Россия шикастланган немис танклари ва АҚШ БМПлари акс этган видеони ёйинлади: техникалар Украинаники экани иддао қилинмоқда
Россия мудофаа вазирлиги сешанба (13 июнь) куни Германиянинг Leopard танклари ва АҚШ ишлаб чиқарган Bradley жанговар машиналари акс этган видеони эълон қилди: ҳарбий техникалар Россия қўшинлари томонидан Украина билан жангда шикастлангани айтилади.
Вазирликка кўра, видео Украина жанубидаги Запорожье фронтида – Украина кучлари қарши ҳужумга ўтишга уринган ҳудудлардан бирида тасвирга олинган.
Reuters агентлиги видеодаги техникалар ростдан ҳам АҚШда ишлаб чиқарилган Bradley зирҳли жанговар машиналари ҳамда Германиядаишлаб чиқарилган Leopard танклари эканини тасдиқлади, аммо тасвирга олинган кун ва жойни мустақил тарзда текшира олмади.
Тасвирга илова қилинган қисқа баёнотда вазирлик қўлга киритилган ҳарбий техникани “бизнинг ўлжамиз” деб атайди ва “Шарқ” қўшинлар гуруҳи аскарлари уларни томоша қилаётганини айтади.
Шунингдек, айрим машиналар мотор ишлаб турган ҳолатда бўлгани – украин экипажлари уларни ташлаб қочгани белгиси сифатида талқин қилинади.
Айни пайтда Украина Запорожье вилоятида Россиянинг модернизация қилинган танкини қўлга киритганини эълон қилди.
Ўлжа қилиб олинган 2022 йилги Т-80БВМ танки акс этган видеони NMFTE телеграм-канали эълон қилди. Бу – йил бошидан буён Украина томонидан ўлжа олинган биринчи танк. Ҳозирга қадар Россия 2021 йилдан сўнг армияга етказиб берилган янги танкларидан 80 тасини Украинага қарши жангларда бой берган.
Европанинг уч йирик давлати раҳбари Украинага ёрдамни муҳокама қилиш учун Парижда йиғилди
Германия канцлери Олаф Шолц Франция президенти Эммануел Макрон ва Полша президенти Анжей Дуда билан Парижда ўтказган қўшма матбуот анжуманида Украина учун хавфсизлик кафолатларини қўллаб-қувватлашини таъкидлади:
Франция президенти Эммануел Макрон Украинанинг Россия кучларига қарши узоқ кутилган қарши ҳужуми бир неча кун аввал бошланганига тўхталиб, бу Киевдаги ҳарбий раҳбарият томонидан пухта режалаштирилганини таъкидлади:
“Биз можаро бошиданоқ ўзимиз белгилаган чегаралар доирасида Украинага ёрдам бериш учун ҳамма нарсани қилдик: Россияга қарши санкциялар, Украинага эса мудофаа ва ҳудудларини қайтариб олишда ёрдам. Украинанинг Россия ҳудудига ҳужум қилмаслиги ва ҳар қандай кескинлашувнинг олдини олиш бўйича ҳаракатлар шулар жумласидан".
Полша президенти Анжей Дуда НАТОнинг июль ойида бўлиб ўтадиган саммити Украинанинг альянсга аъзо бўлиш йўлида “аниқ сигнал” беришига умид билдирди:
"Украина НАТОга аъзо бўлиш истиқболи борасида аниқ сигнал кутмоқда. Бугунги кунда бу Украина ҳукумати, украин аскарлари ва Украина жамияти энг кўп кутаётган масала. Бу энг муҳим вазифалардан бири эканлиги шубҳасиз”.
Шолц, Макрон ва Дуда "Веймар учлиги" деб аталган формат дориасида Парижда учрашди.
ISW: Украина камида 3 ҳудудда илгарилаяпти
Украина Мудофаа вазирлиги Донецк вилоятида 4 та аҳоли маскани Россия босқинчиларидан озод этилди, деб баёнот берди.
АҚШнинг Урушни ўрганиш институти (ISW)га кўра, Украина ҚК 10-11 июнь кунлари фронтнинг камида учта участкасида олдинга силжиб, Донецк вилоятининг Волноваха туманидаги Велика Новосилка посёлкасидан жанубда жойлашган бешта аҳоли маскани, хусусан, Макаровка, Нескучное, Благодатное, Сторожевое ҳамда Новодаровкани озод қилган.
Мудофаа кучларининг Таврия йўналиши матбуот котиби Валерий Шершень “Украинская правда”га берган интервьюсида аввалроқ Россия кучлари Волновахада, Украина қарши ҳужумига халал бериш мақсадида Ключевое қишлоғи яқинидаги Мокрие Яли дарёси тўғонини портлатганини айтди.
“Тўғон бузилгач, атрофдаги ҳудудларга сув тошди, бироқ бу ҳарбий ҳаракатларга ҳеч бир таъсир этмайди”, деди Шершень:
"Благодатне қишлоғи озод қилинганини эълон қилмоқчиман. Қишлоқ "Олексий Довбуш" бригадаси жангчилари томонидан озод қилинди. Операция Таврия йўналишидаги мудофаа кучларининг бўлинмалари билан ҳамкорликда муваффақиятли бўлди”.
Фронтнинг "Таврия йўналиши" Авдивкадан Херсонгача бўлган жанг ҳудудини ўз ичига олган.
Шунингдек, Украина ҚК Бош штаби Бахмут, Лиман, Авдивка ва Маринкада шиддатли жанглар бўлиб ўтганини, рус қўшинлари у ерга асосий кучларини йиғаётганини хабар қилди.
Донецк вилояти губернатори Павло Кириленконинг маълум қилишича, Авдивкада бир фуқаро рус қўшинларининг ўққа тутилиши натижасида ҳалок бўлган.
Украина Мудофаа вазири ўринбосари Ханна Маляр бир кун аввал украин кучлари энг шиддатли жанглар кетаётган Бахмут ҳудудида олдинга силжиганини билдирган эди.
Россия Мудофаа вазирлиги эса, ўтган кунда Украинанинг бир қанча ҳужумларини қайтаргани ҳақида маълумот тарқатди.
Россия томони украин қўшинларини Донецк ва Запорожье йўналиши бўйлаб ортга қайтариб, Запорожьедаги қўмондонлик пункти ва Донецкдаги арсеналига зарба берганини айтмоқда.
Мудофаа вазирлиги хабарида айтилишича, Россиянинг разведкачи кемасига ҳужум қилишга уринган Украинанинг масофадан бошқариладиган тезюрар катери ҳам йўқ қилинган.
Озодлик уруш шароитида томонлар бераётган маълумотларни мустақил манбалардан тезкор тасдиқлаш имконига эга эмас.
Ҳаага суди Каховка ўпирилишини текширмоқда
Ҳаагадаги Халқаро жиноят суди вакиллари Украина жанубида ўнлаб аҳоли масканларини сув босишига олиб келган Каховка ГЭС тўғони ўпирилиши бўйича текширув ўтказмоқда.
Бу ҳақда Украина президенти Владимир Зеленский 11 июнь оқшомида халққа мурожаати чоғида маълум қилди:
“Шу кунларда Халқаро жиноят суди вакиллари Херсон вилоятида бўлишди. Ҳалокат содир бўлган куниёқ бош прокурор ХЖСга мурожаат йўллаб, ушбу фожиа юзасидан суриштирув олиб боришни сўраганди. Иш аллақачон бошланган. Халқаро одил судлов вакиллари Россиянинг ушбу террорчилик акти оқибатларини ўз кўзлари билан кўришлари жуда муҳим. Тошқиндан жабр кўрган ва аҳолиси эвакуация қилинган қишлоқларни шафқатсизларча ўққа тутиш билан Россия давлати бу террорни давом эттираётганини ҳам билиб қўйсинлар”.
Зеленский суриштирув олиб боришда ХЖС вакилларига кўмаклашишга ваъда берди.
“Зиён кўрган ҳудудлар, гувоҳлар, барча маълумот, далиллар ХЖС ихтиёрида бўлади”, дея урғулади Украина президенти.
Каховка ГЭС тўғони ўпирилиши олтинчи июнга ўтар кечаси юз берди. Тўғон Херсон шаҳридан юқорида – Новая Каховка посёлкасида жойлашган.
Украина, ЕИ ва Буюк Британия юз берган фожиа учун жавобгарликни Россия зиммасига юклади. Расмий Киев Днепр дарёсидаги тўғон “Украина ҚК қарши ҳужумини тўхтатиш илинжида ичдан портлатилган”, деб ҳисоблайди.
Россия эса айбловларни инкор этиб, Каховка ГЭС ўпирилишини “Украинанинг қасддан амалга оширган диверсияси” деб атамоқда.