СБУ раҳбари Россия кемаларига ҳужумларни Украина уюштирганини тан олди
СБУ раҳбари Василий Малярнинг сўзларига кўра, Россия кемаси ёки Қрим кўпригидаги ҳар қандай “портлаш” “душманга қарши мутлақо мантиқий ва самарали қадамдир”.
"Бундан ташқари, бундай махсус операциялар Украина ҳудудий сувларида амалга оширилади ва бутунлай қонунийдир. Шундай қилиб, агар руслар "портлашлар" тўхтатилишини хоҳласалар, улар бунинг учун ягона вариантни қўллашлари керак - Украина ва бизнинг ҳудудий сувларни тарк этишлари керак. Қанчалик тезроқ қилишса, улар учун шунчалик яхши бўлади. Чунки биз бу урушда душманни тўлиқ мағлуб этамиз”, - дея қўшимча қилди Маляр.
SIG танкери сўнгги бир кун ичида украин дронига тутилган Россиянинг иккинчи кемасидир.
Жумага ўткар кечаси Украина ҳарбий-денгиз кучларининг дрони Қора денгизнинг қоронғу сувларида бир кеча-кундузда сузиб ўтиб Россия ҳарбий кемасини шикастлаган эди.
Манбалар Россия ҳарбий-денгиз кучларининг Новороссийск базасига ҳужумда жиддий зарар кўргани ҳақида хабар қилган эди.
Ҳужум ортидан дунёдаги нефт таъминотининг 2 фоизини ўз ичига олган ва шунингдек, дон экспорт қиладиган фуқаролик порти барча кемалар ҳаракатини вақтинча тўхтатди.
Россия Мудофаа вазирлиги дронлар йўқ қилинганини даъво қилган, аммо ҳеч қандай зарар ҳақида гапирмаган.
Украина разведкасидаги манбанинг айтишича, “Оленегорский Горняк” кемаси дрон ҳужумида жиддий шикастланган ва энди жанговар топшириқларни бажара олмайдиган аҳволда.
Операция Украина ҳарбий-денгиз кучлари ва СБУ разведка хизмати ўртасида биргаликда амалга оширилган.
Кема урилганда бортида 100 га яқин россиялик ҳарбий хизматчи бўлган.
Қора денгиз ва унинг атрофида кескинлик Россия ўтган ой Украина портларидан ғалла хавфсиз экспорт қилиш имконини берувчи келишувдан чиққанидан кейин кучайди.
Ўшандан бери Россиянинг учувчисиз учоқлари ва ракеталари Қора денгизда ёки яқинида Украина порт объектлари ва дон силосларига бир неча бор зарба берган.
Россия, шунингдек, Қора денгизда Украина ҳарбий-денгиз кучларининг учувчисиз учоқлари томонидан ўз ҳарбий кемаларига ҳужум уюштиришга уринишлар сони ортгани ҳақида хабар берди.
Зеленский: "Уруш Россияга қайтмоқда"
Украина президенти Владимир Зеленский ўзининг кундалик видеомурожаатида жума куни Украина Хавфсизлик хизматига “урушни тажовузкор давлатга қайтаргани учун” миннатдорчилик билдирди.
Бир кун аввал Украинанинг сув дронлари Новороссийскга ҳужум қилди, бунинг натижасида Россиянинг “Оленегорский Горняк” йирик амфибия кемаси зарар кўрди.
Жума куни эрталаб "Озодлик" радиоси украин хизмати Украина манбаларига таяниб, ҳужум СБУ томонидан тайёрланаётгани ҳақида хабар берган эди.
Керч бўғозида рус танкери дрон ҳужумига тутилди, кема шикастланди
Керч бўғозида Россия байроғи остидаги SIG танкери дрон ҳужумига учради. Ҳужум оқибатида кема шикастланди. Бу ҳақда 5 августга ўтар кечаси Россия ва Украина Телеграм каналлари хабар берди.
Кейинчалик бу маълумотни ҳужумда Украинани айблаган Россия расмийлари тасдиқлади.
Танкер машина бўлими ҳудудида тешик ҳосил бўлган, деб хабар берди "Росморречфлот". Ёқилғи тўкилмаган, экипаж хавфсиз, дея билдирди Новороссийск қутқарув ва мувофиқлаштириш маркази. Расмий маълумотларга кўра, кема бортида 11 киши бўлган.
Аввалроқ Телеграм каналлари, денгизчиларнинг музокараларини эълон қилган эди. "Ўзимиз ҳаракатлана олмаймиз. Эвакуаторсиз. Машинани сув босган. Раҳбарият у ерда нима ҳал бўлишини билмайди. Қандайдир йўл билан заводга боришимиз керак", - дейди телеграм каналларида тарқалган аудиода экипаж аъзоси.
Кейин ТАСС шикастланган танкерга иккита қутқарув кемаси етиб келгани ва тортиш масаласи ҳал қилинганини ёзди.
2019 йилдан бери кимёвий моддалар ва нефт маҳсулотларини ташишга мўлжалланган SIG танкери Қримдан Сурияга авиа ёқилғи етказиб бергани учун АҚШ санкциялари остида эди.
Римдаги болалар майдончасида Владимир Путиннинг қизил ҳайкалчаси пайдо бўлди
3-август, пайшанба куни эрталаб Римдаги боғдаги болалар майдончасида Россия президенти Владимир Путиннинг қизил ҳайкали пайдо бўлиб, маҳаллий аҳоли ва, айниқса, болаларни эътиборини ўзига тортди.
Франсуз рассоми Жеймс Коломина томонидан Вилла Боргезе боғида ўрнатилган Россия президенти миниатюра ҳарбий танкида ўтиргани тасвирланган.
Кўпинча жамоат жойларига огоҳлантирилмасдан ўрнатиладиган ёрқин қизил кўча ҳайкаллари билан танилган Коломина Украинадаги урушга ва Путиннинг болаларча, аммо хавфли хатти-ҳаракатларига эътиборни қаратиш учун дунё шаҳарларида эпоксидан ясалган ҳайкалларни намойиш қилган.
Жеймс Коломина Путиннинг танкда ўтирган ҳайкалчасини илгари Париж, Барселона ва Ню-Йоркдаги болалар майдончаларида ўрнатган эди.