Бельгия фойдаланилган Леопард танкларини бошқа бир Европа давлатига сотди
Энди бу танклар Украинага етказиб берилади.
OIP Land Systems мудофаа компанияси бош директори Фредди Верслуйс Германияда ишлаб чиқарилган танкларни Бельгия ҳукуматидан бешйилдан олдин сотиб олган.
Фредди Верслуйснинг Рейтерс агентлигига билдиришича, у барча 50 та танкни бошқа Европа ҳукуматига сотган. Германиянинг Ҳанделсблатт газетаси қурол ишлаб чиқарувчи Рейнметалл компанияси танкларни сотиб олгани ва уларнинг катта қисмини Украинага экспорт қилиш учун тайёрлагани ҳақида ёзди.
Компания изоҳ беришдан бош тортди.
Леопард танклари 1960 йиллардан бошлаб Германиянинг Краусс-Маффей компанияси томонидан ишлаб чиқарила бошланган. Леопард1 Леопард 2 га қараганда енгилроқ ҳамда асосий қурол борасидан ҳам фарқ қилади.
Буюк Британиядан Россияга нисбатан янги санкциялар
8 август куни Буюк Британия Россия мудофаа саноатини чеклаш ҳамда унинг чет эл ҳарбий жиҳозларидан фойдаланишига барҳам бериш мақсадида санкциялар рўйхати кенгайтирилганини эълон қилди.
Янги чекловлар Беларус, Эрон, Туркия, Дубай, Словакия ва Швейцариядаги жисмоний ва юридик шахсларга нисбатан қўлланди. Буюк Британия ташқи ишлар вазири Жеймс Клеверли ушбу санкцияларни янги босқич деб атаб, улар Россия арсеналини янада қисқартиришини ва Владимир Путиннинг ҳарбий саноатига кўмаклашувчи таъминот занжирларига путур етказишини урғулади.
Қарорда жами 25 та янги санкция чоралари белгиланган бўлиб, улар, жумладан, Россиянинг жанг майдонида қўлланаётган ҳарбий техникалар учун электрон компонентларни импорт қилувчи уч ширкатига нисбатан жорий этилди.
Британиянинг “қора рўйхати”га тушганлар орасида Эроннинг дронлар ишлаб чиқарувчи Paravar Pars ширкати ва унинг етти нафар топ-менежери, шунингдек Туркиянинг микроэлектроника экспортига ихтисослашган икки ширкати мавжуд
Грозний ва Мариупол қардош шаҳарлар деб эълон қилинди
Чеченистон пойтахти Грозний ва Украинанинг босиб олинган Мариупол шаҳарлари қардош шаҳарлар деб эълон қилинди.
Тегишли келишувни Грозний мери Хас-Магомед Қодиров ва Мариупол оккупация бошқарувчиси Олег Моргун имзолади.
Қизиғи, иккала шаҳар ҳам - 1995 йилда Грозний ва 2022 йилда Мариупол - руслар томонидан тўлиқ вайрон қилингани рамзий маънога эга.
Москва яқинидаги Сергиев Посад шаҳрида портлаш юз берди
Портлаш лаҳзалари акс этган видеолар турли тармоқларда тарқалди.
Портлаш чоршанба куни эрталаб Загорск оптик-механика заводида юз берди. Ён атрофдаги турар жой биноларининг деразалари синган.
Портлаш ҳақидаги маълумотни фавқулодда хизматлар тасдиқлади. Портлашга “инсон фактори” сабаб бўлгани айтилмоқда. “ТАСС”нинг манбаларга таяниб хабар беришича, у ерда пиротехника воситалари солинган ангар портлаган. Завод ҳудудида пиротехника маҳсулотларини ишлаб чиқарадиган Пиро-Росс компаниясининг омбори жойлашган.
Телеграм каналлари, хусусан, “База”, Маш ва “112” маълумотларига кўра, қурбонлар бор – уларнинг сони 20 дан ортиқ, бу якуний рақам эмас. Расман 16 киши зарар кўргани тўғрисида хабар чиқди.
Загорск оптик-механика заводи, жумладан, ҳарбий маҳсулотлар, хусусан, танклар учун тунги оптик мосламаларни ишлаб чиқаради.