Зеленский Запорожье атом электр станциясида “хавф” сақланиб қолаётганини айтди
Владимир Зеленский тунги видеомурожаатида Украина разведкасига таянган ҳолда Россия АЭСни портлатишга “техник жиҳатдан тайёрлигини” таъкидлади:
"Жиддий таҳдид мавжуд. Россия техник жиҳатдан станцияни портлатишга тайёр. Бу эса радиоактив ҳалокатга олиб келиши мумкин".
Украина ҳарбий разведкаси аввалроқ Россия қўшинлари заводни миналаштирганини маълум қилган эди.
Зеленский Испания бош вазири Педро Санчес билан Киевда ўтказилган қўшма матбуот анжуманида бу ҳақида гапирди.
Зеленский Запорожье АЭСдаги вазиятга халқаро жамоатчилик эътиборини кучайтиришга ҳамда Россиянинг “Росатом” давлат ядро ширкатига қарши санкциялар жорий этишга чақирди.
Санчес Испания Украинани қўллаб қувватлашини билдириш учун Киевга ташриф буюрганини билдирди:
“Испания Украинани қайта тиклашга 55 миллион евро ажратаётганини эълон қилишдан хурсандман. Шундан 51 миллион евро Жаҳон банки орқали йўналтирилиб, кичик ва ўрта бизнесни қўллаб қувватлашга қаратилади."
Киев ва Москва бир-бирини Запорожье АЭСни ўққа тутганликда айблаб келади.
Вагнернинг Санкт-Петербургдаги бош офисидан “Вагнер” логотиплари олиб ташланди
"Вагнер гуруҳи"га тегишли барча белгилар Санкт-Петербургдаги "Вагнер" бош офисидан олиб ташланди.
24 июнь куни Вагнер қўзғолон бошлаган пайтда полиция бинога бостириб кирган.
Қўзғолонга барҳам берган келишувга кўра, Вагнер гуруҳи жангчиларига Беларусга кетиш ёки Россия армиясига қўшилиш таклиф қилинди.
Шундан сўнг, Пригожиннинг тақдири номаълумлигича қолмоқда.
Пригожинга тегишли хусусий самолёт 29 июнь куни Санкт-Петербургдан Москвага учган. Аммо самолёт бортида ким бўлгани номаълум.
Kремль матбуот котиби Дмитрий Песков Пригожиннинг ҳозир қаерда эканлиги ҳақида маълумотга эга эмаслигини таъкидлади.
Асирликда бир йил талоғида ўқ билан юрган ҳарбий муваффақиятли жарроҳлик қилинди
Украиналик ҳарбий Владимир ўтган йилнинг баҳорида Мариупол учун жанг қилганда яраланган ва асирга тушган эди. Ниҳоят, уни алмаштириб, уйига қайтаришга муваффақ бўлгач, шифокорлар батафсил текширувдан ўтказдилар ва шу вақтгача Владимир талоқ соҳасида ўқ билан яшаганлигини аниқладилар.
Николаевдаги жарроҳлар унинг танасидан ўқни олиб ташлашга муваффақ бўлишди, бироқ беморнинг тирик қолиш имконияти миллиондан бир бўлгани айтилади.
"Мен бу ўқ билан бир йилдан кўпроқ вақт юрдим - бир йилу бир ой ва бу ҳақда олти ой олдин билдим. Улар қўшимча текширув ўтказишди ва ичимда ҳали ҳам ўқ борлигини аниқлашди", дейди у.
Владимир рус асирлигида бўлганида, ярадор бўлишига қарамай, тўғри текширилмаган. Уйга қайтгандан кейингина тўлиқ тиббий кўрикдан ўтказилди.
"Йўқ, ўқ кундалик ҳаётимга халақит бермади. Лекин мен бундан хабар топгач, ўқни олиб ташлаттиришга қарор қилдим", - дейди ҳарбий.
Николаев онкология маркази жарроҳи Дмитрий Пишакнинг айтишича, беморнинг бундай жароҳатдан кейин тирик қолиш эҳтимоли деярли йўқ эди.
"Ўқ тананинг ўнг томонида, кўричак ҳудудидан кириб, барча аъзолар ва тузилмаларни тешиб ўтиб, талоққа етганда тўхтаб қолган. Шундай бўлиши мумкин, фақат миллионтадан биттада. Худди шундай жароҳат билан одамнинг тирик қолганини тасаввур қилиш қийин!"
Владимир бир йил давомида ўзи билан 5,45 мм калибрли ўқни олиб юрган. Унинг узунлиги 57 мм, оғирлиги 10 грамм. Шифокорлар уни эсдаликка Владимирга беришди.
"Шифокорларнинг иши яхши ва ҳурматга арзийди. Ахир улар Николаевни бомбардимон қилишларини билишса ҳам касалхонада қолишди. Улар жонларини хатарга қўйиб бизни даволадилар! Улар ҳарбйилар ва оддий одамлар ҳаётини сақлаб қолиш учун қўлларидан келган нарсани қилишмоқда. Бу ҳурматга лойиқдир".
WP: Украина Қримни "гаровга" олиб, музокаралар олиб боришни режалаштирмоқда
Украина АҚШ разведка хизмати раҳбари Уилям Бернсга Киевга сафари чоғида урушни тугатиш режасини ошкор қилган. Бу ҳақда WP газетаси ташриф билан таниш бўлган Украина ва Америка расмийларига таяниб ёзмоқда.
Бернс июн ойида Киевга ташриф буюрган ва у ерда Украина президенти Владимир Зеленский ва Украина разведка хизмати вакиллари билан учрашган, деб ёзади WP. Ҳарбий стратегларнинг Бернсга айтишича, улар кузгача Россия томонидан босиб олинган катта ҳудудларни қайтариб олиш, Украина шарқига юриш, аннексия қилинган Қримга артиллерия ва ракета тизимлари билан босим ўтказиш, кейин эса Москва билан музокаралар олиб боришни режалаштирмоқда.