Одессага тунги ҳужум: бир киши ўлди, ўнлаб одам жабрланди, Преображенск кафедрал собори вайрон қилинди
23 июлга ўтар кечаси Россия Одессага ракеталар билан зарба бериши натижасида бир киши ўлиб, қарийб 20 киши яраланди, дея маълум қилди вилоят ҳарбий маъмурияти.
Украина ҳарбийларига кўра, шаҳарга 19 та ракета отилган, улардан бир қисми ҲҲМ кучлари томонидан уриб туширилган.
Украина Миллий хавфсизлик ва мудофаа кенгаши котиби Алексей Данилов ҳужумни Россиянинг Одесса портидан ғалла олиб чиқишга қаршилик қилишга уриниши билан боғлади.
“Россиянинг Одесса шаҳри ва вилоятига ракета ҳужумлари уюштиришдан асосий мақсади – Украинани Қора денгиздан буткул тўсиб қўйиш ҳамда “ғалла йўлаги”ни тиклашга қаратилган халқаро ташаббусларни чиппакка чиқаришдир”, деб ёзди Данилов “Фейсбук”да.
Одесса шаҳри ва вилоятига ҳужумлар 17 июлда Россия украин ғалласи ва бошқа қишлоқ хўжалиги маҳсулотларини Қора денгиз портлари орқали экспорт қилиш учун хавфсиз йўлак очишни назарда тутувчи “ғалла битими”дан чиққанини эълон қилганидан сўнг кучайди.
Украина ОАВларига кўра, биргина Черноморск портида кемаларга юклашга тайёрлаб қўйилган 60 минг тонна дон йўқ қилинди. Кремль бу ҳужумларни 17 июлга ўтар кечаси Қрим кўпригида юз берган портлашларга жавоб деб атамоқда.
Россия ракеталаридан бири Одессадаги Спасо-Преображенск кафедрал соборига тегди. Жоме биноси жиддий шикастланди.
Одессадаги Преображенск собори энг йирик православ ибодатхонаси ҳисобланади. Жоме қурилиши 1794 йилда, шаҳарга асос солинганидан бир йил ўтиб бошланган.
1939 йилда большевиклар томонидан вайрон қилинган ва 1999 йилда хайрия маблағлари ҳисобига қайта тикланган.
БМТ: Россиянинг "дон ташаббуси"дан чиқиши 362 миллион одамни оч қолдириши мумкин
Бирлашган Миллатлар Ташкилоти Россия Украина ғалласини Қора денгизга хавфсиз экспорт қилиш имконини берувчи келишувдан воз кечганидан кейин ғалла нархининг кескин кўтарилиши "миллионлаб одамлар учун очлик ва бундан ҳам ёмонроқ таҳдид солади" дея билдирди.
БМТ вакили Мартин Гриффитс 15 аъзолик кенгашда "Баъзилар оч қолади, кўплари ўлиши мумкин", деди. БМТга кўра, ҳозир 69 мамлакатда 362 миллионга яқин одам гуманитар ёрдамга муҳтож.
Душанба куни Россия ўзининг озиқ-овқат ва ўғит экспортини яхшилаш талаблари қондирилмагани ва Украинадан етарли миқдорда ғалла энг қашшоқ мамлакатларга етиб бормаганини айтиб, Қора денгиз ғалласи шартномасидан чиқишини билдирди.
Чикагодаги буғдой фючерслари шу ҳафтада 6% дан ошди ва чоршанба куни Россия 2022 йил февралида Украинага бостириб кирганидан бери кунлик энг катта ўсишга эга бўлди.
Қора денгиз бўйича ғалла бўйича келишув бир йил аввал Бирлашган Миллатлар Ташкилоти ва Туркия воситачилигида Россия босқинидан кейин кучайган глобал озиқ-овқат инқирозига қарши курашиш мақсадида тузилган эди.
Украина ва Россия ғалла экспорти бўйича етакчи ҳисобланади.
Қримда портлаш ва ёнғинлар
Аннексия қилинган Қримда яна портлаш ва ёнғин. Хабарларга кўра, ўқ-дорилар омборида дрон зарбаси натижасида портлаш содир бўлган.
Телеграм каналларида тутун ва портлашлар акс этган видеолар эълон қилинди. Гап Октябрский қишлоғидаги ҳарбий аэродром ҳақида кетаётгани айтилмоқда. Бу Қримнинг марказий қисмидир.
Аҳолини омбордан беш километр радиусда эвакуация қилинган, шунингдек, Қрим темир йўлида поездлар ҳаракати тўхтатилган.
Украина Россия учирган барча бешта "Шаҳед" дронини уриб туширган
Украина Қуролли Кучлари Ҳарбий-ҳаво кучларининг хабар беришича, шанбага ўтар кечаси Россия қўшинлари Украинага жануби-шарқдан бешта Шаҳед-136/131 ҳужумчи учувчисиз учоқлари билан ҳужум қилган, уларнинг барчаси ҳаво ҳужумидан мудофаа кучлари томонидан уриб туширилган.
Бундан ташқари, ўтган кун давомида ҳаво мудофааси тўққизта разведкачи учувчисиз самолётни уриб туширди.