Столтенберг: Украина НАТОга амалий жиҳатдан яқинлашиши керак
НАТО аъзолари Украина амалий жиҳатдан альянсга яқинлашиши ва қўшма кенгаш тузиш керак деган фикрда дея хабар қилди Столтенберг.
"Украина сўнгги ўн йил ичида НАТОга яқинлашганини кўрдик. Биз Украина альянсга аъзо бўлишини қўллаб қувватлаймиз. Бу иттифоқчилар ва Украина қарор қилиши керак бўлган масала. Уруш қачон тугашини билмаймиз, лекин Украинанинг келажакдаги хавфсизлигини таъминловчи асос яратишимиз ва тарих такрорланмаслигига ишонч ҳосил қилишимиз керак”, деди НАТО бош котиби Йенс Столтенберг.
НАТО Украинага хавфсизлик кафолатларини бериш масаласини муҳокама қилмоқда.
Столтенберг, шунингдек, иттифоқчилар мудофаа учун ЯИМнинг 2 фоизини ажратиш мажбуриятини олаётганини билдирди.
НАТО альянси Совуқ урушдан кейин биринчи марта мудофаа режаларини келишишга яқинлашмоқда дея қўшимча қилди Столтенберг.
АҚШ президенти Жо Байден эса Вашингтон Украинанинг Шимолий Атлантика алянсига қўшилиш жараёнини соддалаштирмаслигини айтди. Унга кўра, Киев киришнинг умумий шартларига риоя қилиши керак.
"Бу ўз-ўзидан содир бўлмайди", деди Байден шанба куни эрталаб Вашингтон яқинидаги Эндрю ҳаво кучлари базасида журналистларга Украинанинг НАТОга қўшилиш истиқболига ишора қилиб. Шу билан бирга, у Украина ўзининг ҳарбий салоҳиятини намойиш этиш учун кўп ишларни амалга оширганини таъкидлади.
Америка президентининг баёноти 11 ва 12 июл кунлари Вилнюсда бўлиб ўтадиган НАТОнинг бўлажак йиллик саммити арафасида айтилди, деб ёзади “Америка Овози”. Жума куни НАТО Бош котиби Йенс Столтенберг саммитда Украинани алянсга қўшилишга таклиф этилмаслигини айтди.
Шарқий Европадаги НАТО давлатлари Украинанинг аъзоликка кириши учун аниқроқ йўл харитасини ишлаб чиқишга интилмоқда, АҚШ ва Германия эса 2014-йилда айтган Киев қачонлардир иттифоққа қўшилади, деган ваъдадан нарига ўтишни истамаяпти.
Халқаро экспертлар: Каховка тўғоннинг портлатилиши катта эҳтимол билан Россиянинг иши
Тўғон вайрон бўлишини текширишда Украина прокуратурасига ёрдам бераётган юридик экспертлар гуруҳи дастлабки хулосаларини эълон қилди.
Экспертлар хулосасида Каховка тўғонининг вайрон бўлишига руслар ўрнатган портловчи моддалар сабаб бўлган бўлиши “эҳтимоли юқори”, дейилади.
Globall Rights Compliance халқаро ҳуқуқ ташкилоти экспертлари Украина бош прокурори ва Халқаро жиноий суд гуруҳи билан 10-11 июнь кунлари Херсон вилоятига ташриф буюрди.
"Сейсмик марказларни кўздан кечирган ҳолда ҳамда портлаш бўйича мутахассисларнинг хулосалари ва разведка маълумотларига таяниб, биз тўғон атайлаб ичкаридан портлатилган деган хулосага келдик”, деди халқаро эксперт Катриона Мурдок.
Путин Украинани Каховка тўғонини вайрон қилишда айблаб, бу Ғарб томонидан қўллаб-қувватланаётган можарони кучайтириш учун қилинганини иддаоқ қилди. Украина портлашни уруш жинояти ва “экоцид” сифатида текширмоқда.
Африка етакчилари Путин билан учрашди
Африка етакчилари Украина масаласида Киевда Владимир Зеленский билан учрашганидан сўнг Владимир Путин билан музокара ўтказиш учун Санкт-Петербургга келди.
"Биз бу уруш тугашини қанчалик хоҳлаётганимизни кўрсатиш учун келдик", деди ЖАР президенти Кирил Рамафоса.
Путин Рамафосанинг сўзини бўлди ва улар билдирган кўп таклифларга қўшилмаслигини айтиб, Украина ва Ғарб низони Россия Украинага киришидан анча олдин бошлагани ҳақидаги позициясини яна бир бор таъкидлади.
Путин Россия Украина томони билан музокаралардан ҳеч қачон бош тортмаганини қўшимча қилди.
У шунингдек глобал озиқ-овқат инқирозида Ғарбни айблади:
“Глобал озиқ-овқат бозоридаги инқироз Россиянинг Украинадаги махсус ҳарбий операцияси оқибати эмас. Бу Украинадаги можародан анча олдин шаклланган. Озиқ-овқат инқирози АҚШ ва Европа мамлакатлари – COVID билан боғлиқ муаммоларини ҳал қилиш учун иқтисодий жиҳатдан асоссиз эмиссияни бошлаганидан сўнг юзага келди».
Украина президенти Владимир Зеленский жума куни Киевда АФрика етакчилари билан учрашувдан сўнг Россия билан тинчлик музокаралари Москва қўшинларини Украина ҳудудидан олиб чиқиб кетгандагина бўлиши мумкинлигини айтди.
Путин эса Россия конструктив мулоқотга очиқлигини таъкидлаган.
Украина қуролли кучлари Россиянинг ўқ-дорилар омборини йўқ қилди
Херсон вилоятининг вақтинча босиб олинган Геническ туманидаги Риково қишлоғида украиналик ҳарбийлар Россия армиясининг ўқ-дорилар омборига ҳужум қилди, деб хабар берди Одесса вилояти ҳарбий бошқармаси ҳузуридаги Жамоатчилик кенгаши раҳбари Сергей Братчук.
"Жанубда Риково фарёди эшитиляпти. Бизнинг қуролли кучларимиз эрталаб Херсон вилоятининг вақтинча ишғол қилинган ҳудуди Геническ тумани, Риково қишлоғидаги душманнинг ўқ-дори омборига жуда яхши зарба беришди. У йўқ қилинди", деди Братчук.
Унинг таъкидлашича, ўқ-дорилар бир неча соатдан буён портлашда давом этмоқда.