ҳужумидан 7 киши, жумладан, олти ёшли бола ҳалок бўлди.
Украина расмийларига кўра, жароҳатланганлар ва ҳалок бўлганларнинг аксарияти ҳужум вақтида ракета урилган драма театри ташқарисида бўлган.
"Биз бу уруш жиноятини аниқ ҳужжатлаштиришимиз керак. Бу Россиянинг инсониятга қарши жиноятларини исботловчи холатларнинг бир қисми”, деди Украина ички ишлар вазири Игор Клименко.
Черниговда 19-21 август кунлари марҳумлар хотираси учун мотам кунлари эълон қилинди.
Черниговга ракета ҳужуми оқибатлари
Украина президенти Влодимир Зеленский Черниговга ракета ҳужуми оқибатлари акс этган видеони эълон қилди. Зарба шаҳар марказидаги Қизил майдонга тушди. Видеода шикастланган машиналар ва ўт ўчириш бригадаси тасвирланган.