Украина уруш бошидан бери 40 фоизгача қирувчи учоқларини йўқотган
Бу ҳақда АҚШ Мудофаа вазирлигининг яқинда сиздирилган махфий ҳужжатларига таянган ҳолда The Economist хабар қилмоқда. Нашр маълумотига кўра, Украина 60 та жанговар реактив учоқларидан айрилган, сафда қолган учоқлари сони 80 га яқин.
Айни чоғда Россиянинг қарийб 500 та учоғи борлигига урғу берилган. The Economist мақоласида айтилишича, Украинага Польша ва Словакия берган совет “МиГ-29” қирувчилари парвоз қила олмайдиган аҳволда бўлиб, украин ҳарбийлари улардан эҳтиёт қисмлар манбаи сифатида фойдаланишмоқда.
Аввалроқ Словакия ҳукумати айрим учоқлар уруш бошланишидан олдин уларга техник хизмат кўрсатиш учун келган россиялик мутахассислар томонидан қасддан шикастланган бўлиши мумкинлигини билдирган эди.
Европада «ҳашамат ичида яшаётган» рус мулозимининг собиқ хотини
Якшанба куни Парижда Алексей Навальнийнинг Коррупцияга қарши кураш халқаро фонди (ФБК) томонидан уюштирилган пикетда бир неча ўн киши иштирок этди.
Пикетчилар яқинда ФБК суриштирувига мавзу бўлган тадбиркор Светлана Маниовичга Европа санкциялари қўлланишини талаб қилишди. Суриштирув муаллифларига кўра, Маниович Россия мудофаа вазири ўринбосари Тимур Ивановнинг собиқ хотини бўлиб, ўтган йилнинг августида у билан шунчаки номига ажрашган.
Иванов Мудофаа вазирлиги мулкларини ва қурилиш секторини бошқаради. Хусусан, босиб олинган Мариуполдаги қурилиш ишларига раҳбарлик айнан унга юклатилган. Ғарб мамлакатлари Ивановнинг Украинага қарши урушдаги ролини тўғри баҳолаб, унга нисбатан санкциялар жорий этганди.
ФБК суриштирувида айтилишича, Светлана Маниович “ҳашамат ичида яшайди”, қимматбаҳо жавоҳирлар, мўйналарга эгалик қилади, “Роллс-Ройс” автомобилида юради, шунингдек Сан-Тропеда ойига 150 минг еврога ижара олинган кошонада истиқомат қилади. Аёл Францияда Исроил паспорти билан яшамоқда.
“Россия мудофаа вазирининг муовини Украинада одамларни ўлдириб, шунинг орқасидан пул ишлаётган пайтда унинг хотини Европада умргузаронлик қиляпти”, дея таъкидланади суриштирувда. Навальний сафдошларига кўра, 2022 йилнинг март ойида – Мариупол штурм қилинаётган пайтда Маниович Францияда ҳузур қилиб юрган. Яқинда аёлни бадавлат кишилар дам оладиган Куршевел тоғ курортида кўрганлар.
Бир неча кун олдин Навальний сафдошлари мухолифатчининг Россия қамоғидан озод этилишини талаб қилиб дунёнинг бир қанча шаҳарлари, жумладан Берлин, Нью-Йорк, Лос-Анжелес, Барселона ва Лиссабонда акциялар ўтказишди.
ЕИ янги санкциялар пакетида Россия орқали юкларни транзит ташишга доир тақиқларни кенгайтиради
Европа Иттифоқи янги санкциялар пакетида Россия орқали юкларни транзит ташишга доир тақиқларни кенгайтиради. Бу ҳақда янги санкция таклифлари билан таниш аноним манбаларга таянган ҳолда Bloomberg хабар қилмоқда.
Тахминларга кўра, Россия орқали учинчи мамлакатларга юк ташиш бутунлай ман этилмайди, чекловлар эса қатор технологиялар ҳамда техника турларига тааллуқли бўлиши кутилмоқда.
Bloomberg ёзишича, Польша, Эстония ва Литва ЕИдан Россия ҳарбий-саноат комплекси, авиация ва космик тармоқларида қўлланиши мумкин бўлган юкларнинг Россия орқали ташилишини буткул тақиқлашни талаб қилишмоқда. Бу юкларнинг номма-ном рўйхати очиқланмаган.
Аввалроқ Россия билан чегарадош Европа мамлакатларининг Марказий Осиё давлатлари билан савдо айланмаси сезиларли даражада ошгани журналистик суриштирувлар орқали аниқланган эди. Экспертлар фикрича, Россия тақиқланган товарларни учинчи мамлакатлар орқали олиб, Ғарб санкцияларига чап бераётганини билдиради.
Россия ТИВ “жавоб” тариқасида немис дипломатларини бадарға қилишини билдирди
Германиядаги Россия элчихонаси ходимлари “оммавий” бадарға қилинаётганига “жавобан” Россия немис дипломатларини мамлакатдан бадарға қилади. Бу ҳақда Россия ТИВ сайтида маълум қилинмоқда.
Шунингдек, Россия ТИВ Россиядаги Германия дипломатик ваколатханалари ходимлари сонини сезиларли даражада қисқартирмоқчи эканини билдирди. ГФРнинг Россиядаги элчиси Андреас фон Гайр мазкур қарор ҳақида 5 апрель куни ТИВда бўлган суҳбат чоғида расман хабардор қилинган.
Германия ТИВ Россиянинг “жавоб чораси” ҳақидаги баёнотини “маълумот учун қабул қилган”ини билдирди.
Кейинроқ Россия ТИВ вакили Мария Захарова мамлакатдан 20 дан ортиқ немис дипломатлари бадарға қилинаётганини айтди. РИА Новости давлат ахборот агентлиги хабарига кўра, Берлинни тарк этаётган россиялик дипломатлар сони ҳам 20 нафардан ортиқ. Айни чоғда BILD газетаси Россия мамлакатдаги тахминан 90 нафар немис дипломатидан 34 нафарини бадарға қилаётгани ҳақида ёзди.
Deutsche Welle радиоси хабарига кўра, бугун эрталаб Берлинга Москвадан Ил-96-300 транспорт учоғи учиб борган. Журналистлар Flightradar24 парвозларни кузатиш сайтида пайдо бўлган ушбу маълумотни “ваколатли манба”дан тасдиқлатиб олганларини айтишмоқда.
Аввалроқ Германиянинг Focus нашри расмий Берлин гўёки “ўз мақомидан сиёсий, иқтисодий, ҳарбий ва илмий маълумотларни олишда фойдаланиб келган” 30 нафар россиялик дипломатни бадарға қилмоқчи экани ҳақида хабар берган эди.