Украин қўшинлари яқинда қайтариб олинган қишлоқ акс этган видеони эълон қилди
68-Олекса Довбуш бригадаси қўшинлари бир гуруҳ журналистларни фронтдан 2,5 километр узоқликдаги Благодатне қишлоғига олиб борди.
Йўл бўйидаги снаряд қолган ўралар, деярли ҳар бир уйда қолган ўқ излари Украина ғалабаси олдидан шиддатли жанглар бўлганини кўрсатади.
Лермонтов лақабли қўмондоннинг сўзларига кўра, қишлоқни қайтариб олиш пайтида улар кўплаб рус аскарларни қўлга олган.
Уларнинг барчаси қамоқхоналардан ёлланган маҳбуслар бўлган. Командир тўрт душман аскарнинг жасадини кўрсатди.
У учун ғалаба нимани англатиши сўралганда, Лермонтов шундай жавоб берди:
"Қрим ва Донбассни олиш ва ўлганларнинг ҳаммаси учун товон тўлаш. Ғалаба қозонсак ҳам, мен учун бу камлик қилади”.
Украина фронт чизиғи бўйлаб ҳужумларни кучайтирди ва қарши ҳужумнинг дастлабки босқичларида маълум ютуқларга эришди.
Россия президенти Владимир Путин қарши ҳужум бошлангани, бироқ Украина кучлари талофот кўраётганини айтди.
Ғарб таҳлилчилари ва ҳарбий амалдорлари эса, бундай кампаниянинг муваффақияти аниқ эмаслигини ва Украинани яхши қуролланган, малакали рус қўшинларидан тозалаш учун бир неча йиллар керак бўлиши мумкинлигидан огоҳлантирмоқда.
Украина президенти Владимир Зеленский “қарши ҳужум ва мудофаа ҳаракатлари” давом этаётганини билдирди.
Йети лақабли ҳарбий руслар чекинаётиб ўқ дориларни қолдирганини айтади:
"Улар кўплаб ўқ-дорилар, кўплаб фожиалар , ўлимларни қолдирди. Ўқ-дорилар ва қуроллар учун раҳмат айтамиз, аммо қолганлари учун жазолаймиз."
Россия босқинида Украинада 489 бола ҳалок бўлди - прокуратура
2023-йил 18-июн ҳолатига кўра, Россия Федерациясининг Украинага кенг кўламли қуролли тажовузи натижасида камида 1515 нафар бола жабрланган. Ювенал прокурорларнинг расмий маълумотига кўра, 489 нафар бола ҳалок бўлган, камида 1026 нафари турли оғирликдаги жароҳат олган. Бу ҳақда Украина Бош прокуратураси хабар берган.
17 июн куни Олешки шаҳридан қишлоққа борадиган йўлда автомобил ўққа тутилиши оқибатида ота ва унинг 15 ёшли ўғли ҳалок бўлди. Шу куни Херсон вилоятининг Казацкое қишлоғининг ўққа тутилиши натижасида 17 ёшли ўсмир яраланган.
Бундан ташқари, 17-июн куни Донецк вилоятининг Константиновка шаҳри Россия қўшинлари томонидан ўққа тутилиши оқибатида 9 ёшли қиз яраланган эди.
Африка етакчилари Киевдаги музокаралардан сўнг тинчлик жараёнини давом эттиришга ваъда берди
Африка давлатлари Украинада тинчлик ўрнатиш жараёнида бундан буён ҳам иштирок этишга тайёр деди Жанубий Африка президенти Кирил Рамафоса Киевда Африка етакчилари ва Владимир Зеленский ўртасида бўлиб ўтган учрашувдан сўнг:
“Аввало, биз бу ерга ҳам Зеленский ҳам Путинни тинглаш учун келдик. Биз Украина халқига чуқур ҳурмат билан, шунингдек, улар илгари сурган тинчлик формуласини тан олган ҳолда ёндашамиз. Шунингдек, президент Путиннинг ҳам тинчликка эришиш борасидаги режасини эшитамиз”.
Сенегал, Миср, Замбия, Жанубий Африка ва Комор ороллари раҳбарлари Киевда Зеленский билан учрашди.
Африка делегацияси эртага Санкт-Петербургда Россия президенти Владимир Путин билан учрашади.
Замбия президенти Хакаинде Хичилема "Африка қитъаси Украинада тинчлик ўрнатишга ҳисса қўшиши муҳим" дея таъкидлади.
Украина президенти Владимир Зеленский Украинанинг босиб олинган ҳудудларидан Россия қўшинлари олиб чиқиб кетилиши Москва билан бўлажак ҳар қандай музокаранинг қатъий шарти эканини айтди:
“Бугун мен кўп марта такрорладим, яна бир карра аниқ таъкидлайманки, босқинчилар бизнинг тупроғимизда экан, Россия билан сулҳ музокарасига бориш – бу урушни, бизнинг алам ва изтиробларимизни вақтинча музлатиш, деганидир”, урғулади Зеленский.
Африка тинчлик миссиясининг норасмий лидери Жанубий Африка Республикаси президенти Сирил Рамафоса ҳисобланади.
Шанба куни у Россия президенти Владимир Путин билан музокара қилиш учун Санкт-Петербургга учиб кетди.
Путин ПХИФда бир соатдан зиёд нутқ ирод этди: Россияни мақтаб, Украинани камситди
Россия президенти Владимир Путин Петербург халқаро иқтисодий форуми (ПХИФ) йиғилишида нутқ сўзлади. Бир соатдан ортиқ давом этган нутқида у ўтган йилги иқтисодий қийинчиликларга қарамай ўшанда танланган стратегия иш берганини айтди.
Президент Россия томонидан ядро қуролидан фойдаланиш имкониятлари ҳақидаги саволга жавобан “агар Россиянинг ҳудудий яхлитлиги ва мустақиллигига таҳдид туғилса, назарий жиҳатдан бу мумкин”, деди. Ғарбнинг ядровий арсенални қисқартириш таклифларига доир саволга эса “Тушларини сувга айтишсин”, деб жавоб берди.
Путин Украина президенти Владимир Зеленскийни “яҳудий халқига иснод” деб атади (гўёки Путиннинг “яҳудий дўстлари” шундай дейишган эмиш) ва “Украинада неонацистларни кўкларга кўтаришаётгани”дан баҳс этди, аммо ўз иддаоларига бирон далил келтирмади.
Путин тез орада Украинанинг ҳарбий техникаси тугашини «башорат» қилди:
"Тез орада Украина ҳарбий техникаларидан асар ҳам қолмайди. Улар фойдаланаётган ҳамма нарса ташқаридан келмоқда. Бундай вазиятда эса узоқ вақт курашиб бўлмайди".
Путин Украина қарши ҳужумда муваффақиятга эриша олмаётгани ва Россия армияси олдида “имконияти йўқлигини” айтди.
Ғарб Украинадаги жанг майдонида Россияни стратегик жиҳатдан мағлуб этишга уриниб, бунинг уддасидан чиқа олмади дея қўшимча қилди Путин.
Владимир Путин НАТО Украинадаги можарога тобора кўпроқ кириб бораётгани ҳақида гапирди.
"НАТО Украинадаги урушга тортилмоқда. Альянс томонидан Украинага оғир ҳарбий қуролларни етказиб бериш давом этмоқда. Улар ҳозир Украинага самолётлар беришни кўриб чиқмоқда".