Столтенберг: НАТО Украинага имкони борича кўпроқ қурол етказиб бермоқда
НАТО Бош котиби Йенс Столтенберг НВ телеканалига берган эксклюзив интервьюсида Россия қўшинларига қарши ҳужумни қачон бошлаш - Киевнинг ихтиёрида, деб баёнот берди:
“НАТО Украинага имкони борича кўпроқ қурол аслаҳа етказиб бермоқда. Бу аллақачон жанг майдонларида иш берганига гувоҳ бўлдик. Жумладан украин қўшинлари ўз жасорати ва биз юборган ҳарбий техникалар ёрдамида Херсон ва Харковни озод қилганини кўрдик. Украинанинг бу галги қаpши ҳужуми ҳам муваффақиятли бўлишига ишончим комил. Яна бир муҳим масала, НАТО Украинани аъзо сифатида қабул қилишга тайёр. Бироқ ҳозирги асосий эътибор Украинанинг урушда ғалаба қозонишига қаратилган. Албатта, Украина альянсга эркин мустақил давлат сифатида кириши керак, бусиз иложи йўқ”.
Айни пайтда НАТО раҳбари, шу кунга қадар Украина қўшинларининг чекланган имконлар билан жангда эришган ютуқлари ва НАТОнинг жараёндаги ҳозирги иштироки инобатга олинса, Украинанинг ғалаба қозонишига ишончи комиллигини қўшимча қилди.
Хитой собиқ СССР таркибида бўлган барча мамлакатлар суверенитетини ҳурмат қилади
Хитой собиқ СССР таркибида иттифоқдош республикалар бўлган барча мамлакатлар суверенитети, мустақиллиги ва ҳудудий яхлитлигини ҳурмат қилади.
Бугун Пекинда ўтказилган брифингда Хитой ТИВ вакили Мао Нин шундай баёнот берди. У Хитой СССР парчаланганидан сўнг собиқ совет республикалари билан дипломатик алоқалар ўрнатган илк мамлакатлардан бири эканини урғулади. Мао Нин Хитойнинг Франциядаги элчиси Лу Шайнинг катта резонанс чиқарган баёнотига изоҳ берди.
Франциянинг La Chaîne Info телеканалида қилган чиқишида Хитой элчиси Лу Шай “Қрим аввалданоқ Россияга тегишли ҳудуд эди. Уни кейинроқ Хрушчёв Украинага тортиқ қилган”, деди.
Журналистнинг халқаро ҳуқуқ Қрим Украинага тегишли эканини тамсил этади, деган эътирозига эса Лу Шай постсовет давлатлари халқаро ҳуқуқда ҳеч қандай мақомга эга эмас, негаки “уларнинг суверен давлат сифатидаги мақомини аниқлаштирадиган халқаро шартнома йўқ” деб билдирганди.
Латвия, Литва ва Эстония ташқи ишлар вазирлари бу баёнотни кескин қоралади, Болтиқбўйи давлатлари буни Хитой Украинада тинчлик ўрнатиш учун воситачи бўла олмаслигига яққол далил бўлди, деб баҳолади. Европа Иттифоқи ташқи ишлар мутассадиси Жозеп Боррель эса “ЕИ бу фикрлар Хитойнинг расмий позициясини англатмайди, деб умид қила олади холос”, деб баёнот берди.
Париждаги Хитой элчисининг сўзлари Хитойнинг расмий позициясини тамсил қиладими, йўқми, деган саволга жавобан Хитой Ташқи ишлар вазирилиги вакили, Пекиннинг расмий позицияси Ташқи ишлар вазирилиги расмий баёнотларида акс этишини айтди.
Мутахасислар фикрича, постсовет давлатлари мақомини аниқлаштирувчи бундай ҳалқаро шартномага эҳтиёж мавжуд эмас. Чунки СССР тарқалгани ортидан ҳар бир республика ўз суверенитетини эълон қилган, халқаро ҳамжамият томонидан тан олинган ва БМТ аъзолигига қабул қилинган.
Лавров: Биз буни унутмаймиз ва кечирмаймиз
Россия ташқи ишлар вазири Сергей Лавров АҚШ БМТ Хавфсизлик кенгаши йиғилишига йўл олган Россия делегациядаги журналистларига виза бермаганидан норозилигини билдирди.
Лавров «Биз буни унутмаймиз ва кечирмаймиз», деди.
Россия расмийлари америкалик журналистларга ҳам шундай муносабат қилиниши ҳақида огоҳлантирди. АҚШ Давлат департаменти махсус виза сўровлари бўйича маълумот бера олмаслигини айтиб, вазиятга муносабат билдирмади.
«АҚШ БМТ штаб-квартираси тўғрисидаги қонунга кўра, БМТга мезбон давлат сифатида ўз мажбуриятларини, жумладан виза бериш бўйича мажбуриятларига жиддий ёндашади», деди АҚШ Давлат департаменти вакили.
«Улар бизнинг жиғимизга тегишга ҳаракат қилмоқда. Бу эса Вашингтондаги ҳамкасбларимизга нафақат ишониб бўлмаслигига, балки уларни эшитишдан ҳам маъни йўқлигига яна бир исбот. Сўнгги бир неча кун ичида мазкур масала юзасидан уларга бир неча марта мурожаат қилдик. Шунга қарамай, натижани кўриб турибсиз. Ваҳоланки, улар бизни визалар исталган кун, исталган дақиқада берилишига ишонтиришди. Бироқ буларнинг бари қип-қизил ёлғон бўлиб чиқди. Бу кўзбўямачиликнинг АҚШга ҳеч қандай нафи бўлмайди», деди Россия ТИВ ўринбосари Сергей Рябков.
Дунёда 2022 йилги жами ҳарбий харажат рекорд рақамга етди
Дунёнинг ҳарбий харажатлари 2022 йилда рекорд нуқтага – 2 триллион 24 миллиард долларга етган. Стокҳолм тинчлик муаммоларига доир тадқиқот институти (SIPRI) ҳисоботида шу ҳақда сўз боради.
Ҳисоботга кўра, харажатлар ортишининг асосий омилларидан бири бу Россиянинг Украинага босқинидир. Россия ҳарбий сарф-харажатлари миқдори бўйича АҚШ ва Хитойдан сўнг учинчи ўринни эгаллаган.
2022 йилда мамлакатнинг ҳарбий харажатлари 9,2 фоизга ортиб, 86 миллиард долларни ташкил этган. Ва ушбу сумма Россия бюджетида назарда тутилганидан 34 фоизга кўп, дея қайд этмоқда ҳисобот муаллифлари.
Украинанинг ҳарбий харажатлари эса бир йил давомида 640 фоизга кўпайиб, 44 миллиард долларга етган. Бу SIPRI томонидан қачондир қайд этилган энг кескин ўсишдир.
НАТО мамлакатлари бирга йил бўйи 1 триллион 200 миллиард доллар сарфлаган – бу 2021 йилги кўрсаткичдан 0,9 фоизга кўп. АҚШнинг ҳарбий харажатлари 877 миллиард доллар ёки бутун дунё ҳарбий эҳтиёжларига сарфланган маблағнинг 39 фоизини ташкил этган.