Бахмутда қақшатқич жанглар давом этмоқда
Украина кучлари бош штаби Бахмут шаҳри ҳануз ҳарбий ҳаракатлар маркази бўлиб қолаётганини билдирди: “Бахмут ва Марьинка учун оғир жанглар кечмоқда. Атиги бир сутка ичида душман 30 дан ортиқ ҳужум уюштирди”, дейилади Бош штаб хабарномасида.
Маълум қилинишича, Россия қўшинларининг Бахмут шаҳри атрофидаги ҳужум ҳаракатлари муваффақиятсиз якунланган.
“Вагнер” ХҲШ раҳбари Евгений Пригожин гўёки снарядлар етишмовчилиги сабаблари ўз бўлинмаларини фронт ортига олиб кетишни режалаётгани ҳақида эълон қилганига қарамай Бахмут шаҳрига ҳужумлар давом этмоқда.
Украина мудофаа вазирлигига кўра, ўтган тунда Россия қўшинлари Бахмутни фосфорли ёндирувчи снарядлар билан ўққа тутган.
Украина Фавқулодда вазиятлар давлат хизмати раҳбари Сергей Крук пиротехниклар Херсон вилоятидаги миналанган майдонларни тозалаш чоғида ўққа тутилганини билдирди. Олти мутахассис ҳалок бўлган, икки киши яраланган.
“Террорчилар ўзлари миналаб кетган ҳудудларни тозалашга уринаётган бизнинг йигитларимизни ўққа тутиш билан халқаро ҳуқуқ меъёрларини яна оёқости қилишди”, деб ёзди Сергей Крук.
Запорожье АЭС яқинида отишмалар кучайгани сабабли аҳолини эвакуация қилиш бошланди
МАГАТЭ бош директори Рафаэл Мариано Гросси ЗАЭС атрофида давом этаётган ҳарбий ҳаракатлар натижасида аҳолини эвакуация қилиш бошланди, дея хабар берди
Гроссининг таъкидлашича, МАГАТЭ экспертлари АЭС атрофидаги вазиятни диққат билан кузатиб бормоқда.
Эвакуация ҳақида бир кун аввал Запорожье раҳбари Евгений Балитский эълон қилган эди.
Балитский Украина кучлари аҳоли пунктларини ўққа тутаётгани сабабли вилоятнинг 18 ҳудудидан тинч аҳоли эвакуация қилинишини билдирган.
Биринчи навбатда ота-оналар ва болалар, қариялар, ногиронлар ҳамда касалхонадаги беморлар эвакуация қилинади, деди у.
Аввалроқ МАГАТЭ Запорожье атом электр станцияси яқинида «ҳарбий ҳаракатлар ортгани» ҳақида огоҳлантирган эди.
Гросси Украина ва Россия билан завод атрофида хавфсизлик зонасини яратиш бўйича музокаралар олиб бормоқда.
Қодиров Путиндан “Ахмат” батальонини Бахмутга юборишни сўради
Чеченистон раҳбари Рамзан Қодиров “Ахмат” махсус батальони бўлинмаларини Украина шарқидаги ҳозирда Россия қўшинлари штурм қилаётган Бахмут шаҳрига юборишни сўраб президент Путинга хат йўллади. Мактуб матни Қодировнинг телеграм-каналида эълон қилинган.
“Юзага келган вазиятдан келиб чиқиб... Сиздан Россия Федерацияси мудофаа вазири Шойгу С.К. ҳамда Россия Федерацияси Миллий гвардия қўшинлари федерал хизмати директори Золотов В.В.га “Ахмат” бўлинмаларини бошқа йўналишлардан олиш тўғрисида кўрсатма беришингизни сўрайман”, дейилади мактубда.
Қодиров мурожаат жўнатилганини айтмоқда. Бироқ бу ҳарбий субординацияга зид, чунки Украинадаги Россия қўшинлари бирлашган гуруҳи мудофаа вазирлиги қўмондонлиги остида ҳаракат қилади.
“Вагнер” ХҲШ раҳбари Евгений Пригожин аввалроқ ўқ-дори тақчиллиги сабабли ўз ХҲШни Бахмутдан олиб чиқиб кетишга қарор қилганини айтиб, бунда мудофаа вазирлигини ҳамда шахсан Шойгу ва бирлашган қўшинлар гуруҳи қўмондони, Бош штаб бошлиғи Валерий Герасимовни айблаган эди.
У Шойгу билан Герасимовни айблаб чиққан видео ўнлаб жасадлар манзарасида тасвирга олинган бўлиб, Пригожин улар Бахмутда атиги бир кунда ҳалок бўлган ХҲШ жангчилари эканини таъкидлайди.
6 май куни кечқурун Пригожин ХҲШнинг мудофаа вазирлиги билан зиддияти ҳақида батафсил маълумот берди.
Унда вазирлик ХҲШ билан ўчакишиб қолгани туфайли “вагнерчилар” катта талафот кўраётгани, янги аскарлар ҳисобига сафларини тўлдириш имкониятидан маҳрум бўлгани ва “ҳолдан тойишгани” иддао қилинади.
ХҲШ раҳбарига кўра, бўлинма Бахмутдан чиққанидан сўнг ўз жанговар қобилиятини тиклаш билан шуғулланади.
Қримга шимолдан киришда улкан тирбандлик пайдо бўлди – бунга “эвакуация” сабаб қилиб кўрсатилмоқда
Россия қўшинлари босиб олган Мелитополь шаҳрининг Украина тайинлаган маъмурияти раҳбари Иван Фёдоров Қримга шимол тарафдан киришдаги Чонгар ўтказиш масканида 5 соатлик тирбандлик вужудга келганини маълум қилди.
Мулозим буни босқинчи маъмурият Запорожье вилоятининг фронтга яқин ҳудудларида яшовчи аҳоли кўчирилишини эълон қилгани билан боғламоқда.
“Ҳарбийлар ва махсус рухсатномаси бор шахслар навбатсиз ўтиб кетишмоқда. Ўғирланган, таланган буюмлар ортилган юк машиналарига ҳам йўл очиқ. Минглаб енгил автомобиллардаги оддий одамлар эса камида 5 соатда ўтишяпти”, деб ёзган украин мулозими.
Аввалроқ оккупацион маъмурият Запорожье вилоятидан қарийб 70 минг киши олиб чиқилишини ва кўчириш гўёки ихтиёрий бўлишини айтган эди.
Айни чоғда “Реальное Запорожье” телеграм-канали Запорожье вилоятининг Россия оккупация қилган Молочанск ва Токмак туманларида ота-оналар ўз фарзандларини аҳолини “кўчириш” билан шуғулланаётган ҳарбийлардан яшираётгани ҳақида хабар қилмоқда.
Маҳаллий аҳоли вакилларига кўра, эвакуация қилинган украиналиклар дастлаб Бердянскка, у ердан эса Ростов-Дон вилоятига олиб кетиляпти.
Фарзандларини эвакуацияга беришни истамаётган ота-оналарга ижтимоий тўловлардан маҳрум этиш билан таҳдид қилинаётгани тўғрисида маълумотлар бор.