Зеленский Саудия Арабистонида бошланган музокараларда «халқаро тартибни тиклаш керак»лигини таъкидлади
Украина президенти Владимир Зеленский Киев Саудия Арабистонидаги музокаралардан натижа кутаётганини айтиб, қоидаларга асосланган халқаро тартибни тиклашга чақирди:
"Турли қитъалардан 42 давлат вакиллари йиғилди. Глобал масалаларга ёндашувлар ҳам турлича. Лекин барчани халқаро ҳуқуқ устуворлиги бирлаштиради. Шунинг учун ҳам Украина тинчлик формуласини таклиф қилди. Россия тажовузкорлиги сабаб бузилган қоидаларга асосланган халқаро тартиб қайта тикланиши керак.”
Жиддада бошланган 2 кунлик музокаларда АҚШ, Хитой ва Ҳиндистон сингари 40 давлат юқори мартабали дипломатлари иштирок этмоқда. Украина Ғарблик иттифоқчилари қаторида жаҳон иқтисодиётида муҳим ўринга эга глобал жануб давлатларининг ҳам қўллаб-қувватлашига эришишни мақсад қилган.
Россия учрашувда қатнашмаяпти, бироқ Кремль музокараларни диққат билан кузатиб боришини билдирган. Украина, Россия расмийлари ва халқаро экспертлар уруш давом этаётган бир шароитда Украина ва Россия ўртасида тўғридан-тўғри тинчлик музокаралари ўтказиш имкони йўқ.
Қозоғистон Бош прокуратураси Z ва V рамзларини тақиқлашни таклиф қилди
Қозоғистон Бош прокуратураси мамлакат ҳукуматига “этносиёсийлаштирилган рамзлар” туширилган товарларни тақиқлаш таклифи билан чиқди. Бунақа рамзлар жумласига “Вагнер” ХҲШ атрибутлари, “Армия России” ҳамда “Вежливие люди” ёзувлари, шунингдек Россиянинг Украинага босқини рамзлари бўлмиш Z ва V ҳарфлари киритилган.
Бу ҳақда “Атамекен” Қозоғистон тадбиркорлари миллий палатасига таянган ҳолда КазТАГ хабар қилмоқда.
Ижтимоий манфаатларни ҳимоя қилиш бўлими прокурори Қуат Бапиновга кўра, Бош прокуратура ташаббуси “жамиятда турлича қабул қилинаётган этник рамзиятлар” кўча-кўйда намойиш этилаётгани билан боғлиқ.
“Хусусан, 2022 йилда Россия-Украина можароси бошланиши муносабати билан Қозоғистонда ушбу рамзларни, шунингдек “Z” ва “V” ҳарфларини кийим-кечак, ўйинчоқлар ва транспорт воситаларида намойиш қилиш ҳолатлари кўпайди.
Савдо тармоқларида “Армия России” ва “Вежливие люди” ёзувли ўйинчоқлар сотилаётгани ва реклама қилинаётгани фактлари қайд этилмоқда”, дея Бапиновдан иқтибос келтиради КазТАГ.
Бош прокуратура Қозоғистонда қуролли низоларда ёвлашаётган томонлар фойдаланаётган рамзлар акс этган молларни тайёрлаш, ташиш ва тарқатишни бутунлай тақиқлашни, мазкур тақиқни бузганлик учун эса маъмурий жавобгарлик жорий этишни таклиф қилмоқда.
Булардан ташқари Курдистон ишчилар партияси ҳамда “Шарқий Туркистон” рамзлари ҳам тақиқланиши мумкин.
Жиддада “глобал тинчлик саммити” иш бошлади
Украина президенти Владимир Зеленский Саудия Арабистонида очилган “глобал тинчлик саммити” Украинадаги урушни тинч йўл билан ҳал қилиш бўйича музокаралар учун муҳим қадам эканлигини айтди.
"Мен Саудия Арабистонидан музокаралар учун майдон тақдим этгани учун миннатдорман. Яқинда Копенгагенда ҳам худди шундай форматда учрашув бўлди. Биз босқичма-босқич “Тинчлик учун глобал саммит” сари интиляпмиз. Дунё буни тушуниши жуда муҳим. Россиянинг агрессиясига адолатли чек қўйиш керак. Украина ерларини босқинчилардан озод қилиш халқаро ҳуқуқ ва БМТ Низомига тўлиқ мос келади. Россиянинг Украина ва жаҳон хавфсизлигига таҳдидини бартараф этиш халқаро тинчликни тиклаш демакдир. Тинчлик формуласини қўллаб-қувватлаган ва тинчлик формуласини тўлиқ амалга ошириш учун биргаликдаги саъй-ҳаракатларга қўшилган барчага миннатдорчилик билдираман”, - деди Зеленский.
Украина ва Ғарб дипломатлари Жиддада 40 га яқин давлатнинг миллий хавфсизлик бўйича маслаҳатчилари ва бошқа юқори мартабали мулозимларининг учрашувида Россиянинг Украинадаги урушини тўхтатиш бўйича келажакдаги тинчлик келишувининг асосий тамойиллари келишиб олинишига умид қилмоқда.
Зеленский ва унинг жамоаси иттифоқчилар билан урушни тугатиш бўйича келишувга асос бўладиган тамойилларни маъқуллайдиган “тинчлик саммити”ни кенг қўллаб-қувватлаш устида ишламоқда.
Саммит ўтган йилнинг кузида Киев томонидан илгари сурилган, Зеленский фаол илгари сурган 10 банддан иборат режага асосланади.
Унинг тинчликка бўлган қарашлари Украина ҳудудий яхлитлигини тўлиқ тиклаш ва Россия қўшинларини тўлиқ олиб чиқиш, озиқ-овқат ва энергия хавфсизлигини таъминлаш, ядро хавфсизлиги, барча маҳбусларни озод қилиш ва бошқа бандларни талаб қилади.
Крис Кристи Киевда Зеленский билан учрашди
АҚШ президентлигига Республикачилар партиясидан номзод бўлиш учун курашатган Крис Кристи Украинага ташриф буюрди, Киевда президент Владимир Зеленский билан учрашди.
У АҚШ Киевнинг Россияга қарши курашини қўллаб-қувватлаши тарафдори эканини айтди.
Бир пайтлар собиқ президент Доналд Трампнинг иттифоқчиси бўлган Кристи ҳозирда ўз партиясидан 2024 йилги президентликка номзодлик учун курашмоқда.
Ню-Жерси штатининг собиқ губернатори Буча шаҳридаги оммавий қабрни зиёрат қилди, кейин Зеленский билан президент саройида учрашди.
АҚШ Украинани қўллаб-қувватлайди ва қўллаб-қувватлашда давом этиши керак, деди Кристи