Россия ОАВ: Вагнер гуруҳи Бахмутда олдинга силжиди
«ИЗВEСТИЯ» мухбири Алексей Полторанин Бахмутдаги жанглар ҳақида видеорепортаж тайёрлади. Убилан суҳбатдашган россиялик ҳарбийлардан бири бундай дейди:
«Кўриб турганингиз мана бу уйларни Вагнер гуруҳи жангчилари айни дақиқаларда озод қилмоқда. Украина томонидан ўт очилаётганини ҳам эшитишимиз мумкин”.
Бахмут учун кураш урушнинг энг қонли жангларидан бирига айланди. Бахмут шаҳри аёвсиз жанглар натижасида деярли буткул вайрон бўлган.
Украина жангарилари ҳар бир уйга ёпишиб олишяпти, шундай эмасми, деган мухбирнинг саволига, жангчи:
“Улар ҳар бир уйга ёпишган демаган бўлардим, тиш-тирноғи билан қаршилик қилмоқда”, дейди рус ҳарбийси.
Рейтерс рус ОАВлари тарқатган хабарни тасдиқлай олмади.
«Вагнер» раҳбари Евгений Пригожин ўз қўшинлари Бахмутнинг 80 фоизини назорат қилаётганини даъво қилган. Киев эса ўз кучларини Бахмутдан олиб чиқмоқчилиги ҳақидаги даъволарни бир неча бор рад этган.
Украина ҳарбийлари Бахмут яқинида душман позицияларини гаубицалардан ўққа тутмоқда
Мариуполлик Сергей исмли ҳарбий ўз бўлинмаси биринчи навбатда рус техникаларини йўқ қилишга эътибор қаратишини айтади.
«Пиёда аскарларни йўқ қилишдан кўра, душман техникаларини йўқ қилган афзал. Миномётни йўқ қилиш икки ёки учта душман жангчисини ўлдиришдан фойдалироқ. Аммо ҳужум бўлинмамиз олдинга ўтганда имкон қадар кўпроқ душман аскарларини йўқ қилиш асосий вазифа бўлади. Шунда улар ортга чекинади. Ва ҳужум бўлинмамиз уларнинг позицияларини эгаллаб олишига имкон пайдо бўлади», дейди украин ҳарбийси Сергей.
Россия кучлари Бахмутда олдинга ўтганини даъво қилди. Украина эса шаҳар бўйлаб фронт чизиғини ушлаб турганини таъкидламоқда.
Рейтерс ҳар икки томоннинг жанг майдони ҳақидаги хабарларни тасдиқлай олмади.
Россия суди Навальнийнинг қамоқхонадан нутқ сўзлашига имкон бермади
Кремль танқидчиси Алексей Навальний сафдошлари қамоқхонада унинг соғлиғи ёмонлашган бўлиши эҳтимолидан жиддий хавотир билдирганидан бир неча кун ўтиб ва бир неча ой ичида илк дафъа жамоатчиликка кўриниш берди.
Чоршанба (26 апрель) куни Ковров шаҳридаги ахлоқ тузатиш колониясида туриб видеоалоқа орқали Москва суди мажлисида иштирок этган Россия мухолифати лидери озиб кетгандек кўринса-да, ўз тарафдорлари билан гаплашаркан, юзида табассум бор эди, деб ёзади “Настояшчее время”.
Навальнийнинг яқинда якка кишилик камерада вақтни қандай ўтказгани ҳақидаги кириш сўзи якунлагани ҳамон суд у билан видеоалоқани узиб қўйган.
Суд мажлиси ОАВлар учун ёпиқ эди, лекин, хабар қилинишича, Навальний терговчилар унга қарши терроризмга доир, ўз таъбирича, “абсурд” жиноят иши очишганини ва бу иш бўйича қўшимча 30 йиллик қамоқ жазосига ҳукм этилиши мумкинлигини билдирган.
“Улар абсурд айбловларни ёпиштириб, менга 30 йиллик қамоқ билан таҳдид солишяпти”, дейилади Навальнийнинг тарафдорлари ижтимоий тармоқларда эълон қилган баёнотида.
“Жараённинг ёпиқ ўтказилиши – бу нафақат менинг иш билан танишиб чиқишимга халал беришга, балки бу ҳақда ҳеч кимга билдирмасликка уриниш ҳамдир”, деган мухолифатчи.
Навальнийга кўра, қамоқхонада бўлгани ҳолда уни террорчилик содир этган, дея иддао қилиш ўтакетган бемаъниликдир. Мухолифатчи айтишича, иш ҳарбий судда кўрилади.
Собиқ юрист Алексей Навальний ўн йилча муқаддам президент Владимир Путин ва унинг атрофидаги элитага қаратилган масхараомуз чиқишлари ва жуда катта кўламдаги коррупцияга доир суриштирувлари орқали танилган. У ҳозирда фирибгарлик ва судга ҳурматсизлик айблови билан 11,5 йиллик қамоқ муддатини ўтамоқда.
Мухолифатчининг ўзи бу айбловлар унинг “унини ўчириш учун” бичиб-тўқилганини урғулайди.
Навальний 2021 йилда қаттиқ тоби қочиши ортидан Германияда даволангач (Ғарб лабораторияларида ўтказилган текширувлар мухолифатчи асабларни фалажловчи модда билан заҳарланганини тасдиқлаган) ўз ихтиёри билан Россияга қайтиб, тарқоқ Россия мухолифатининг ҳурматини қозонган.
Навальнийга кўра, уни 2020 йил августда Сибирда заҳарлаганлар. Кремль эса уни ўлдиришга уриниш бўлганини инкор этиб келади.
WP: АҚШ Украинани 2023 йил 24 февралда Россия объектларига зарба беришдан қайтарган
Украина Мудофаа вазирлиги Разведка бош бошқармаси (РББ) Россия Украинага қарши кенг кўламли босқин бошлаганига бир йил тўлган куни – 24 февралда Россиянинг Москва ва бошқа шаҳарларда жойлашган қатор объектларига ҳужум қилишни режалаган.
Бу ҳақда, АҚШ Миллий хавфсизлик агентлигининг яқинда сиздирилган махфий ҳужжатларига таяниб The Washington Post хабар қилмоқда.
Хабарда айтилишича, Украинанинг муҳтамал зарбаларидан икки кун олдин, яъни 22 февралда Марказий разведка бошқармаси (МРБ) Украина ҳарбий разведкаси “Вашингтон илтимосига кўра Россия ҳудудига зарба беришни кейинга қолдиришга рози бўлган”ини билдирган.
Бироқ АҚШнинг айнан қайси идораси илтимос билан мурожаат қилгану Киев нега илтимосни қондиришга рози бўлгани мавҳум қолаётир. АҚШ ва Украина расмийлари Washington Post мақоласига изоҳ беришганича йўқ.
АҚШ газетаси таъкидлашича, РББ раҳбари Кирилл Буданов тобеларидан бирига 24 февраль куни Россиядаги нишонларга “кенг кўламли зарба бериш”га ҳозирлик кўриш кераклигини айтган.
Муҳтамал нишонлар орасида Москвадан ташқари, Новороссийск порти ҳам бўлган. Аммо махфий ҳужжатларда Украина разведкаси бу нишонларга айнан қандай зарба беришни режалагани очиқланмаган.