Россия ва Украина бир-бирининг ҳарбий объектларига зарба берганини даъво қилмоқда
Россия Мудофаа вазирлиги матбуот котиби Игор Конашенков Россия кучлари ўтган сутка давомида Украинанинг муҳим ҳарбий-саноат объектларига юқори аниқликдаги қуроллар билан зарба берганини маълум қилди.
Украинанинг Донецкдаги электрон уруш қурилмалари ва ҳаво ҳужумидан мудофаа пункти йўқ қилинди, деди Конашенков.
Россия Мудофаа вазирлиги шунингдек, Белгород вилояти ҳудудида Украина дронини уриб туширгани, қурбонлар ва моддий йўқотиш йўқлигини билдирди.
Ўз навбатида Украина Қуролли кучлари Бош штаби ҳам кундалик ҳисоботини эълон қилди. Унда айтилишича бир кунда душманга қарши жами 15 та жанговар ҳаракатлар бўлган.
Украина қўшинлари Мелитопол ва Бердянск йўналишида ҳужум операцияларни давом эттириб, Россия қўшинларининг шахсий таркиби, қурол-яроғ ва ҳарбий техникалари жойлашган нишонларга зарба берди, дейилади бош штаб ҳисоботида.
Озодлик уруш шароитида томонлар бераётган маълумотларни мустақил манбалардан тезкор тасдиқлаш имконига эга эмас.
Украина мудофаа вазирлиги: Урожайне озод қилинди
Украина мудофаа вазири ўринбосари Анна Маляр «Урожайне озод қилинди», деб ёзди ўзининг телеграмдаги каналида.
Маляр келтирган маълумотларини мустақил равишда текширишнинг имкони бўлмади. Россия бунга дарҳол изоҳ бермади.
Украина қарши ҳужумни кучайтирар экан, сўнгги кунларда Урожайне ва қўшни Старомаёрске қишлоқлари қаттиқ жанглар марказига айланди.
Бу икки ҳудуд Донецк вилоятининг Россия назорати остидаги ҳудудлари билан Украина жанубидаги Мариупол ва Бердянск портларини боғловчи муҳим йўналиш ҳисобланади.
Санкт-Петербургда яшовчилар ҳарбий комиссариатга келиш талаб қилинган хабарномалар ола бошлади
Бу ҳақда душанба куни Петербургга оид “Ротонда” Телеграм-канали ҳамда эркакларга армия хизматидан қутулиб қолишга кўмаклашувчи “Идите лесом” инсон ҳуқуқлари лойиҳаси маълум қилди.
“Ротонда”нинг шаҳар туманларидан бирида мулозим бўлиб ишловчи манбаси ҳарбий комиссариатлар “кузги чақирув олдидан маълумотларни тузатиш ва аниқлаштириш” мақсадида хабарномалар тарқатаётганини тасдиқлаган.
Унинг айтишича, СМС-хабарномалар қонун бўйича чақириқ хабарномаси ҳисобланмайди, бинобарин хабарномага биноан комиссариатга бормаслик маъмурий жазога тортиш учун асос бўлиши мумкин эмас. Муддатли ҳарбий хизматга чақирув ҳозирда йўқ. Кузги чақирув 1 октябрда бошланиши белгиланган.
Яқинда Давлат Думаси қонунчиликка ўзгартишлар киритиб, чақирув хабарномаси олинганидан сўнг ҳарбий комиссариатга бормаганлик учун жаримани бир неча бараварга оширган эди.
Зеленский жабҳа чизиғига борди
Владимир Зеленский 14 август куни Донецк вилоятидаги жабҳа чизиғига борди ва Украина Қуролли Кучларининг “Соледар” оператив-тактик гуруҳи жавобгар ҳудудда ҳужум ҳаракатларини олиб бораётган саккиз бригада штабларида бўлди.
Зеленский сафар асносида бригадалар жавобгар ҳудудлардаги оператив вазият ҳамда турли қуроллар қўлланишининг ўзига хос жиҳатларига доир ҳисоботларни тинглади.
“Мен ҳар куни умумий маълумот оламан, у вазиятни кенгроқ тушунишимга ёрдам беради. Бу жуда муҳим. Хуллас, барча бригадаларни бирма-бир айланиб, ҳар бирида қандай муаммолар борлигини билмоқчи бўлдим. Очиқ суҳбатлар бўлди, биз турли-туман масалаларни муҳокама қилдик”, деб ёзди президент.
Зеленский Бахмут йўналишида яраланган украин аскарларини қабул қилувчи дала вақтинчалик тиббий ёрдам масканида ҳам бўлди, муассаса биносини ва жиҳозларини кўздан кечирди, ярадор жангчилар ва тиббиётчилар билан мулоқот қилди.