Россия Белгороддан жангарилар қувиб чиқарилганини иддао қилди
Россия Мудофаа вазирлиги матбуот котиби Игор Конашенковнинг иддао қилишича, Белгород вилоятида Украина қўшинлари мағлубиятга учрагани ва 70 дан ортиқ диверсант ўлдирилган.
Матбуот котиби сўзларига кўра, аксилтеррор операцияси давомида Россия қўшинлари ҳаво зарбалари, артиллерия ўқлари ва чегарачиларининг фаол ҳаракатлари билан диверсантлар гуруҳлари тўсиб қўйилган ва йўқ қилинган:
"Миллатчиларнинг қолдиқлари Украина ҳудудига қайтарилди, у ерда улар тўлиқ йўқ қилинмагунча отишма давом этди. 70 дан ортиқ украиналик террорчи, тўртта зирҳли жанговар машина ва бешта пикап йўқ қилинди".
Белгородга ҳужум масъулиятини “Россия озодлиги” легиони ўз зиммасига олди
Россия Тергов қўмитаси Белгород вилоятига диверсантларнинг кириб келиши сабабли “террорчилик ҳужуми” билан боғлиқ жиноят иши қўзғатди.
Белгород вилоятида, Россия расмийлари таъбирича, “аксилтеррор операцияси” ва “тозалаш” иккинчи кундирки давом этмоқда.
Россия Тергов қўмитаси Белгород вилояти аҳоли пунктларига қўпорувчилик гуруҳлари кириб келгани сабабли олти модда, жумладан, теракт бўйича жиноят иши қўзғатди, деб хабар бермоқда департамент матбуот хизмати.
Тергов маълумотларига кўра, 2023-йил 22-май куни “Украина қуролли тузилмалари вакиллари Белгород вилоятининг Грайворон туманига ҳужум уюштирган”.
Департамент “турар-жой ва маъмурий бинолар, фуқаролик инфратузилмаси объектлари миномёт ва артиллериядан ўққа тутилган” деб даъво қилмоқда. Тергов қўмитаси, шунингдек, "ушбу жиноий ҳаракатлар натижасида бир неча тинч аҳоли жароҳатлангани" ҳақида хабар берди.
Кремлга қарши гуруҳ Белгороддаги жангларнинг иккинчи кунига кираётган бир пайтда Россия армиясининг БТРини ўлжа олганини айтди.
Душанба (22 май) куни ёйинланган видеода Россиянинг Белгород вилояти узра тутун кўкка ўрлаётганини кўриш мумкин. Маҳаллий губернатор фронт чизиғи оша Белгородга Украинадан қўпорувчилар кирганини иддао қилмоқда.
Қисқа роликда далалар ва уйлар узра тутун осмонга кўтарилаётган жой Украина билан чегара яқинидаги Козинка посёлкаси экани айтилади.
Reuters агентлиги видеодаги жой, бинолар ва йўлларни сунъий йўлдошдан олинган тасвирлар билан солиштириб, у ростдан ҳам Козинка эканини аниқлади, аммо ролик қайси санада суратга олинганини мустақил равишда текшира олмади.
Агентлик видеони “Россия озодлиги” легиони вакили йўллаганини билдирган.
Унда “Россия озодлиги” легиони матбуот хизматини тамсил этувчи исми очиқланмаган шахс шундай дейди:
“Биз ҳам сизларга ўхшаган руслармиз. Биз ҳам сиз каби одамлармиз. Биз фарзандларимиз баркамол ва эркин бўлиб вояга етишини, дунё кезишини, билим олишини ва умуман озод мамлакатда бахтиёр яшашини истаймиз. Бироқ бугунги Путин Россиясида бу имконсиз. Чунки Путин Россияси коррупция, ёлғонлар, цензура, эрксизлик ва қатағонлардан чириб кетган. Бу Россияда инсон ҳаётининг баҳоси амалдор ҳамёнидан арзон. Бу Россияда вилоятларнинг абгор йўлларини таъмирлаш ўрнига ҳукмдор қароргоҳига алоҳида темир йўл тортилади. Бу мамлакатда тинчликка даъват учун ота-оналар болаларидан айриладилар, ўспиринлар эса умрбод қамоққа ташланади. Кремль диктатурасига чек қўйиш вақти етди. Бизни қўллаб-қувватловчи барчага раҳмат. Бизга пул хайрия қилувчилар, зарур жойда сигарет чекувчилар, ҳаммангиздан миннатдормиз. Сизларнинг мададингиз бизга пировард мақсадимиз Қизил майдонда эканини эслатиб туради. Дадил бўлинг, ҳеч нимадан қўрқманг, биз уйга қайтяпмиз. Россия озод бўлажак!”
Белгород вилояти губернатори Грайворон тумани ҳудудига кириб олган, ўз таъбирича, “украин қўпорувчилари гуруҳи”нинг ҳужуми даф қилинганини билдирди.
Бироқ Украинанинг “Громадское” нашри мамлакат ҳарбий разведкасига таянган ҳолда мазкур ҳужум Россия қуролли мухолифатига мансуб “Россия озодлиги” легиони ҳамда Россия кўнгиллилар корпуси (РКК) томонидан амалга оширилганини, иккала гуруҳ ҳам Россия фуқароларидан тузилганини хабар қилмоқда.
Украина президенти Владимир Зеленскийнинг катта ёрдамчиси Белгород вилояти ҳудудига бостириб кирганларга Киевнинг ҳеч бир дахли йўқ, дея баёнот бериб, бу воқеаларни Россиянинг ўзида “қаршилик кўрсатиш ҳаракати” туғилгани билан изоҳлади.
Белгород губернатори Вячеслав Гладков “Телеграм”даги саҳифасида операцияга Россия армияси, чегарачилар, президент қўриқлаш хизмати ва ФСБ хавфсизлик хизмати жалб қилинганини билдирди.
Мулозимга кўра, камида олти киши яраланган, учта уй ва маъмурий бинога шикаст етган.
Россия махсус хизматларида ўз алоқаларига эга Baza телеграм-канали эса Россияга элтувчи катта йўл бўйида жойлашган учта аҳоли масканида жанглар бўлаётгани белгилари мавжудлигини маълум қилди.
“Откритий Белгород” Телеграм-каналига кўра, бир неча қишлоқда электр ва сув узилган.
Reuters агентлиги ушбу хабарларнинг тўғрилигини текшира олмади, украин ҳарбийлари эса изоҳ берганича йўқ.
Россиялик мухолифатчи ва собиқ Дума депутати Илья Пономарёв раҳбарлик қилувчи “Россия озодлиги” легиони бу орада Козинка қишлоғи “тўлиқ озод этилган”ини эълон қилди.
Легионнинг “Твиттер”даги хабарномасида айтилишича, илғор бўлинмалар Грайворон округи марказига етиб борган ва ҳозирда шарқ томонга ҳаракатланмоқда.
“Йўлда давом этамиз. Россия озод бўлади!” дейилган хабарномада.
Украина президенти идораси раҳбарининг маслаҳатчиси Михаил Подоляк Reuters агентлигига берган изоҳида Украина ҳарбий разведкаси фикрига қўшилишини айтган.
“Россия озодлик ҳаракати Украинадаги уруш тўғри якун топишига шароит яратадиган ва Россия сиёсий элитасидаги трансформацион воқеалар бошланишини тезлаштирадиган куч бўлиши мумкин”, деди у.
Ижтимоий тармоқларда украиналиклар 2014 йилда Россия дастаклаган айирмачилар Украина шарқида “халқ республикалари” ташкил топганини эълон қилганига ишора қилиб, бу сўнгги воқеаларни “Белгород халқ республикаси туғилиши” ўлароқ таърифлашмоқда.
Кремль: “украиналик жангарилар” ҳали ҳам Белгородда
Кремль Украина билан чегарадош Белгород вилоятида “украиналик жангарилар” ҳали ҳам фаоллигини маълум қилди.
Бу ҳақда Кремль матбуот котиби Дмитрий Песков журналистлар билан суҳбатда гапирди.
"Кеча содир бўлган воқеа, албатта, чуқур ташвишга сабаб бўлади. Бу воқеа украиналик жангарилар мамлакатимизга қарши ўз фаолиятини давом эттираётганини яна бир бор тасдиқлайди. Бу биздан кўпроқ ҳаракат талаб қилади. Аксилтеррор ҳаракатлар давом этмоқда. Шу билан бир қаторда шунга ўхшаш босқинларнинг олдини олишга мўлжалланган махсус ҳарбий операция ҳам давом этмоқда”.
Россиянинг Белгород вилояти губернатори ҳам вилоят ҳудудида “аксилтеррор операцияси” давом этаётгани, мудофаа вазирлиги ва ҳуқуқ-тартибот идоралари Украина билан чегарадаги ҳудудни “тозалаш”да давом этаётганини билдирди.
“Грайворон туманидаги вазиятга келсак, Мудофаа вазирлиги ҳуқуқ тартибот органлари билан биргаликда ҳудудни тозалаш ишларини давом эттирмоқда. Грайворон туманини вақтинча тарк этган одамлардан ҳозир қайтишга шошмасликнини сўраб қоламан”, деди Белгород губернатори Вячеслав Гладков.
Гладковга кўра, эвакуация пайтида бир аёл ҳалок бўлган, икки киши яраланган. Россия хавфсизлик кучлари воқеа жойига етиб бора олишга улгурмаган.
Россия Днепpга ҳаво ҳужуми уюштирди
Россия 22 майга ўтар кечаси Днепр, Харков, Одессага шаҳарларига дрон ва ракеталар билан ҳужум қилди. Натижада саккиз киши тан жароҳати олди, кўплаб бинолар вайрон бўлди.
Украина ҳаво ҳужумидан мудофаа тизимлари 20 та дрон ва тўртта қанотли ракетани уриб туширган.
Украина ҳарбий ҳаво кучлари Россия 16 турдаги ракеталар ва 20 та Шаҳед дронлари билан шаҳардаги ҳарбий ва инфратузилма объектларини нишонга олганини маълум қилди.
Ҳаво ҳужумидан мудофаа кучлари Россиянинг 20 дрони ва тўрт қанотли ракетасини уриб туширган.
Украинанинг қарши ҳужуми яқинлашар экан, Россия май ойида Украина шаҳарларига ҳаво ҳужумларини кучайтирди.
Украина Фавқулодда вазиятлар хизмати Днепрдаги идорасига ракета ҳужуми акс этган видеони эълон қилди. Ҳужум оқибатида бир киши яраланган.
Синелникивский туманига уюштирилган ҳужумда етти киши яраланди, деб хабар берди вилоят губернатори Сергей Лисак
Россиянинг ҳаво ҳужуми натижасида кўплаб бинолар, хусусий уйлар, турар-жой бинолари ва маъмурий инфратузилма обектларига шикаст етган.