С.Тихановская: "Вагнер" Беларус учун таҳдиддир!
Беларус мухолифати етакчиси Светлана Тихановская пайшанба куни “Вагнер” гуруҳининг ўз мамлакатида мавжудлиги унинг халқи учун катта хавф туғдираётгани ҳақида огоҳлантирди.
"Биз Путин ва Пригожин ўртасидаги келишув тафсилотларини билмаймиз, аммо воқеалар ривожи Беларус учун энг ёмон оқибатларга олиб келиши мумкин, чунки мамлакатимизда қарши олинаётган Пригожин биринчи навбатда Беларус халқи учун катта таҳдид, чунки Лукашенко “Вагнер” қотиллари, зўравонлари ёрдамида беларус халқини қўрқувда ушлаб турмоқчи, беларусларни янада кўпроқ назорат қилиш учун фойдаланиши мумкин. Бу бизнинг мустақиллигимизга таҳдид солади, ҳамда қўшниларимиз - Украина учун, шунингдек, Литва ва Полша учун хавф туғдиради”, деди Светлана Тихановская, Беларус мухолифати етакчиси.
Римда сўзлаган нутқида у президент Александр Лукашенко бу гуруҳдан барқарорлик имиджини яратиш учун фойдаланганини ва уларни Беларусни хорижий босқинлардан ҳимоя қилувчи ва "Беларус халқини янада назорат қилувчи" куч сифатида кўрсатганини айтди.
АҚШ Украинани кассетали ўқ-дорилар билан таъминлайди
Пентагон 800 миллион долларлик янги ҳарбий ёрдам пакети доирасида минглаб кассетали снарядларни юборишини эълон қилиши кутилмоқда.
АҚШ шунингдек Украинага беришни кўзлаётган АТАCМS деб номланувчи армия тактик ракета тизими Украинага Россия нишонларини тахминан 300 километр масофадан туриб йўқ қилиш имконини беради.
Оқ Уйга кўра, Украинага кассетали снарядлар бериш ҳақида 7 июль, жума куни расман маълум қилинади. Reuters 2023 йил март ойидан бери АҚШдан кассетали снарядларни сўраб келаётганини урғулаган.
Украинанинг ЕИ Парламент ассамблеясидаги делегацияси аъзоси, Олий Рада депутати Алексей Гончаренко ушбу снарядлар Украинанинг тезроқ ғалаба қозонишига ёрдам беришини айтар экан, уларни душман аскарларига қарши “самарали қурол” деб атади:
“Биз “Ҳаймарс”дан отиладиган кассетали снарядларни назарда тутяпмиз. АҚШ омборларида бунақа снарядлар кўп, уларни хавфсиз йўқ қилишга қарор берилган. Бу жуда ҳам самарали қурол. Лекин муаммо нимада? Гап шундаки, кассетали снарядлар қатор конвенциялар билан тақиқланган, аммо уларни Украина ҳам, АҚШ ҳам имзоламаган. Бу душман жангчилари учун ўта хавфли қуроллиги рост, бироқ Россия уларни Украинага қарши, жумладан тинч аҳолига нисбатан мунтазам қўллаб келяпти. Шундай экан, Украина ҳам кассетали снарядлардан фойдаланишга тамомила ҳақли”.
2022 йил августда кассетали ўқ-дориларга қарши кураш халқаро лойиҳаси Россия армияси Украина билан урушда кассетали снарядларни юзлаб марта қўллаганини ҳақида баёнот берганди. Ташкилот вакилларига кўра, Россиянинг кассетали снарядларидан Украинанинг 24 вилоятидан 10 тасида ишлатган, ундан камида 215 киши ҳалок бўлган, яна 474 киши турли даражада жароҳатланган.
Кассетали снаряд ҳаводан ташланади ёки ердан артиллерия қуроли ёрдамида отилади. У ҳавода портлагач, ўнлаб, баъзан ҳатто юзлаб майда бомбаларни атрофга сочади ва шу тариқа бир неча футбол майдонига тенг ҳудудни қоплайди.
2010 йилда 110 мамлакат кассетали ўқ-дориларни ишлаб чиқариш, сақлаш ва учинчи мамлакатларга беришни тақиқловчи конвенцияни имзолаган. Бироқ улар орасида АҚШ, Россия ва Украина йўқ.
Владимир Зеленский Болгария президенти Румен Радевга эътироз билдирди
Украина президенти Владимир Зеленский пайшанба куни Болгарияга янги сайланган ҳукумат таклифига биноан расмий ташриф билан келди.
Зеленский пайшанба куни Софияда Болгария бош вазири Николай Денков билан учрашди. У Болгария пойтахтида журналистларга “Болгария бизнинг Евроатлантика интеграциямизни қўллаб-қувватлашини тасдиқловчи бош вазир билан қўшма баёнотни имзолаганини” айтди.
Болгария президенти Румен Радев Украинадаги урушни ҳарбий ечими йўқ можаро деб атагач, Зеленский унга очиқчасига эътироз билдирди.
"Сиз "Путин, Болгария ҳудудини ол!", дейсизми? Йўқ, ҳақиқий президент сифатида, сиз мустақиллигингизга путур етказмаслигингизга ишончим комил. Украинага ёрдам беришни қўллаб-қувватламаслик сизнинг ҳақингиз. Аммо сиз мени тўғри тушунишингизни истайман!" - деди Украина президенти.
Зеленскийнинг жавобидан сўнг Радев журналистлардан хонани тарк этишни сўради.
"Бизга НАТОга таклиф керак!"
Пайшанба куни Прагага кенг кўламли босқин бошланганидан бери биринчи марта ташриф буюрган Украина президенти Владимир Зеленский Чехия президенти Петр Павел билан музокарадан сўнг ўтказилган матбуот анжуманида шундай деди. Зеленский бу таклиф НАТОнинг 11-12 июл кунлари Вилнюсда бўлиб ўтган Иттифоқ саммитида янграшига умид қилаётганини билдирди.
Зеленский учрашувдан сўнг ўтказилган қўшма матбуот анжуманида “альянсдаги барчанинг умумий қўллаб-қувватлашига эришиш қийин бўлишидан” хавотирда эканини яширмади:
“Биз учун идеал нима? Биз НАТОга аъзолик учун таклиф олишни истаймиз . Бу масалада альянсдаги барчанинг умумий розилигига эришиш осон бўлмаслигини тушунамиз. Бу қийин. Баъзилар ҳали ҳам Россиянинг қош-қовоғига қараб турибди, лекин ҳозир ҳамжиҳатлик ва жасорат кўрсатишнинг айни вақти. Бу биз учун бурилиш нуқтаси бўлиши ҳақида аниқ сигнал беришимиз керак”.
Петр Павел Украинанинг НАТОга қўшилиши "Чехия манфаати учун" зарур эканлигини, аммо бу "уруш тугаганидан кейин" амалга оширилиши кераклигини таъкидлади.
“Уруш тугагач, Украинанинг НАТОга аъзо бўлиш бўйича музокараларга кириши Чехия манфаатларига мос келади. Биз ўз хавфсизлигимиз, минтақавий барқарорлик ва иқтисодий фаровонлик нуқтайи назаридан бундан манфаатдормиз”, деди Чехия президенти Петр Павел.