Журналистлар Украинада 30 минг рус аскари ҳалок бўлганини тасдиқлашди
11 август, июль ҳолатига кўра, Украина билан урушда ҳалок бўлган 30 003 россиялик ҳарбийнинг исмлари аниқланган. Йўқотишларни ҳисоблаш BBC рус хизмати ва Медиазона кўнгиллилар жамоаси билан биргаликда амалга оширилади.
Рўйхатга фақат исмлари ва дафн этилган жойлари аниқ бўлган рус ҳарбийлари киради.
28 июлдаги олдинги хулосадан буён рўйхатга 1351 та янги ном қўшилган.
Тадқиқотчилар очиқ манбалар - маҳаллий маъмуриятлар, оммавий ахборот воситалари ва қурбонларнинг қариндошлари хабарлари, шунингдек, қабристонлардан олинган маълумотларга кўра ҳисоблашмоқда.
Йўқотишларнинг ҳақиқий кўрсаткичи, уларнинг фикрига кўра, уч баравар юқори бўлиши мумкин.
Шундай қилиб, жорий йилнинг май ойи охирида Медиазона ва Медуза нашрларининг ҳисоб-китоби урушда ҳалок бўлганлар сони 47 минг кишини ташкил этганини кўрсатди. Бу рақам журналистлар томонидан жанговар ёшдаги эркакларнинг ортиқча ўлими ҳақидаги маълумотларга асосланиб олинган.
Олдинги ҳафталарда бўлгани каби, ракета ва артиллериядан ўлган ҳарбий хизматчилар сонида аввалгидан бироз каттароқ ўсиш қайд этилди.
Сўнгги икки ҳафта ичида подполковник ва ундан юқори унвондаги тўрт нафар офицернинг ўлими ҳақида маълум бўлди. Ҳаммаси бўлиб ҳалок бўлган юқори мартабали зобитлар рўйхатида 284 киши бор.
Россия Мудофаа вазирлиги Украинадаги урушдаги йўқотишлар ҳақида расмий маълумотларни эълон қилмай келади. Охирги марта Россия расмийлари эълон қилган ҳисоботда 2022 йил сентабрида жами ўлганлар сони 5937 кишини қайд этилган эди.
2023 йил июн ойида Мудофаа вазири Сергей Шойгу Украинанинг қарши ҳужуми давомида Россия қўшинларининг бирлашган гуруҳи 71 ҳарбий хизматчини йўқотгани, яна 210 нафари яраланганини маълум қилган эди.
Зеленский деярли барча вилоят военкомларини ишдан олди
Украина президенти Владимир Зеленский деярли барча ҳарбий комиссариат раҳбарлари ишдан бўшатилишини эълон қилди.
Бу унинг Россиянинг Украинада 17 ойдан кўпроқ вақт олдин уруш бошланганидан бери коррупцияга қарши курашининг бир қисми сифатида кўрилмоқда.
Бу қадам Украина хавфсизлик хизматлари пора олиш ва коррупция айбловлари билан чақирув комиссияси мансабдор шахсларига қарши 112 жиноий иш тафсилотларини тақдим этганидан сўнг қабул қилинди.
Зеленский Телеграмдаги постида иш ўринлари уруш фахрийларига, жумладан, жароҳат олганларга ҳам берилиши кераклигини айтди.
“Ҳарбий чақирув комиссиялари мансабдор шахсларига нисбатан жами 112 та жиноий иш қўзғатилган. Вилоят, шаҳар ва туманлар чақирув бўлимлари бошлиқлари, ҳарбий соғлиқни сақлаш комиссиялари ходимлари ва бошқа мансабдор шахсларга нисбатан 33 та шубҳали баённомалар берилган. Турли ҳудудларда мансаб ваколатларини суиистеъмол қилиш ҳолатлари қайд этилган. Донецк, Полтава, Винница, Одесса, Киев, Львовда расмийлар нақд пул ёки крипто валютасида пора олганлар”, деди Украина раҳбари.
Зеленскийнинг айтишича, Украинанинг ҳарбий чақирув марказлари текширилганда, уруш давридаги тақиқларга қарамай, ҳарбий хизматга чақирувга лойиқ эркакларни чегарадан ўтказишгача бўлган жиноятлар аниқланган.
Киев Россиянинг кенг кўламли босқинига қарши курашаётган ва Европа Иттифоқига аъзо бўлишга интилаётгани сабабли, коррупцияга қарши курашни асосий устувор вазифа қилиб белгилаган.
Қрим кўприги яна ҳужумга тутилди
Қрим кўприги узра яна тутун. Хабарларга кўра, кўприк 12 август куни ракета ҳужумига тутилган, Россия расмийларига кўра ҳеч қандай зарар кўрмаган.
Аннексия қилинган Қримнинг Россия томонидан тайинланган раҳбари Сергей Аксёновнинг сўзларига кўра, ҳаво ҳужумидан мудофаа кучлари Украина Қуролли кучлари Қрим кўпригига ҳужум қилишга уринган иккита ракетани уриб туширган.
Украина қуролли кучлари: Запорожьега "Шаҳид"лар билан ҳужум қилинди
12 августга ўтар кечаси Россия кучлари жануби-шарқдан бешта “Шаҳед” билан ҳужум қилган. Бу ҳақда Украина Ҳарбий ҳаво кучлари маълум қилди.
Ҳаво ҳужумидан мудофаа кучлари Запорожье вилоятида учта зарба берувчи учувчисиз учоқни йўқ қилди, дея хабар беради Украина ҳарбийлари.
Уруш шароитида Озодлик урушаётган тарафларнинг даъволарини дарҳол текшира олмайди.