Украинада "Тошкент" йўқ қилинди
Россия каналлари РФ Қуролли Кучларининг 123-мотоўқчилар бригадаси қўмондони, Тошкент позивнойига эга полковник Денис Ивановнинг Украина аскарлари томонидан йўқ қилинганини расман тасдиқлади. Қизиғи шундаки, телеканаллардан бирида Иванов автомобилда кетаётганида Луганск яқинида камикадзе дрон зарбаси натижасида ҳалок бўлгани ҳақида хабар берилган эди.
Бошқа маълумотларга кўра, Иванов Луганск яқинидаги Россия базасига ракета ҳужуми натижасида ўлдирилган.
Бу босқинчини кўпинча рус тарғиботчилари, хусусан, Олга Скабеева кўрсатувларида кўп маротаба тилга олган. Ўз токшоусида пропагандачилар Ивановни "афсонавий бригада командири" деб аташган.
Нима учун комбриг Иванов “Тошкент” тахаллусини танлагани ҳозирча номаълум.
Киев: Одессага ҳужумлар Москванинг "ғалла битими" шартномасидан чиқиши билан боғлиқ
"Россия ҳарбийлари кетма-кет учинчи кеча Одесса портига ракета зарбалари бермоқда. 20 июлга ўтар кечаси логистика объектларига - омборларга зарбалар берилган", - деди Юг матбуот котиби Наталя Гуменюк. Бир кун олдин портнинг дон ва нефт терминалларига ракеталар келиб тушганди.
Одессага ҳужумлар Москванинг (Қора денгиз ғалла ташаббуси) деб аталмиш "ғалла битими" шартномасидан чиқиши билан боғлиқ. Бу Қора денгиз портларидан Украина донини экспорт қилиш бўйича Россия, Украина, Туркия ва БМТ ўртасидаги келишув. Шартнома деярли бир йил олдин, 2022 йил 22 июлда, Россиянинг Украинага тўлиқ миқёсли бостириб кириши бутун дунё бўйлаб озиқ-овқат нархларининг кескин ошишига сабаб бўлганида имзоланган эди.
Россия кемалари бошқа дунё портларига дон олиб кетаётган турли мамлакатлар кемалари йўлини тўсиб қўйди. 2023 йилнинг 17 июлида келишув муддати тугади ва “Россия шартлари бажарилмаётганини” иддао қилган Путин ундан чиқишни эълон қилди.
Россия Одесса портида йўқ қилган Украинанинг 60 минг тонна ғалласи Хитойники бўлган
Россия Одесса портида йўқ қилган Украинанинг 60 минг тонна ғалласи Хитойга жўнатилиши керак бўлган. Бу ҳақда Украина президенти Владимир Зеленский маълум қилди.
“Одессага ҳужум уларнинг нишони фақат Украина ва украиналикларгина эмаслигини кўрсатади. Ҳужумга учраган Одесса портида миллион тоннага яқин озиқ-овқат сақланади. Бу Африка ва Осиёдаги мамлакатларга анча олдин етказилиши керак бўлган маҳсулотлар. Кеча тунда Россия терроридан энг кўп зарар етган порт терминалида Хитойга жўнатилиши кepaк бўлган 60 минг тонна қишлоқ хўжалиги маҳсулотлари сақланаётган эди. Россиянинг бу терроридан ҳамма зарар кўради. Шундай экан бутун дунё Россияни бу террори учун жавобгарликка тортиши керак”, деди Украина президенти.
Зеленский Ирландия раҳбари ҳамда Америка тараққиёт агентлиги USAID президенти билан учрашувдан сўнг уларга ёрдам учун миннатдорлик билдирди.
Николаев шаҳри рус ракета ҳужумлари остида
Пайшанба куни россиялик ҳарбийлар тунда Николаевни ўққа тутгандан сўнг уч қаватли бинонинг бир неча қавати вайрон бўлган. Ҳужум натижасида бинода 450 квадрат метр майдонда ёнғин чиққан.
Украина фавқулоддаги вазиятлар хизмати эълон қилган кадрларда эрта тонгда ўт ўчирувчилар ёнғинни бартараф этаётгани ва одамларни воқеа жойидан олиб чиқиб кетаётганини кўриш мумкин.
Вилоят губернатори Виталий Кимнинг айтишича, зарбалар оқибатида камида 19 киши жароҳатланган. Унга кўра, яраланганлар орасида 5 нафар бола, улардан бири гўдак.
Украина расмийларининг айтишича, Украина жанубидаги шаҳарлар, жумладан Николаев ва порт шаҳри Одессага ўтар кечаси Россия ҳаво ҳужумига учраган ва камида 21 киши жароҳатланган.