Урожайное учун жанглар
Куни кеча Россияга оид ҳарбий блогларда Россия армияси Донецк вилоятидаги Урожайное қишлоғини бой бергани ҳақида хабарлар пайдо бўлди.
Мазкур қишлоқ Россия мудофаасининг Украина ҳужум қилаётган асосий йўналишлардан биридаги таянч пункти ҳисобланади. Украинага оид манбалар қишлоқ озод этилгани ҳақида маълум қилгани йўқ.
Ҳужум жанубда, Великая Новосёлка посёлкасидан Мокрие Яли дарёсининг иккала соҳили бўйлаб Бердянск ва Мариуполга томон олиб борилмоқда.
Украина кучлари бутун фронт бўйлаб чўзилган Россия мудофааси оралаб секин-аста илгарилаб, Урожайное қишлоғидан бир неча километр жанубдаги Старомлиновка аҳоли пункти ҳудудидан ўтган асосий мудофаа чизиғига яқинлашди.
Украина армияси фронтнинг турли қисмларидан ҳужум қилиб, афтидан, Россия армиясини захира кучларни урушга ташлаб, фронт ичкарисини бўш қолдиришга мажбур этмоқда – бу мудофаани ёриб ўтиш учун потенциал имконият яратади.
Урожайное учун оғир жанглар бир неча кун давом этди, Украина кучлари қишлоқнинг шимолий қисмини эгаллади, Россия қўшинлари эса жанубий қисмида мудофаага ўтган.
Украина Каховка тўғони вайрон бўлганидан кейин сув таъминотини тиклаш учун қувурлар ётқизмоқда
Июнь ойида Каховка тўғони вайрон бўлгач, бир миллионга яқин аҳоли ичимлик суви ва оқова сувдан маҳрум бўлди. Мазкур лойиҳа қишлоқ аҳолиси, уларнинг чорва моллари ва асосан деҳқончиликка ихтисослашган ҳудудни сув билан таъминлаши айтилмоқда.
Бу сувдан овқат тайёрлаймиз, идишларни ювамиз, умуман ҳамма нарсада сувдан фойдаланамиз. Яхшиямки, бизда ҳозир сув бор. Икки кундан сув бўлмади. Сувсиз яшаш жуда қийин. Овқат пишириш учун дўкондан сув сотиб олишга тўғри келди», дейди маҳаллий турғун Надия.
Украина реставрация ва инфратузилмани ривожлантириш агентлиги раҳбари Мустафо Наимнинг сўзларига кўра, Кривой Рог ва унинг атрофидаги қишлоқлар аҳолисини тоза сув билан таъминлаш учун 350 километр узунликдаги қувурлар ётқизилиши керак:
“Ингулетс дарёси ва Кривой Рогга туташадиган қисм тугалланди, ер устидаги ишлар деярли 100% бажарилди. 2 ҳафта ичида биринчи тармоқни ишга туширамиз ва Кривой Рогни қисман сув билан таъминлаймиз».
Икки ҳафта ичида янги қурилган сув тизими орқали Кривой Рогга сув етказиб берилиши режалаштирилмоқда.
Украинлар урушдан бир оз дам олишлари мумкин – Одесса пляжлари очилмоқда
Украинанинг Қора денгиз бўйидаги энг йирик шаҳри бўлмиш Одесса маъмурияти Россия босқини бошланганидан бери илк бор пляжлар очилишига рухсат берди. Аммо ҳаво тревогаси чоғида денгизда чўмилиш ман қилинди.
“Ниҳоят, маза қилиб чўмилишни ва урушдан бир оз чалғиб, бошқа нарсалар ҳақида ўйлашни истайман. Уруш ва ёмон нарсаларни ўйлашни хоҳламайман. Ахир булар ҳақида жуда кўп ўйладим”, дейди 20 яшар талаба Евгений.
Россия 2022 йил февралда Украинага бостириб кирганидан бери унинг энг йирик порти ва ҳарбий-денгиз базаси бўлмиш Одессага кўп марталаб ракета ва дронлар билан ҳужум қилди. Қора денгиздаги Украина ҳудудий сувларига юзлаб денгиз миналарини сочиб ташлади.
“Пирслар орасида миналарга қарши тўр тортдик. Тўлқин саёзлик миналарини сув бетига чиқариши мумкин, улар қалқиб чиқади. Мина ичида портловчи модда бор, лекин мина сузувчан бўлиб, бир жойда турмайди. Бизнинг тўримиз эса кемаларга ва қайиқларга қарши миналарни ҳам тутиб қолади. Ҳаво очиқ бўлганида улар қирғоқдан бемалол кўринади. Шу тариқа қутқарув хизматлариминаларни тезда зарарсизлантириши мумкин”, дейди қутқарувчи ва собиқ ғаввос Олександр.
Ўтган ёзда пляжларда бир неча марта миналар портлаганидан сўнг, аҳоли хавфсизлигини ўйлаб соҳил чўмилувчилар учун ёпиб қўйилган эди.
Одесса губернатори Олег Кипер пляжларни очиш қарори Одессанинг фуқаровий ва ҳарбий маъмуриятлари томонидан бирликда қабул қилишганини айтди.
Мулозимга кўра, пляжлар эрталаб 8 дан оқшом 8 гача очиқ бўлади.
Яна бир рус зобити Литвада бошпана сўради
Унинг исми Иван Королев, артиллерия қўшинларининг лейтенанти. Королевнинг айтишича, у "Россия бошлаган қонли урушда" қатнашишни истамагани учун ватанини тарк этган.
Лейтенантнинг ББC мухбирига айтишича, у тўғридан-тўғри Украинада эмас, балки унинг қисми рус қўшинларини ўқ-дорилар билан таъминлаш билан шуғулланган.
У Литва билан чегарани ноқонуний кесиб ўтган ва 10 август куни Вилнюсдаги автовокзалда чегарачилар томонидан қўлга олинган. 11 август куни у миграция марказига жўнатилди, у бошпана ҳақидаги аризаси кўриб чиқилаётган вақтда у ерда қолади.
Июн ойида россиялик жанговар авиация учувчиси Дмитрий Мишов худди шундай йўл билан Литвага қочиб келганди.
У, шунингдек, Украина урушида қатнашишга рози эмаслигини маълум қилди. Ҳужжатлари кўриб чиқилаётган вақтда унга Литвада яшашга рухсат берилган.