Қўшма Штатлар норасмий мулоқот доирасида Эронни Россияга дронларни сотишни тўхтатишга ундамоқда
Қўшма Штатлар норасмий мулоқот доирасида Эронни Россияга Украинага қарши урушда қўлланиладиган дронларни сотишни тўхтатишга ишонтиришга ҳаракат қилмоқда. Бу ҳақда Вашингтон ва Теҳрон ўртасида жорий йилда Қатар ва Уммонда бўлиб ўтган билвосита музокаралар жараёнидан хабардор манбаларга таяниб,Financial Times хабар бермоқда.
Газетанинг қайд этишича, Вашингтон Эронга қарши янги санксиялар киритмасликка, шунингдек, Эрон нефти атрофидаги чекловларни қатъий бажармасликка ваъда берган.
Ўз навбатида, Қўшма Штатлар Теҳрондан уранни 60 фоиздан ортиқ бойитишни тўхтатишини ҳам кутмоқда.
Эрон расмийсига кўра, Эрон Қўшма Штатларни Европа давлатларини Ислом Республикасига нисбатан санкциялар босимини юмшатишга кўмаклашишига умид қилмоқда.
Украина Хавфсизлик хизмати Украинада ишлаб чиқарилган сувда сузувчи дронларни намойиш қилди
“Sea Baby” деб аталадиган экспериментал сув усти дронларини ишлаб чиқариш, Украина Хавфсизлик хизмати раҳбари Василий Малюкнинг сўзларига кўра, Россия босқинидан кўп ўтмай бошланган.
Малюк, шунингдек, дронлардан Қрим кўприги, Россия ҳарбий-денгиз кучларининг “Оленегорский Горняк” десант кемаси ва СИГ танкерига ҳужум қилиш учун фойдаланилганини айтди.
Россия қамалига қарамай дон юкланган кема Одесса портидан йўлга чиқди
16 август куни Украина аввалроқ эълон қилган «гуманитар коридор» орқали дастлабки юк кемаси Украинанинг Одесса портидан синов тариқасида йўлга чиқди.
Гонконг байроғи остидаги кема 16 август куни эрта тонгда Одессадан жўнаб кетди, деб хабар берди Украина бош вазири ўринбосари Александр Кубраков.
Мазкур кема ўтган йилнинг 23 февралида Одессага келган ва уруш бошлангани сабабли бери портда қолиб кетган.
Ўшанда кемада 30 минг тонна юк оғирликка эга 2 мингдан ортиқ контейнер бўлгани айтилган. Украина 8 август куни Черноморск, Одесса ва Пивденний портларида қолиб кетаётган кемалар чиқиб кетиши учун Қора денгизда гуманитар коридор ташкил қилишини эълон қилган эди.
16 август куни Одессадан жўнаб кетган кема 17 июлда ғалла келишуви тўхтаганидан бери портни тарк этган биринчи тижорий кема бўлди.
17 июль куни Россия Қора денгиз орқали Украина ғалласини экспорт қилишга мўлжалланган дон келишувдан чиққанини эълон қилди.
БМТ Россиянинг ҳаракатини кескин қоралаб, бу «дунёдаги муҳтож мамлакатларга зарба бўлишини» билдирган.
Дон битими тўхтаганидан бери Россия Одесса портига бир неча бор ҳаво ҳужумлари амалга оширди.
Одесса ҳарбий маъмурияти раҳбари Олег Кипер Россия 16 августга ўтар кечаси дронлар билан «Дунайдаги портлардан бирига ҳужум қилиб, ғалла омборларига зарар етказганини» маълум қилди.
Кипернинг айтишича, 11 та дрон уриб туширилган. Россия Украинанинг Қора денгиздаги портларига кетаётган кемаларни эҳтимолий ҳарбий юк ташувчи сифатида кўриши ҳақида огоҳлантирган.
НАТО Москванинг бу огоҳлантириши «нотўғри ҳисоб-китоблар ва эскалацияни шунингдек, навигация эркинлигига жиддий тўсиқларни келтириб чиқаради» дея баёнот берган.
Президент Зеленский Запорожьега борди
Президент Владимир Зеленский Мелитопол йўналишида қарши ҳужум амалиётларини олиб бораётган ҳарбийлар билан учрашди.
У юқори даражадаги ҳарбийлар билан учрашиб, улар билан фронтдаги асл вазиятни муҳокама қилгани хабар қилинди.
Сўнгги икки ойдан ортиқ вақт ичида Киев жабҳадаги қатор қишлоларни қайтариб олди, аммо йирик натижага ҳануз эриша олмади.
Айни пайтда Киев раҳбарияти жараёни улар кутганидан секин кетаётганини тан оларкан, бунга Россияда пухта тайёргарлик учун ортиқча вақт бериб қўйилгани ва қурол етишмаётганини сабаб қилиб келтирмоқда.