Санкт-Петербургда рейд пайтида ушланган 100 га яқин мигрант ҳарбий комиссариат рўйхатига олинди
Санкт-Петербургда полиция Софийская сабзавот базасида ўтказилган икки кунлик рейддан сўнг, Россия фуқаролига эга 100 нафарга яқин мигрантни ҳарбий комиссариатга олиб бориб, ҳарбий ҳисобга қўйган.
Полиция Россия паспортига эга мигрантларни текшириш ва ҳарбий комиссариатларга олиб боришни миграция рейдлари доирасидаги “янги тадбир” деб атаган.
“Рейднинг асосий мақсади нуқтаи назаридан фуқароларнинг ушбу тоифаси оператив қизиқиш уйғотмайди. Аммо полиция фурсатдан фойдаланиб, фуқаролик нафақат ҳуқуқ, балки мажбуриятлар ҳам беришини, хусусан ҳарбий хизмат конституциявий мажбурият эканлигини россияликларга яна бир карра англатмоқчи бўлган”, дейилади Россия ИИВнинг Петербург ва Ленинград вилояти бошқармаси хабарида.
Инсон ҳуқуқлари кенгаши раиси Валерий Фадеев “Россиянинг янги фуқаролари нафақат ҳуқуқлар, балки мажбуриятларга ҳам эга”лигини, жумладан “Ватанни ҳимоя қилиш” уларнинг бурчи эканини таъкидлади. У мигрантларга Россия паспорти берилгани ҳамон уларни ҳарбий ҳисобга қўйишни таклиф қилди.
Полиция маълумотига кўра, полиция ходимлари қарийб 400 нафар чет эл фуқаросини аниқлаган, улардан 55 нафари миграция қонунчилигини бузган ҳолда Россия ҳудудида бўлган. Бир мигрантнинг ҳужжатлари қалбаки бўлиб чиққан, унга нисбатан РФ ЖКнинг 327-моддаси бўйича жиноят иши қўзғатилган.
Бир неча кун олдин Санкт-Петербургда яшовчилар ҳарбий комиссариатга келиш талаб қилинган СМС-хабарномалар олишаётгани тўғрисида маълум қилишган эди.
Чебоксари ва Новочебоксарскда ҳам яқинда Россия фуқаролигига ўтган, лекин ҳарбий ҳисобга кирмаган эркаклар ҳибсга олингани айтилмоқда. Улар мажбуран ҳарбий комиссариатларга олиб борилган. Ушланганлар ҳарбий ҳисобда туриш мажбуриятини бажармагани учун (РФ МҲтКнинг 21.5-моддаси) 500 дан 3 минг рублгача жаримага тортилиши мумкин.
Imagine Dragons украиналикларга ёрдам бермоқда
Американинг Imagine Dragons гуруҳининг яқинда Варшавада бўлиб ўтган концертида украиналик ўсмир, гуруҳнинг сўнгги клипларидан бирининг қаҳрамони, 14 ёшли Александр Згурский саҳнага чиқди.
Николаев вилоятининг Новогригоревка қишлоғидаги Сашанинг уйи рус армияси томонидан вайрон қилинган. Айнан ўша ерда мусиқачилар Crushed қўшиғи клипини суратга олишганди.
Энди Imagine Dragons мусиқачилари United24 маблағ йиғиш платформаси орқали Сашага уйини қайта қуришда ёрдам беришмоқда. Йигитча эса йиғилган маблағ Новогригориевкадаги мактабини ҳам таъмирлашга етарли бўлишини орзу қилади
"Украина қишда ҳам Ғарбдаги иттифоқчиларидан F-16 қирувчи учоқларини ололмайди"
Украина ҚК Ҳаво кучлари расмий вакили Юрий Игнат украин ТВ ёйинида шу ҳақда сўзлаб берди.
Мулозимга кўра, Украина F-16 қирувчи учоқларга катта умид боғлаган эди, чунки улар мамлакат ҳаво ҳужумига қарши мудофаа тизимини тўлдириб, Россия ракеталари ва дронларидан ҳимояланишга ёрдам берган бўлур эди.
Айни чоғда Игнат украин учувчилари ва техник ходимларини ўқитиш масаласида “ниҳоят, силжиш бўлган”ини урғулади. “Учувчиларимиз яқин орада тайёргарликни бошлаши тушунарли бўлди”, деди Ҳаво кучлари вакили.
Июлда Politico Дания ва Нидерландия бошлиқ 11 мамлакатдан иборат коалиция украин учувчиларини F-16 қирувчи учоқларини бошқаришга ўқитишни бошлашга тайёрлигини, бироқ АҚШнинг расмий рухсатисиз бу ишни қила олмаслигини хабар қилганди. Ўтган ҳафтада президент Жо Байден бунга рухсат берди.
Аммо, Politico маълумотига кўра, украин ҳарбийларини ўқитишга шайлигини билдирган 11 давлатдан ҳеч бири ҳозирча ўқув машғулотлари учун учоқлар ажратган эмас.
Украина Россия босқини бошидан бери жанговар авиациясининг катта қисмини йўқотди, шу боис Киев Ғарбдаги иттифоқчиларидан замонавий қирувчи учоқларни мумкин қадар тезроқ етказиб беришни сўрамоқда.
Шойгу ва Алёша
Россияда “Армия-2023” форуми бўлиб ўтмоқда, Москванинг Патриот боғида Украина билан уруш ҳақидаги кенг кўламли кўргазма ҳам ишга тушган. Улар янги дронларни, артиллерия қурилмаларини, зирҳли транспорт воситаларини ва танкларни, шунингдек, тиббий зирҳли транспортёр ва Исо Масиҳ ҳамда Z ҳарфи тасвири туширилган пуфланадиган ҳарбий дала ибодатхонасини кўрсатдилар.
Мудофаа вазири Сергей Шойгуга эса “Армия-2023” кўргазмасида “робот Алёша” намойиш этилди. Аммо "Алёша"нинг уни эшитмагани вазирга ёқмади.