Украина ва Россия бир-бирини Запорожье тинч аҳолисини ўққа тутишда айблади
Украина президенти маъмурияти раҳбари Андрей Ермак Россия Запорожьедаги қишлоқни ўққа тутиши натижасида уч тинч фуқаро яраланганини ёзди.
Москва томонидан тайинланган минтақа расмийлари эса украин кучлари қишлоқдаги мактабни ўққа тутганини иддао қилди.
Украина жанубидаги фронтга яқин Запорожье вилоятида бир неча ойдирки жанглар давом этмоқда. Вилоят маркази Запорожье шаҳри Киев назорати остида қолмоқда.
Андрей Ермак руслар Степногирске қишлоғига бир нечта ракеталар билан зарба бергани ва маъмурий бинога зарар етказганини билдирди.
Рейтерс агентлиги бу хабарни мустақил равишда текшира олмади.
Россия Запорожье шаҳрини ҳам ўққа тутиб, камида 16 та бинога зарар етказди, деди шаҳар кенгаши котиби Анатолий Куртиев.
Запорожьенинг Россия назоратидаги ҳудуди раҳбари Владимир Рогов эса Украина кучлари Стулневе қишлоғидаги мактабни вайрон қилганини хабар қилди. Унинг қўшимча қилишича, ҳаво ҳужумидан мудофаа кучлари Токмак шаҳри устида бир дронни уриб туширган.
Рейтерс бу хабарларнинг ҳеч бирини мустақил равишда тасдиқлай олмади.
Россия Украина ҳужумларини қайтармоқда, Украина Россия ҳарбийларига ва техникасига зарбалар бермоқда
Шанба куни Россия ўз армияси бир неча фронтда Украина ҳужумларини қайтарганини маълум қилди, айни чоғда Украина кучлари Россия ҳарбий хизматчилари ва техникасига қатор зарбалар берганини билдирди.
Россия Мудофаа вазирлиги кундалик брифингида ўз кучлари Донецк, Красний Лиман, Купянск ва яна баъзи йўналишларда Украинанинг кўплаб ҳужумларини қайтарганини, Украина зирҳли техникаси, автомобиллари, ўзиюрар зарбараклари ва бошқа техникаларини йўқ қилганини маълум қилди.
Шунингдек, Россия ҲҲМ тизимлари Украинага қарашли дронларни ва бир нечта HIMARS ракеталарини уриб туширгани айтилди.
Ўша куни Украина Қуролли кучлари Бош штаби ёйинлаган хабарномада эса ўтган суткаларда Россия ҳарбийлари асосий кучларини Купянск ва Марьинка йўналишларида тўплаб, ўнлаб жанглар ўтказгани ҳақида гап боради.
Хабарномага кўра, Украина авиацияси Россия армияси шахсий таркиби ва техникалари жойлашган ҳудудларга зарбалар берган. Украина реактив артиллерияси эса душман артиллерия қуролларини йўқ қилгани қўшимча қилинган.
Украина ҚК бош қўмондони Валерий Залужний Washington Post нашрига берган интервьюсида украин қўшинлари Россия чегарасига ҳужум қилганини илк бор тан олди.
Генералга кўра, ҳарбий ҳаракатлар Украинанинг ўзи ишлаб чиқарилган қуроллар билан амалга оширилган, Ғарб томонидан берилган ҳарбий техника қўлланмаган.
Аввалроқ Ғарб мамлакатлари Украинадан етказиб берилган қуроллардан Россия ҳудудига ҳужумларда фойдаланмасликни талаб қилган эди.
Бош қўмондон интервьюда Ғарбдан қанотли ракеталар ва F-16 қирувчи учоқларини беришни яна бир карра сўради.
Жанг майдонида рус аскарларининг янги оммавий қабрлари топилмоқда
Украиналик аскарларнинг айтишича, босқинчилардан озод қилинган ерларда оммавий кўмилган россиялик ҳарбийларнинг қабрлари топилмоқда.
“Плацдарм” қидирув бўлинмасининг мутахассислари ўтган беш сутка давомида 75та жасад топишди.
“Қаранг қанча жасад ётибди, ёлки-палки. Мана шундай биродарлик қабрлари. Қанақа ақлсизлик, қанча одам қурбон бўлган”, дейди мутахассис.
Қидирувчиларнинг айтишларича, 75 жасад бу ҳали охирги рақамлар эмас. Чунки бир қанча жасад қолдиқларини фронтнинг олдинги чизиқларидан олишга тўғри келди. Улар Россия артиллерияси зарбалари етадиган ҳудудда ишлашган.
Қидирувчиларга кўра Бахмут йўналишида ўлган аскарларнинг аксарияти “Вагнер” ширкати билан шартнома тузган Россия қамоқхоналаридаги собиқ маҳкумлар.
“Мана бу “Вагнер”нинг шеврони. Хусусий ҳарбий ширкат. Турмалардан йиғиб келинган вагнерчилар, Иккинчи жаҳон урушидаги штрафбатальонлар каби “гўшт”га юборилган “зек”лар. Чўнтакларида мана бундай соатлар бор, буниси ҳали ҳам юриб турибди. Ҳаммаларида шундай соат бор, чўнтагида, қўлида ёки ёнида синган ҳолда ётарди”, дейди мутахассис.
Бир қисм жасадлар ҳали ҳам окоп ва блиндажларда ва ҳали очилмаган биродарлик қабрларида қолиб кетмоқда. Топилаётган жасадларнинг аскарияти россиялик ҳарбийлар эканлигини уларнинг шевронлари ва шахсий буюмлари тасдиқлайди.
“Алексей Юров Иккинчи жаҳон урушида ҳам худди шундай оммавий қабрлар бўлгани ҳақида гапириб берган эди. Биз буларни кўрганимизда бу ҳолатларга тайёр эдик. Улар бу ерда ётибди, ҳеч кимга керак эмас, шуниси ачинарли. Бу даҳшат, 5 кунда 75 жасад! Бу жуда катта натижа. Энди бу жасадларнинг ҳар бирини улардаги жангчиларимизга алмаштирсак бўлади”, дейди мутахассис.
2023 йилнинг июль ойигача журналистлар Украинада ўлган 27 минг нафар россиялик ҳарбийнинг ўлганини тасдиқлади. Улардан камида 240 нафари Украина қарши ҳужумлари оқибатида ҳалок бўлган.
Қуролланган омончилар Дзержинскдаги масжидга бостириб кирди
Россияда эса “Нелегал-2023” мигрантларга қарши оммавий рейдлар давом этмоқда. Бу кадрлар Россиянинг Дзержинск шаҳридаги масжидда олинган. Жума намози пайтида ибодатхонада бостириб кирган қуролли ОМОНчилар мусулмонларни ташқарига чиқишга ундамоқда.
“Сенлар оёқларингни бет ювадиган раковинада ювасанлар!” дея эътироз билдиряпти полиция ходими.
Муҳожир ови Россиянинг бошқа масжид, бозор ва кўчаларида ҳам олиб борилмоқда.