Германия Украинага 2,7 миллиард евролик ҳарбий ёрдам беради
Кеча Украина президенти Владимир Зеленский Германия канцлери Олаф Шолц билан учрашди. Зеленский Россия босқинидан кейин Олмонияга қилган илк ташрифида кўрсатаётган ҳарбий ёрдами ва бирдамлиги учун Германия ҳукуматига миннатдорлик билдирди.
Зеленский Берлинга қирувчи самолётлар ҳамроҳлигида Германия ҳукумати самолётида етиб келди.
Олаф Шолц Владимир Зеленскийга Украинанинг кутилаётган қарши ҳужумида омад тилади.
Мухбирлар Украина президентидан Германиянинг бир кун аввал эълон қилинган 30 та Леопард танкидан иборат 2,7 миллиард евролик ҳарбий ёрдам пакети қарши ҳужумни бошлаш учун етарли бўладими деб сўради.
Зеленский эса «яна бир неча ташрифлар керак» дея жавоб берди
Шолц Украина тинчликка тайёр эканлиги, аммо бу можарони музлатиш ва Россия айтаётган келишувни қабул қилиш дегани эмаслигини қўшимча қилди:
«Бу Украина ҳудудига империалистик ҳужум. Европада тинчлик ва хавфсизликка кучли давлат кучсиз давлатга ҳужум қилиши мумкин деган ғоя хавф солмоқда».
Зеленский Германияга ҳарбий ёрдам учун миннатдорчилик билдирар экан, Киев ғарбдаги иттифоқчилар билан бу йил Украинадаги урушда Россияни ўнгланмас мағлубиятга учратишга қодирлигини айтди.
Олаф Шольц Киевга берилажак янги ҳарбий ёрдам пакетини эълон қилди.
Айтилишича, Украинага 20 та Marder пиёдалар жанговар машиналари, 30 та Leopard 1 A5 танклари, 18 та ўзиюрар гаубица, 100 та зирҳли автомобиль, 200 дан зиёд разведка дронлари, шунингдек артиллерия снарядлари, ялпи ўт очиш тизимлари учун ракеталар ҳамда тўртта IRIS-T SLM ҲҲМ тизимлари берилади.
Рим папаси Зеленскийга тинчлик рамзи бўлган бронза ҳайкалча совға қилди
Украина президенти 13 -15 кунлари бир қатор Европа давлатларига сафар қилди
Уруш бошланганидан буён илк бор Римга борган Зеленский италиядан кўрсатган ёрдами учун миннатдорлигини билдирди.
«Мен Италиянинг барча сиёсий раҳбарларини, жамоат фаолларини мамлакатимизга ташриф буюришга, у ердаги оддий одамлар билан суҳбатлашишга таклиф қиламан. Агар у ерда нималар содир бўлаётганини, Путин нималар қилганини ўз кўзингиз билан кўрсангиз, ўйлайманки, биз нима учун ёвузликка қарши бунчалик курашаётганимизни, яшаш учун курашаётганимизни тушунасиз», деди Владимир Зеленский.
Италия бош вазири Жоржио Мелони Россиянинг Украинага «шафқатсиз ва адолатсиз тажовуз»ини қоралади. У шунингдек, Италия Украинани «қанча керак бўлса шунча вақт» қўллаб-қувватлашига ваъда бериб, Россияни зудлик билан тажовузни тўхтатишга чақирди.
Мелони Италия Украинанинг Европа Иттифоқи ва НАТОга аъзо бўлиш сўровини қўллаб-қуввталашини урғулади.
Зеленский Римга қирувчи самолётлар ҳамроҳлигида Италия ҳукуматига тегишли самолётда борди.
Украина президенти Владимир Зеленский Ватиканда Рим папаси Франсиск билан учрашди.
Рим папаси Зеленскийга тинчлик рамзи бўлган бронза ҳайкалча совға қилди. Украина президенти эса унга украиналик аскарга тегишли Мадонна сурати туширилган зирҳли нимча совға қилди.
Венгрия сафаридан қайтган Френсис 30 апрель куни Ватиканнинг урушни тугатиш миссиясида иштирок этаётгани ҳақида гапирди.
Рим папаси Френсиск Киев ва Москва ўртасида воситачилик қилиш истагини бир неча бор билдирган. Бироқ унинг таклифи ҳозирча ҳеч қандай самара бермади.
Украина: Руслар Бахмутга ҳужумни давом эттирмоқда, Россия бўлинмаси жиддий йўқотишларга учради
Украин ҳарбийлари Бахмутда Россиянинг 72-алоҳида мотоўқчилар бригадасига жиддий талофат етказганини маълум қилди.
Украина шарқий ҳарбий округи матбуот котиби Сергей Череватий Бахмутда вазият «мураккаб»лигича қолаётгани, аммо «Вагнер»нинг катта йўқотишлари туфайли Москва мунтазам армия кучларини кўпроқ жалб қилишга мажбур бўлаётганини билдирди.
“Русларнинг бутун бошли бригадаси яксон қилинмаган бўлсада, уларнинг икки бўлинмаси жиддий зарар кўрди. Пригожиннинг чалғитувчи сафсаталарига қарамай, Бахмутда вазият оғирлигича қолмоқда. Шаҳар ҳали ҳам душманнинг асосий ҳужум йўналиши", деди С.Череватий.
«Вагнер» гуруҳи раҳбари Евгений Пригожин 72-алоҳида мотўқчилар бригадаси ўз позицияларини тарк этганини хабар қилди.
Пригожин: Украина қарши ҳужумни Бахмут қанот чизиқларида бошлади
«Вагнер» гуруҳи раҳбари Евгений Пригожин Украина бўлинмалари қарши ҳужум бошлагани ва Бахмутга қанотлардан яқинлашаётганини иддао қилди:
«Украина Қуролли кучлари қарши ҳужумни бошлади. Уларнинг тайёргарликдан ўтган барча бўлинмалари зарур қурол-яроғ, материаллар, танклар ва бошқа жиҳозлар билан таъминланган! Улар аллақачон ишга киришди”.
Рейтерс Пригожиннинг даъвосини мустақил равишда тасдиқлай олмади. Россия оммавий ахборот воситаларининг Украинанинг кутилаётган қарши ҳужуми ҳақидаги саволига жавобан Пригожин Украинанинг қарши ҳужум операциялари «афсуски, қисман муваффақиятли ўтди» дея тан олди.
Пригожин Зеленскийнинг Украина кучлари хорижий давлатлардан қўшимча ёрдам кутаётгани сабабли Украинанинг қарши ҳужуми кечиктирилгани ҳақидаги изоҳларига ҳам тўхталди.
Унинг сўзларига кўра, Зеленскийнинг қарши ҳужум борасидаги гаплари «алдамчи таассурот» уйғотиш учун.
"Вагнер” ўқ-дориларнинг даҳшатли тақчиллигида жанговар топшириқларни бажаришда давом этмоқда. Россия мудофаа вазирлиги берган ваъдаларини ҳаммасини бажара олмади."
Вагнер бошчилигидаги рус қўшинлари ўтган ёздан бери Бахмутни эгаллашга ҳаракат қилиб келмоқда.
“Вагнер” ёлланма аскарлари Украинада, Сурияда ва Африка давлатларидаги жангларда қатнашган ва қатнашмоқда. “Вагнер”чилар қатор ҳарбий жиноятларда ҳам айбланган.
27 январда АҚШ “Вагнер”ни трансмиллий жиноий ташкилотлар рўйхатига киритган. Ўтган ҳафта Франция сенати “Вагнер”ни террорчи ташкилот сифатида тан олди.
Ғарб журналистлари билан суҳбатда Украина президенти қарши ҳужумга ўтиш учун ҳамон Украинага келадиган зирҳли техникаларнинг бир қисмини кутаётганини айтди.
"Биз ҳозир мавжуд бўлган қуроллар билан ҳужум қилишимиз мумкин, аммо инсоний йўқотишлар жуда катта бўлган бўларди. Бу номақбул. Шунинг учун биз ҳали кутишимиз керак. Бизга яна бироз вақт керак", - деди Владимир Зеленский.