Ўзбекистоннинг Россиядаги элчихонаси фуқароларни огоҳлантирди
Ўзбекистоннинг Москвадаги элчихонаси Россия ҳудудида бўлиб турган фуқароларни жамоат хавфсизлиги қоидаларига қатъий амал қилиш ҳақида огоҳлантирди. Элчихона ўзбекитонликларни" тасдиқланмаган маълумотларга берилмаслик" ва расмийларнинг кўрсатмаларига амал қилиш"га чақирган.
"Ўзбекистон Республикасининг барча фуқароларини Россия Федерацияси ҳудудида амалда бўлган жамоат хавфсизлиги қоидаларига қатъий риоя қилишга, Россия ва Украинанинг чегарадош ҳудудларига саёҳат қилмасликка, одамлар гавжум жойларга ташриф буюрмасликка чақиради.
Ахборот майдонида тарқатилаётган тасдиқланмаган маълумотларга берилмаслик ва мамлакат расмий вакилларининг кўрсатмаларига амал қилишни сўраймиз.
Сизга қулайлик яратиш мақсадида мамлакатимизнинг Россиядаги барча дипломатик ваколатхоналари тўлиқ иш режимида ишлайди.
Зарур ҳолларда Ўзбекистон Республикаси фуқароларидан Ўзбекистоннинг Москва шаҳридаги элчихонасининг ягона Call-марказига зудлик билан мурожаат қилишларини сўраймиз: +7-499 230-00-76, +7-499 238-36-20", дейилади баёнотда.
"Орқадан пичоқ уриш" - Путин россияликларга мурожаат қилди
Россия президенти Владимир Путин шанба эрталабки телемурожаатида "Вагнер"чилар ҳаракатини "орқадан пичоқ уриш" деб атади ва вазиятни 1917 йил октабр воқеаларига қиёслади.
"Биз хиёнатга дуч келдик, ҳаддан ташқари амбициялар Россияга хиёнат қилишга олиб келди", деди Путин.
Россия президенти бу ишни қилганларга"жазо муқаррар" эканини айтди.
Ўз чиқишида Путин Евгений Пригожиннинг номини тилга олмади.
Путин Россия Федерацияси Қуролли кучларига "қуролли қўзғолонни уюштирганларга қатъий чоралар кўриш"ини буюрганини таъкидлади.
Москвада аксилтеррор операцияси режими жорий этилди
Бу ҳақда Миллий аксилтеррор қўмитасига таяниб, “РИА Новости” давлат агентлиги хабар бермоқда.
Воронеж вилоятидаги “Дон” автомагистралининг 300 километрдан ортиқ қисми тўсиб қўйилган.
Вилоят губернатори Александр Гусев ўзининг телеграм-каналида Воронеж вилоятидаги М-4 “Дон” трассаси 464-километрдан 777-километргача ҳаракат ёпилгани ҳақда ёзди.
“Аҳолидан минтақавий ва маҳаллий йўлларда ҳаракатланишдан тийилишни сўрайман”, деб ёзади Гусев.
"Вагнер" ёлланма аскарлари Ростов ва Воронежда ҳарбий объектларни назоратига олган
"Вагнер" ҳусусий ҳарбий ширкати раҳбари Евгений Пригожин унинг ёлланма аскарлари Ростов-Дондаги ҳарбий объектларни назоратига олганини айтмоқда.
Пригожин агар Россия мудофаа вазири Сергей Шойгу ва Россия армияси Бош штаб бошлиғи Валерий Герасимовни таслим қилишмаса Ростов-Донни тўсиб қўйиш ва Москвага юриш билан таҳдид қилмоқда.
Телеграм каналларида эълон қилинган видеода Пригожин Россия мудофаа вазири ўринбосари Юнус-Бек Евкуров ва генерал Владимир Алексеев билан гаплашаётгани акс этган, улар бир кун аввал “Вагнерчилар”га мурожаат қилиб, давлат тўнтаришига уринишни тўхтатишга чақирган. Видео Россия Жанубий ҳарбий округининг Ростов-Дондаги штаб-квартирасида ёзиб олинган.
Пригожинанинг матбуот хизмати унинг видеомурожаатини ҳам эълон қилди. Пригожин, шу жумладан, Ростовдаги барча ҳарбий объектлар унинг кучлари назорати остида эканлигини ва “Бош штаб бошлиғи биз яқинлашаётганимизни билиши биланоқ қочиб кетганини” таъкидлайди.
Пригожин, шунингдек, Россия Мудофаа вазирлигининг учта вертолёти "Вагнер" карвонига ҳужум қилишга уринганини маълум қилди. Бу хабарлар бошқа манбалар томонидан ҳали тасдиқланмаган.
Воронежда ҳам "Вагнер" ёлланма аскарлари барча ҳарбий объектларни назоратга олди, деб хабар қилмоқда Рейтер агентлиги Россия махсус хизматларидаги манбага таяниб.
Ушбу маълумотни ҳозирча бошқа манбалардан тасдиқлаш имконсиз.
Аввалроқ Воронеж вилоятида аксилтеррор режими жорий қилингани ҳақда хабар берилган эди.