“Катта еттилик гуруҳи” Россиянинг Беларусдаги ҳаракатини қоралади
“Катта еттилик гуруҳи” вазирлари Хитойнинг Тайванга босимини ва Россиянинг Беларусда ядро қуролини жойлаштираётганини танқид қилди.
«Афсуски, Россиянинг босқини давом этмоқда. Бунга имкон қадар тезроқ барҳам бериш учун, БМТ Бош Ассамблеясида 140 дан ортиқ давлат овоз берган резолюцияда кўрсатилганидек, Россия ўз қўшинларини зудлик билан Украинадан олиб чиқиб кетиши керак. Шунингдек, ўзини ноқонуний босқиндан ҳимоя қилаётган Украинани қўллаб-қувватлаш ва Россияга қарши санкцияларни давом эттириш муҳим деб ҳисоблаймиз», деди Япония ташқи ишлар вазири Ёшимаса Хаяши.
Россиянинг Украинага босқини ва Хитойнинг Тайванга қарши шунга ўхшаш ҳаракатларидан хавотирлар 3 кунлик учрашувнинг диққат марказида бўлади.
АҚШ Давлат котиби Энтони Блинкен Россия Украина донига муҳтож давлатларга берган ваъдаларини бузмоқда, деб баёнот берди.
Блинкен Япониянинг Каруизава шаҳрида бўлиб ўтган ”Катта еттилик” гуруҳи ташқи ишлар вазирлари йиғилишидан сўнг интервью берди:
“Сўнгги бир неча кун ичида Украинадан бирорта ҳам кема чиқмади, Дон ортиш учун келган 50 дан ортиқ кемалар эса Украинага киритилмаяпти. Дунё бўйлаб бир қанча мамлакатлар бу донга муҳтож. Россия яна Украина ғалласининг дунё давлатларига етиб боришига тўсқинлик қилиб, озиқ-овқат нархини ошишига сабаб бўлмоқда. Сўнгги бир неча кун ичида Украинадан бирорта ҳам кема чиқмади, юк ортиш учун келган 50 дан ортиқ кемаларнинг киришига тўсиқ қўйилди. Дунё бўйлаб бир қанча мамлакатлар бу донга муҳтож. Россия уларга берган ваъдаларини бузмоқда".
Кремль танқидчиси Владимир Кара-Мурза 25 йилга ҳукм қилинди
Кремль танқидчиси Владимир Кара-Мурзанинг рафиқаси эрига тайинланган 25 йиллик қамоқ жазоси ҳукумат «ундан жуда қўрқишини» кўрсатади деб айтди.
Кара-Мурза давлатга хиёнат ва бошқа жиноятларда айбдор деб топилган, бироқ у барча айбловларни рад этган.
«Россия ҳукумати Россияни агрессор давлатга айлантирди. Биласизми, полиневопатия фалажга олиб келиши мумкин, бунинг белгилари тарқалмоқда. Унга 25 йил тугул, беш йил ҳам жазо берилмаслиги керак. Унга нисбатан очилган жиноий иш бошиданоқ адолатсиз эди. Жиноий иш мутлақо ноқонуний қўзғатилган, ноқонуний текширилган. Суд мажлислари ҳам бутунлай ноқонуний бўлди, чунки суд ёпиқ эшиклар ортида ўтказилди», деди Евгения Кара-Мурза.
41 ёшли Кара-Мурза, Россия ва Британия паспортларига эга мухолиф сиёсатчи, йиллар давомида президент Владимир Путинни танқид қилиб келади.
У Ғарб ҳукуматларини Россияга ва айрим россияликларга инсон ҳуқуқларини бузганлиги учун санкциялар киритишга чақирган.
Владимир Кара-Мурза ёпиқ эшиклар ортида ўтказилган суд жараёнини Иосиф Сталиннинг 1930 йиллардаги қатағон сиёсатига қиёслади. У барча айтганларидан афсусланмаслигини айтиб, оқлашни сўрашдан бош тортди.
Украинадан Ўзбекистонга 360 тонна олма борди
EastFruit таҳлил марказига кўра, Россиянинг давом этаётган ҳарбий тажовузи, мураккаб ва қиммат логистика ҳамда украиналик фермерлар дуч келаётган кўплаб қийинчиликларга қарамай, 2023 йил январь ойида Украина Ўзбекистон бозорида энг йирик олма етказиб берувчи давлат бўлди.
2023 йил январь ойида Украинадан Ўзбекистонга олма экспорти 360 тоннага етди ва урушдан олдинги 2022 йил январдаги кўрсаткичдан 24 фоизга ошди. Энг қизиғи, январь ойида Украина олмалари Эрон, Молдова ва Туркия олмаларини Ўзбекистон бозоридан чиқариб юборди.
Бу мамлакатлардан Ўзбекистонга олма етказиб бериш мос равишда 2 - 4 баробарга қисқарган. Украина 2022 йил декабрь ойида Ўзбекистонга 274 тонна олма экспорт қилган бўлса, ноябрь ойида арзон маҳаллий олмалар бор пайтда 39 тонна олма етказиб берган.
2022 йилнинг февраль-апрель ойларида Украинадан Ўзбекистонга олма экспорти энг юқори чўққига етди. Мазкур уч ой ичида Украина Ўзбекситонга 1500 тоннадан ортиқ олма сотишга эришган.
Кипр банки россияликларнинг ҳисобларини ёпишини билдирди
Кипрнинг энг йирик банки – Bank Of Cyprus Россия фуқароси бўлган мижозларига уларнинг ҳисобварақлари ёпилиши ҳақида хабарномалар йўллай бошлади.
Бу ҳақда, Кипрда турли хизматлар кўрсатувчи Main Partner Trust ширкатига ҳавола берган ҳолда Forbes журнали хабар қилди. Ушбу маълумотни нашрнинг банк соҳасидаги манбаси ҳам тасдиқлаган.
Банк мижозларига юборилаётган хатларда уларнинг ҳисобварақлари икки ой ичида ёпилиши билдирилиб, бу фойдаланувчи маълумотлари “ўз мижозингни бил” қоидасига мувофиқ эмаслиги билан изоҳланмоқда.
Main Partner Trust аниқлик киритишича, банк россиялик мижозларига нисбатан бундай йўл тутаётгани сабабларидан бири Россиянинг солиқ резиденти мақоми бўлиши мумкин.
Шунингдек, Россиядаги санкцияга учраган бизнесдан даромад олиш (масалан, сакцияга йўлиққан ширкатлар масофадан ишловчи ходимларига тўлайдиган иш ҳақлари ва дивидендлар), шунингдек “ноодатий” яшаш рухсатномаси (“ташрифчи” визаси) ёки Кипрга “рақамли кўчманчи” визаси билан келиш ҳам ҳисобварақни ёпишга асос бўлиши мумкин.
Ҳисобварақ ёпилиши билан боғлиқ муаммога нафақат Bank Of Cyprus мижозлари, балки Hellenic Bank ва Alpha Bank хизматларидан фойдаланувчилар ҳам дуч келишмоқда, деб ёзади Forbes.